Morgunblaðið - 21.12.2005, Blaðsíða 10

10 MIÐVIKUDAGUR 21. DESEMBER 2005 MORGUNBLAÐIÐ
FRÉTTIR
LÖGREGLAN hefur bannað
Menntaskólanum við Sund að standa
fyrir böllum fyrir nemendur fram á
vor í kjölfar óláta og drykkju á tveim-
ur böllum í haust og vetur. Rektor
skólans er ósáttur við aðferðir lög-
reglu og segir að lögreglan hafi ekki
fylgt stjórnsýslulögum.
Skólaslit voru í Menntaskólanum
við Sund í gær, og í ræðu sinni vakti
Már Vilhjálmsson rektor máls á
stjórnsýsluákvörðun Lögreglustjór-
ans í Reykjavík um að ekki megi
halda skólaböll í skólanum fram á
vor, en það hafði vakið athygli nem-
enda að ekkert lokaball var haldið í
ár.
Í samtali við Morgunblaðið sagði
Már að þrátt fyrir að hann hafi veru-
legar athugasemdir við ákvörðun
lögreglu, og það ferli sem leiddi til
hennar, hafi hann ákveðið að kæra
hana ekki, enda sé ljóst að bannið sé
viðleitni lögreglu til þess að berjast
gegn unglingadrykkju og góðra
gjalda vert að reynt sé að berjast
gegn henni.
„Vandinn liggur í ákveðnu hömlu-
leysi og skorti á eftirliti í foreldra-
húsum. Þar fer drykkjan fram. Ekk-
ert áfengi kemst inn á skemmti-
staðina en krakkarnir virðast hella í
sig áður en inn er farið. Hér þurfa
foreldrar að koma að málum, skólinn
getur ekki stýrt því hvað gerist í
heimahúsum en mér hefur fundist
óvenjulítill kraftur í forvarnarstarfi
utan skólanna síðastliðin tvö til þrjú
árin,“ segir Már.
Kvartaði yfir málsmeð-
ferð við ráðherra
Í stað þess að kæra ákvörðunina
ákvað Már að fara þá leið að senda
Birni Bjarnasyni, dómsmálaráð-
herra, bréf vegna málsins þar sem
kvartað var undan málsmeðferð lög-
reglu. Í kjölfarið átti hann samtal við
ráðherra, sem hafði einnig rætt við
Lögreglustjórann í Reykjavík, þar
sem farið var yfir málið. Í framhald-
inu segir Már að ákveðið hafi verið að
hann fundaði með lögreglu til þess að
ræða málið, og hugsanlegar lausnir á
því. Sá fundur hefur ekki verið tíma-
settur, og því stendur bann lögreglu
á það að haldnar séu skemmtanir í
Menntaskólanum við Sund. Aðdrag-
andinn að þeirri ákvörðun lögreglu-
stjórans að banna böll í skólanum má
rekja til óláta og drykkju sem komið
hefur upp á böllum skólans frá því í
haust. Már segir vissulega nokkuð til
í gagnrýni á böllin, en þetta séu með
stærri böllum sem haldin séu í
menntaskólum hér á landi og gangi
þó yfirleitt vel.
Vandræðin hófust strax á fyrsta
skólaballi vetrarins, busaballsins
svokallaða, sem haldið var skömmu
eftir skólabyrjun í haust. Þar var
mikið um ölvun og brutust út slags-
mál bæði innan dyra og utan. Már
segir að ljóst sé að það ball hafi farið
afar illa fram, og verið skólanum og
nemendum til skammar. Í kjölfarið
voru settar strangar reglur um böll
við skólann. Í kjölfarið var haldið lítið
ball, sem fór vel fram. Á næsta stóra
balli, hinu svokallaða ’85 balli sem
haldið var snemma í nóvember, var
áberandi mikil ölvun og troðningur
fyrir utan skemmtistaðinn, þó nem-
endur hafi ekki verið með áfengi inni
á skemmtistaðnum.
Ófagleg og illa unnin skýrsla
Eftirlitsmenn frá lögreglu fylgjast
með skólaböllum framhaldsskólana,
og í kjölfarið var skrifuð skýrsla um
ástandið á ballinu. Hún var birt rekt-
or í lok nóvember, og á sama tíma var
honum tilkynnt um þá ákvörðun lög-
reglunnar að banna skólanum að
halda fleiri skólaböll fram á vor. Már
segir það ekki í samræmi við stjórn-
sýslulög að skólinn hafi ekki fengið
tækifæri til þess að gera athuga-
semdir við innihald skýrslunnar áður
en tekin er ákvörðun um bann.
