Tímarit Máls og menningar - 01.09.1944, Page 16

110
TÍMARIT MÁLS OG MENNINGAR
fá verkefni að vinna. Stofnun landgræðslusjóðs, bygging þjóð-
minjasafns, sögusýningin eru fyrstu táknin. A þingum, sem háð hafa
verið í sambandi við lýðveldisstofnunina, lýsir sér áhugi og bjart-
sýni meiri en dæmi eru til áður, og meiri samhugur manna af öll-
um stéttum og flokkum. Konurnar eru komnar af stað, ætla sér
stærri hlut en áður í þjóðarmálefnum, stofna til landssamtaka á
nýjum grundvelli. Hver félagsheild rís af annarri og setur sér aukin
verkefni.
ísland er í vakningarhug. Hver einstaklingur finnur til ábyrgðar
sinnar í sköpun nýrra tíma á íslandi. Þjóðin krefst starfs og athafna
á hverju sviði. Af þeim krafti, einingarhug og framtaksvilja, sem
nú er hjá þjóðinni, geta afrek vaxið, ef íslendingar verða samtaka
um að beita viturlega orku sinni og hafa gæfu með sér.
Þingvöllum, 4.—7. júlí.