Morgunblaðið - 30.09.2006, Blaðsíða 23
MORGUNBLAÐIÐ LAUGARDAGUR 30. SEPTEMBER 2006 23
AKUREYRI
ÞAÐ var söguleg stund á fimmtudagskvöldið þegar
nýtt handboltalið var kynnt til sögunnar á Akureyri á
fundi á veitingastaðnum Vélsmiðjunni; Akureyrar-
félögin KA og Þór eru komin í eina sæng í nafni Akur-
eyrar í meistaraflokkum karla og kvenna, 2. flokki
karla og unglingaflokki kvenna. Á myndinni er Hannes
Karlsson, formaður Akureyrar, sitjandi fyrir miðju,
ásamt Ingvari Gíslasyni frá Norðlenska og Svani Val-
geirssyni frá Bónus, en félagið skrifaði einmitt undir
samstarfssamninga við þau fyrirtæki. Fyrir aftan eru,
f.v., leikmennirnir Aigars Lazdins, Bjarni Gunnar
Bjarnason, Hörður Fannar Sigþórsson, Heiðar Þór
Aðalsteinsson, Guðrún Helga Tryggvadóttir, Ester
Óskarsdóttir og Jarmila Kucharska. Bæjarstjórinn á
Akureyri, Kristján Þór Júlíusson, kom á fundinn og
setti af stað nýja heimasíðu Akureyrarliðsins. Slóðin er
www.akureyri-hand.is og þar verður ítarlega fjallað
um allt sem handboltanum á Akureyri viðkemur.
Ljósmynd/Þórir Tryggvason
Sögulegt samstarf
UMHVERFISRÁÐ Akureyrar gerir
ýmsar athugasemdir við breytingu á
aðalskipulagi Eyjafjarðarsveitar
2005–2025 sem auglýst hefur verið.
Ráðið gerir reyndar einnig athuga-
semd við auglýsinguna sjálfa þar sem
breytinguna er verið að gera einhliða
þrátt fyrir að Skipulagsstofnun hafi
bent á að um sé að ræða verulegar
breytingar frá staðfestu Svæðis-
skipulagi Eyjafjarðar 1998–2018.
Meðal annars gerir umhverfisráð
athugasemdir við fullyrðingar þess
efnis að tillögurnar sem fyrir liggja
séu óverulegar. „Gert er ráð fyrir að
fjölgun íbúða á skipulagstímabilinu
verði um 420 íbúðir. Í Eyjafjarðar-
sveit eru samkvæmt greinargerð
með skipulagstillögunni 320 íbúðir í
dag, auk fyrirtækja, og því má aug-
ljóst vera að slík fjölgun er ekki
óveruleg og því eðlilegt að breytingar
verði teknar fyrir á vettvangi sam-
vinnunefndar [um svæðisskipulag].“
Það er mat umhverfisráðs að frá-
veitumál verði að taka inn í aðal-
skipulag með markvissari og skilvirk-
ari hætti en gert er í tillögunum,
vegna þéttrar byggðar sem gert er
ráð fyrir við suðausturhorn Pollsins.
Akureyri hafi lagt hundruð milljóna í
hreinsun sjávar í innanverðum Eyja-
firði og í Pollinum og bæjarbúum sé
mjög umhugað um að þeim árangri
verði ekki stefnt í hættu.
Þá er gerð athugasemd við fyrir-
hugaða fjörubyggð og minnt á nær-
liggjandi verndarsvæði í óshólmum
Eyjafjarðarár, sem sé mikilvægur
staður vegna fuglalífs. „Óshólmarnir
eru því með mikilvægari svæðum
þessa toga hér á landi og jafnvel í
Evrópu.“
Athugasemdir við skipu-
lagsmál í Eyjafjarðarsveit
NÚMI Kárason, strákurinn sem
sökk upp að höndum í kviksyndi á
Akureyri á miðvikudaginn en var
naumlega bjargað var ekki að lenda í
fyrsta skipti í hremmingum. Þriggja
ára var hann mjög hætt kominn og
hann rifjaði upp, í samtali við Morg-
unblaðið, annað atvik þar sem hann
óttaðist um líf sitt.
