Menntamál - 01.12.1942, Blaðsíða 17

MENNTAMÁL
79
í myndir frá Norðurlandi, Suðurlandi, af þjóðháttum og
menningu o. s. frv. Af erlendum myndum gæti hvert land
verið sér, listaverk sér o. s. frv. — Þá mætti safna glöggum
og fróðlegum myndum af stöðum, mönnum, listaverkum,
byggingum, dýrum o. m. fl., sem klipptar væru úr blöðum,
ferðaskrifstofupésum o. fl. þh. Þyrfti þá að líma slíkar
myndir upp á „karton“-spjöld (öll jafnstór, t. d. 12X15
cm.), en þau má fá í prentsmiðjum, skorin í hæfilega
stærð. Myndirnar þyrfti svo að flokka og geyma í skúffu,
á sama hátt og lýst er um bréfspjöldin.
Þá er mjög mikils virði, að hafa í skúffu í bókaskápnum
spjaldskrá til þess að finna eftir hvers konar fróðleik í
bókasafni stofunnar. Er spjöldunum raðað í stafrófsröð
eftir leitarorðum, sem rituð eru skýrt á þau í hornið efst
til vinstri. Nú er t. d. Kína leitarorð á spjaldi. Er þá skráð
á það spjald, í hvaða bókum og á hvaða blaðsíðum þeirra
er að finna fróðleik um Kína, ferðasögur eða myndir það-
an o. s. frv. Það er þroskandi og ágæt skólavinna, að búa
til slíka skrá, og mætti láta duglega nemendur vinna að
því í ígripum á löngum tíma.
Þá ætti að vera dálítið náttúrugripasafn í hverri kennslu-
stofu. Er bæði söfnun gripanna, og svo notkun þeirra í
kennslustundum, stórum mikilsvert þroskameðal. En hér
yrði of langt mál, að fara út í söfnun, meðferð og geymslu
náttúrugripanna.
Ræða mætti um fleiri söfn í skólastofunni, til gagns og
skemmtunar. En hér skal staðar numið. Verður ef til vill
tóm til þess síðar, að ræða það efni rækilega.
Ef nægir skápar eru við norðurvegg kennslustofunnar,
þarf þá enga við austurvegg. Væri hann þá auður, og hægt
að hengja þar myndir og kort til prýði, eins og rætt er um
hér að framan.
í suðausturhorni stofunnar, milli horns og austasta
glugga, gæti komið sér vel að hafa dálítið smíðaborð, með
áhöldum og efni til aðgjörða og smárra smíða. Undir borð-