Már gerir athugasemdir við inni-
hald skýrslunnar, sem hann segir
ófaglega og illa unna. Þar sé m.a.
fjallað um mál sem komi skólanum
ekki við og öllu ægi þar saman. Það
sé t.d. fjallað um að val á skemmti-
staðnum sé óheppilegt, og hann sé of
nálægt íbúabyggð og hávaði of mikill.
Það segir Már að komi þessu skóla-
balli einfaldlega ekki við, enda stað-
urinn með skemmtanaleyfi og skól-
inn hafi fengið leyfi til að halda þar
skemmtun fyrir svo marga nemend-
ur.
Einnig er í skýrslunni gagnrýnd
sú mikla ölvun sem var meðal nem-
enda, en Már segir ljóst að skólinn
geti ekki borið ábyrgð á því sem
nemendur gera í heimahúsum, ölv-
uðum krökkum sé þó ekki hleypt inn
á böll.
Hvenær vorar hjá
lögreglustjóra?
Þrátt fyrir annmarka á meðferð
málsins hjá lögreglu segir Már að
hann hafi ákveðið að kæra ekki
ákvörðun lögreglunnar. Hann telji
þó ljóst að ákvörðunin stangist á við
meðalhófsreglu og ekki sé gætt jafn-
ræðis, enda hafi hann ekki heyrt af
því áður að lögreglan banni skólum
að halda skólaböll.
Einnig bendir hann á orðalag í
bréfi Lögreglustjórans í Reykjavík
sé afar loðið, þar komi fram að ákveð-
ið hafi verið að hafna eða synja öllum
skemmtunum á vegum MS fram til
vors 2006. Í fyrsta lagi sé ekki skil-
greint hvað sé átt við með skemmt-
unum, og einnig sé afar óljóst hve-
nær bannið eigi að enda, hvenær
lögregla telji að vorið sé komið.
Lögreglustjórinn í Reykjavík bannar skólaböll í Menntaskólanum við Sund
Rektor segir lögreglu ekki
fara að stjórnsýslulögum
Eftir Brján Jónasson
brjann@mbl.is
SJÁLFSTÆÐISFLOKKURINN
fengi 55,7% atkvæða í borgar-
stjórnarkosningum yrði kosið nú,
samkvæmt könnun Gallup sem
unnin var fyrir stuðningsmenn
Björns Inga Hrafnssonar, sem
sækist eftir fyrsta sætinu á lista
Framsóknarflokksins í Reykjavík í
prófkjöri.
Framsóknarflokkurinn mælist í
könnuninni með 4,8% fylgi, sem er
rúm tvöföldun á fylgi frá því í
sambærilegri könnun Gallup í
september, þegar flokkurinn
mældist með 2,3% fylgi. Þrátt fyr-
ir þessa fylgisaukningu næði
Framsóknarflokkurinn ekki inn
manni yrðu þetta niðurstöður
kosninganna.
Samfylkingin mælist með 25,3%
fylgi í könnuninni, og Vinstrihreyf-
ingin – grænt framboð með 12,3%.
Aðeins 1,7% sögðust myndu kjósa
Frjálslynda flokkinn ef kosið yrði
nú og næði flokkurinn því ekki inn
manni frekar en Framsóknarflokk-
urinn.
Í könnuninni var einnig spurt
hversu vel eða illa fólk treysti
Birni Inga til þess að gegna starfi
borgarstjóra. Um 47% neituðu að
taka afstöðu, en af þeim sem tóku
afstöðu sögðust um 31,5% treysta
honum mjög eða frekar vel til
starfsins. Af öllum þeim sem tóku
þátt í könnuninni sögðust því um
16,7% treysta Birni Inga mjög eða
frekar vel til þess að gegna starfi
borgarstjóra.
Fleiri vilja í prófkjör en
ætla að kjósa flokkinn
Spurt var um hvort þátttakend-
ur teldu líklegt að þeir tækju þátt
í prófkjöri, og sögðu 6,7% að það
væri mjög eða frekar líklegt. Það
er 1,9 prósentustigum hærra en
hlutfall þeirra sem sögðust myndu
kjósa flokkinn ef kosið væri nú.
