Frjáls verslun - 01.09.2007, Qupperneq 72

„Jólaboð tengdafjölskyldunnar eru oft mjög
lífleg og er eitt jólaboð öðrum minnisstæðara,“
segir Guðný Rósa Þorvarðardóttir, fram-
kvæmdastjóri Parlogis. „Þannig er, að
tengdafaðir minn hefur undanfarin 20 ár
leikið jólasvein í okkar árlegu jólaboðum.
Hann gerir það á mjög sannfærandi hátt,
enda með náttúrulega hvítt og úfið skegg
og mikla leiklistarhæfileika. Ein jólin ákvað
mágur minn hins vegar að leysa hann af og
reyna sig í hlutverkinu. Sólmundur er vanur
að taka hlutverk sitt alvarlega og ákvað því
að koma inn um glugga á 2. hæð eins og
alvöru jólasveinn. Við fjölskyldan sátum inni
í stofu þegar við heyrðum háreysti og dynki
inni í einu herberginu og þutum af stað til
þess að athuga hvað væri á ferðinni. Þá var
jólasveinninn kominn þar inn um gluggann
með poka á bakinu, emjandi og skrækjandi, og
byrjaði að dreifa eplum til barnanna af miklum
móð. Síðan reif hann með sér einn meðlim
fjölskyldunnar og sagðist þurfa að fá smávegis
aðstoð við dreifinguna í næstu húsum.
Börnin horfðu á þennan furðulega
jólasvein hverfa jafn skjótt og hann
kom, en nú fór hann út um aðaldyrnar
og með einn úr fjölskyldunni með
sér. Þau jöfnuðu sig hins vegar fljótt
og fannst þetta ferlega fyndinn og
fjörugur jólasveinn. Skýringin á þessu
athæfi sveinka var hins vegar sú að
þegar hann tróð sér inn um gluggann
vildi ekki betur til en svo, að þungur
glugginn skelltist á hendurnar á honum
og þar af leiðandi skemmti hann börnunum
bæði puttabrotinn og í hálfgerðu losti. Hinn
nýbakaði jólasveinn endaði kvöldið sem sagt á
Slysavarðstofunni og er það örugglega í fyrsta
og síðasta skipti sem einhver af bræðrunum
fer í jólasveinabúning afans.“
Guðný Rósa Þorvarðardóttir,
framkvæmdastjóri Parlogis:
Puttabrotinn
jólasveinn
Jólin koma
Guðný Rósa Þorvarðardóttir.
72 F R J Á L S V E R S L U N • 9 . T B L . 2 0 0 7