Morgunblaðið - 19.12.2003, Side 40

DAGLEGT LÍF
40 FÖSTUDAGUR 19. DESEMBER 2003 MORGUNBLAÐIÐ
Jólin eru nefnd hátíð ljóssins. Að vissu leyti eru þetta öfugmæli endaganga þau í garð á myrkasta tíma ársins. Á hinn bóginn bera þaumeð sér væntingar um bjartari tíð með hækkandi sól. Fólk hefur löngum tekið forskot á sæluna með því að leggja sig
fram um að tendra ljós á þessum tíma og í þeim efnum sem öðrum eru sumir
stórtækari en aðrir. Ljósmyndarar Morgunblaðsins fóru á stjá á dögunum
og mynduðu nokkur hús sem fanga athygli gesta og gangandi vegna mynd-
arlegra ljósaskreytinga. Ásetningur eigendanna er velþekktur: að lýsa upp
svartasta skammdegið og kalla fram jólabarnið í okkur öllum.
Þarf fimm til sex kílówött
Einn af þeim sem var fyrstur til þess í borginni að skreyta íbúðarhús sitt í
bak og fyrir með glæsilegum ljósaseríum var Smári Ingvarsson sem býr í
Urriðahvísl 3 í Reykjavík. „Ég er líklega búinn að gera þetta í ein fjórtán ár
en kannski ekki alveg svona mikið allan tímann,“ segir hann og vísar þar
með til ævintýraljósalandsins í og við húsið hans. „Mér finnst mjög gaman
að lífga svolítið upp á skammdegið með þessu og hafa fallegt í kringum mig.“
Smári játar þegar hann er spurður að því hvort gestir og gangandi veiti
heimili hans ekki mikla athygli fyrir vikið og setur ekkert fyrir sig þótt ljós-
anotkunin valdi því að rafmagnsreikningurinn fitni verulega á þessum tíma.
„Þetta deilist yfir árið hvort eð er þannig að ég er lítið að hugsa um það. En
ætli það séu ekki eitthvað í kringum 5–6 kílówött sem þarf til að keyra allar
skreytingarnar.“
Keppni um ljósahús bæjarins
Það má segja að keppnisskapið hafi fleytt Margréti Örlygsdóttur langt í
því að lýsa upp húsið sitt og lóðina en hún býr á Borgarvegi 25 í Njarðvík.
„Reykjanesbær hefur nú í nokkur ár staðið fyrir keppni þar sem ljósahús
bæjarins er valið,“ segir hún og í ljós kemur að í þau þrjú skipti sem keppnin
hefur verið haldin hefur hús hennar lent tvisvar í fyrsta sæti í keppninni og
einu sinni í því þriðja.
Það er þó ekki bara sigurviljinn sem rekur Margréti áfram. „Þetta lýsir
einfaldlega upp skammdegið og ég væri alveg til í að hafa svona hús á móti
mér. Svo hef ég alltaf haft gaman af skreytingum og er m.a.s. að byrja í Iðn-
skólanum í Hafnarfirði í útstillingarhönnun þar sem
verkefnin felast m.a. í því að skreyta.“
Hún segir ljósaperurnar á lóðinni skipta þúsundum
og vissulega rjúki rafmagnsreikningurin upp á þess-
um tíma. Á móti komi hins vegar að verðlaunin í ljósa-
keppninni séu gjafabréf hjá hitaveitunni. „Þannig að
það vegur þetta svolítið upp,“ segir hún.
Biður um að fá að kíkja inn
Á Austurgötu 31 í Hafnarfirði býr Sverrir Júlíusson
og konan hans en þau hafa í mörg ár skreytt húsið sitt
myndarlega um jólin. „Ég keypti húsið hálfónýtt,
smíðaði það upp og gerði það eins og nýtt. Svo datt
mér í hug að skreyta það svona og þetta hefur einfald-
lega undið upp á sig. Og nú eru skreytingarnar alveg í
toppi – það er ekkert hægt að gera meira.“
Hann segist hafa óskapleg gaman af skreyting-
unum og þeirri athygli sem þær vekja. „Það er alltaf
örtröð af fólki í kring að skoða húsið og það vill jafnvel
fá að skoða inn í það líka,“ segir Sverrir sem gjarnan
býður fólki inn ef svo ber undir. Þá hafa börnin í
Lækjarskóla, sem er í næsta nágrenni, notið þess að koma í skipulagðar
hópferðir að húsinu til að líta ljósadýrðina augum.
Koma með börnin í myndatöku
Magnús Sigurðsson sem býr á Melabraut 23 á Seltjarnarnesi tekur í sama
streng en húsið hans er ljósum prýtt svo að eftir er tekið. „Ég hef alltaf ver-
ið mikill ljósamaður og svo er bara gaman að hitta fólk hér úti á götu sem
slær á öxlina á manni af því að því finnst þetta svo flott. Það skemmir ekki
fyrir.“
Hann segir mikla umferð í kringum húsið. „Mæðurnar koma jafnvel með
börnin til að taka jólamyndir af þeim hérna enda er ég m.a. með hreindýr úti
í garði.“
Magnús heldur að hann sé með um 6.000 perur í skreytingunum hjá sér
og vissulega setur dýrðin mark sitt á rafmagnsreikninginn. „Mælirinn snýst
ansi hratt en þetta er bara eins og að reykja einn og hálfan eða tvo pakka á
dag. Það er ekkert sem maður setur fyrir sig.“
Ljósin á
húsunum
Morgunblaðið/Jim Smart
Melabraut 23 á Seltjarnarnesi: Magnús kvartar ekki undan vinnunni við upp-
setninguna á ljósunum enda segist hann vera með góða aðstoðarmenn. „Í
raun er þetta ekkert svo mikil vinna, það eru allir krókar fyrir hendi í húsinu
því þetta er komið í góða rútínu. Svo er maður að læða ljósum í trén.“
Urriðakvísl 3 í Reykjavík: Seríurnar og skreytingarnar koma flestar frá landi jólaljósanna enda töluvert ódýrari
þar en hér heima. „Þetta er allt keypt í Ameríku nema það sem er í gluggunum inni,“ segir Smári.
Austurgata 31 í Hafnarfirði: Húsið gengur undir ýmsum
nöfnum meðal bæjarbúa. „Það er kallað Jólahúsið og kon-
ur kalla það Dúkkuhúsið. Svo eru aðrir sem kalla það Völ-
undarhúsið,“ segir Sverrir, eigandi þess.

SKREYTINGAR
Borgarvegur 25 í Njarðvík: Margrét hefur ekkert á móti þeirri athygli sem húsið hennar vekur. „Það koma meira
að segja heilu rúturnar hingað með túristum sem sitja við gluggann og taka myndir,“ segir hún.
ben@mbl.is
Morgunblaðið/Ásdís Morgunblaðið/Jim Smart
Morgunblaðið/Jim Smart
Morgunblaðið/Jim Smart