Hringt var í samtals 1.525 borg-
arbúa á aldrinum 18–75 ára, og
voru þeir valdir af handahófi úr
þjóðskrá. Hringt var á tímabilinu
11. nóvember til 12. desember, og
var svarhlutfallið um 58%.
Ný könnun á fylgi
flokkanna í borgar-
stjórnarkosningum
Sjálfstæð-
isflokkur-
inn með
56% fylgi
Í UMRÆÐUM um framtíðarsam-
göngur milli lands og Eyja hafa
verið kynntir til sögunnar ýmsir
möguleikar, s.s. jarðgöng, ferjusigl-
ingar, loftpúðaferjur, loftskip og nú
síðast ferjulægi við Bakkafjöruhöfn
sem kynnt var fyrir samgöngu-
ráðherra á mánudag. Enn einn
kosturinn er ótalinn, en þar er um
að ræða manngerða eyju með hafn-
araðstöðu skammt úti fyrir suður-
strönd landsins með brúartengingu
við landið. Hallgrímur Axelsson
verkfræðingur telur nauðsynlegt að
hafa þennan möguleika með í um-
ræðunum og telur manngerða eyju,
hér eftir nefnd Landey, hafa ýmsa
kosti fram yfir Bakkafjöruhöfn.
„Hugmynd Siglingastofnunar um
Bakkafjöruhöfn gerir ráð fyrir
höfninni í landi rétt vestan við
Markarfljót, en erfiðleikarnir sem
gætu steðjað að slíku mannvirki
eru stöðugur sandburður meðfram
ströndinni,“ segir Hallgrímur.
„Ennfremur tel ég varasamt að
fara út í hafnargerð á þessum stað
vegna hættu á jökulhlaupi með til-
heyrandi jaka- og aurburði. Landey
þyrfti því að vera vestar, t.d. suð-
austan við Hvolsvöll. Munurinn á
manngerðri eyju og ferjulægi upp
við land, yrði sá að ekki þyrfti að
hafa jafnmiklar áhyggjur af sand-
burði fyrir innsiglinguna í eynni.
Að sjálfsögðu þyrfti að byggja
brimvarnargarða eins og við hafn-
argerð almennt.
Vafalaust yrðu það talsverð
mannvirki. Það ber þó að hafa í
huga að slíkar framkvæmdir eru
margfalt auðveldari nú en þær voru
á árum áður.“
Eyjan staðsett 1–2 km
úti fyrir landi
Hallgrímur telur að velja þyrfti
Landey stað um 1–2 km úti fyrir
landi og hæð hennar yrði a.m.k. 4
metrar til að verjast brimi. Hall-
grímur tekur fram að hugmynd um
Landey er ekki hans eigin og hefur
hann heyrt hana nefnda hjá Sigl-
ingastofnun. „Landey yrði margfalt
ódýarari en jarðgöng milli lands og
Eyja. Ennfremur yrði rekstr-
arkostnaður mun minni en við
ferjuhöfn upp við suðurströndina.
Það fer þó eftir því hvað ákveðið
yrði að fara út í mikla landfyllingu
við eyna og hversu stór höfnin yrði.
Ég ímynda mér aðallega að í Land-
ey yrði hafnarsvæði ásamt gáma-
svæði og vöruhúsi. Landmegin við
brúna, á Suðurlandsundirlendinu,
er síðan nánast ótakmarkað bygg-
ingarland. Erlendis þar sem gerðar
hafa verið svona eyjur, t.d. í Japan,
hefur á einni þeirra a.m.k. verið
lagður flugvöllur og því til viðbótar
eru uppi hugmyndir um að skipu-
leggja sumardvalarstaði á slíkum
manngerðum eyjum,“ segir Hall-
grímur.
„Ég hef ekki skoðað þennan
möguleika ofan í kjölinn en varpa
hugmyndinni aðallega fram þar
sem ég tel hana þess virði að hún
sé rædd. Mér finnst jafnvel að sam-
gönguyfirvöld ættu að skoða þenn-
an möguleika eins og hvern annan.“
Sandburður ekki
áhyggjuefni í Landey
Tölvugerð mynd af Landey og nánasta umhverfi. Fremst er suðurströnd landsins og gengur brú þaðan út í eyna.
Úti við sjóndeildarhring glittir í Vestmannaeyjar og er hugmyndin sú að ferjur gangi milli Eyja og Landeyjar.