Um það þegar hann festist í kvik-
syndinu núna í vikunni sagði Númi:
„Þetta var hræðilegt. Það var eins og
skrattinn væri að toga mig niður í
jörðina,“ eins og fram kom á baksíðu
Morgunblaðsins í gær.
Hélt að ég myndi deyja
Þegar Morgunblaðið rabbaði við
Núma eftir atvikið í malarnámunni í
vikunni sagðist hann hafa haldið að
hann myndi deyja, eftir að hafa sokk-
ið ofan í leðjuna. En bætti svo við:
„Ég er eiginlega bara að verða vanur
þessu.“
Til útskýringar rifjar hann upp að
þegar fjölskyldan var í fríi á Spáni
fyrir nokkrum árum festist keðja,
sem hann var með um hálsinn, í botn-
inum á heitum potti. „Ég náði að slíta
festina og komast upp úr vatninu.“
Númi var líka mjög hætt kominn
þriggja ára þegar hann fékk heila-
himnubólgu. Þá má segja að Eyrún
Gígja systir hans, sem var aðeins 16
ára, hafi bjargað lífi litla bróður síns
og hún segir nú: „Það er einhver sem
vakir yfir Núma.“
Það var að morgni dags og Númi
var lasinn. Móðir þeirra var erlendis,
Eyrúnu dreymdi sérkennilegan
draum um nóttina og segist hafa
fundið á sér að hún yrði að vera
heima. „Um morguninn sagði ég
pabba að fara í vinnuna og að ég
skyldi vera hjá Núma. Ég var að gefa
honum [hitalækkandi] stíl og tók þá
eftir marbletti á rassinum á honum.
Ég vissi auðvitað ekki að það skipti
einhverju máli en tengdi blettinn við
drauminn og hringdi í frænku mína
sem er hjúkrunarkona og hún kveikti
um leið á perunni.“
Marblettur eins og þessi er glögg
vísbending um að viðkomandi sé
kominn með heilahimnubólgu á
hættulegu stigi.
Númi var drifinn á sjúkrahús og
móðir hans segir talið að aðeins hafi
munað tveimur til þremur klukku-
stundum að hann héldi lífi.
Þrekvirki
Finnur Aðalbjörnsson og Þor-
steinn Hjaltason unnu mikið þrek-
virki þegar þeir náðu Núma úr kvik-
syndinu á miðvikudaginn.
Haft er eftir Finni í staðarblaðinu
Vikudegi á fimmtudaginn að ekki
hafi gengið þrautalaust fyrir þá Þor-
stein að komast upp úr drullunni eftir
að hafa bjargað drengnum. „Ég hélt
að við myndum rífa Þorstein úr
axlarliðnum við að ná honum upp, svo
mikil voru átökin. Sjálfur var ég gjör-
samlega þjakaður eftir þessa raun,“
segir Finnur í Vikudegi.
„Ég er að verða
vanur þessu“
Strákurinn sem lenti í kviksyndinu
veiktist af heilahimnubólgu þriggja ára
„ALLT er þá þrennt er, vonandi,“
segir Kristjana Skúladóttir, móðir
Núma, við Morgunblaðið, en eins og
greint er frá hér við hliðina var
hann hætt kominn úr heilahimnu-
bólgu þriggja ára og festi síðan
hálsfesti á botni heits potts á Spáni,
en náði að losa sig. Á myndinni er
Númi, til hægri, ásamt Einari Sig-
urðssyni vini sínum.
Morgunblaðið/Skapti Hallgrímsson
Allt þá þrennt er
Eftir Kristin Benediktsson
Reykjanes | Lítill skógarþrastar-
ungi flaug óvænt inn um opinn brú-
arglugga á frystitogaranum Baldvini
Njálssyni GK 400 úr Garðinum í
fyrrakvöld þar sem hann var á karfa-
veiðum 90 mílur suðvestur af
Reykjanesi. Rok og rigning hafði
einkennt síðasta sólarhring svo ung-
inn hefur brugðið á það ráð að leita
skjóls á fluginu til vetrarstöðvanna.
Skipstjóranum, Þorsteini Eyjólfs-
syni, og hans mönnum gekk illa að
fanga gestinn sem enn var mjög
sprækur eftir langt og erfitt flug.
Reynt var að ná honum og setja í
kassa en þær tilraunir mistókust.
Eftir að Þorsteinn ákvað að leyfa
fuglinum að vera í friði gerði hann
sig heimakominn og hreiðraði um sig
á öxl hans í þakklætisskyni. Einnig
hafði hann mikinn áhuga á plottern-
um og höfuðlínumælinum sem lýsti
upp brúna í myrkrinu með litabrigð-
um miklum.
Lítið fer fyrir karfaveiðunum hjá
togurunum í brælunni en aflinn næg-
ir þó til að halda uppi lágmarks
vinnslu.
Óvæntur gestur leitar
skjóls í frystitogara
Morgunblaðið/Kristinn Benediktsson
Vinur í raun Þorsteinn Eyjólfsson skipstjóri skaut skjólshúsi yfir þrast-
arungann í brú Baldvins Njálssonar GK og hlaut traust hans að launum.
Keflavík | Tólf sóttu um embætti
sýslumannsins í Keflavík. Starfið
var auglýst eftir að Jón Eysteinsson
sýslumaður ákvað að láta af störf-
um. Hann hættir 1. október. Um-
sóknarfrestur var til 22. september.
Þeir sem sóttu um eru, að því er
fram kemur í fréttatilkynningu:
Árni H. Björnsson, deildarstjóri og
löglærður fulltrúi hjá sýslumann-
inum í Keflavík; Ásgeir Eiríksson,
löglærður fulltrúi og staðgengill
sýslumanns hjá sýslumanninum í
Keflavík; Benedikt Ólafsson hæsta-
réttarlögmaður; Bogi Hjálmtýsson,
löglærður fulltrúi og staðgengill
sýslumanns hjá sýslumanninum í
Hafnarfirði; Guðgeir Eyjólfsson,
sýslumaður á Siglufirði; Guðmund-
ur Kristjánsson hæstaréttarlög-
maður; Halldór Frímannsson hér-
aðsdómslögmaður; Margrét María
Sigurðardóttir, framkvæmdastjóri
Jafnréttisstofu; Ragna Gestsdóttir,
lögfræðingur hjá Íbúðalánasjóði;
Þórólfur Halldórsson, sýslumaður á
Patreksfirði; Þuríður Árnadóttir,
deildarstjóri og löglærður fulltrúi
hjá sýslumanninum í Reykjavík, og
Úlfar Lúðvíksson, skrifstofustjóri
og staðgengill sýslumanns hjá
sýslumanninum í Reykjavík.
Tólf sækja
um embætti
sýslumanns
SUÐURNES
Terra Nova býður frábært tilboð til Vilnius í Litháen 11. október.
Vilnius er ein fegursta borg Evrópu, þar sem rómantísk stemning lið-
inna tíma hefur varðveist og
einstakt er að njóta dulúðar
fyrri alda. Borgin býður allt sem
ferðafólk leitar eftir í borgar-
ferð; fagrar byggingar, litríkt
mannlíf og menning, glæsilegir
gististaðir og verslanir í úrvali.
Frábær tilboð á gistingu á 3 og
5 stjörnu gistingu og spenn-
andi kynnisferðir í
boði. Ath. millilent
er á Egilsstöðum.
frá kr. 49.990
Netverð á mann, m.v. 2 í herbergi 11. okt.
í 4 nætur á Hotel Narutis *****
með morgunmat.
frá kr. 39.990
Netverð á mann, m.v. 2 í herbergi 11. okt.
í 4 nætur á Hotel Europa City ***
með morgunmat.
Vilnius
11. október
Verð frá kr. 39.990
Glæsileg 4 nátta helgarferð
Skógarhlíð 18 – 105 Reykjavík – sími 591 9000
Akureyri – sími 461 1099 • Hafnarfirði – sími 510 9500
www.terranova.is
- SPENNANDI VALKOSTUR
** Fimm stjörnu tilboð **