Dagblaðið Vísir - DV - 20.04.2012, Síða 54

Ungar stjörnUr
á EvrópUMótinU
n EM í fótbolta fer fram í Úkraínu og Póllandi n Hérna eru átta sem gætu slegið í gegn
54 Sport 20.–22. apríl 2012 Helgarblað
Christian Eriksen
Þjóðerni: Danskur Aldur: 20 ára Félagslið: Ajax Staða: Sóknarsinn-
aður miðjumaður Landsleikir/mörk: 21/2
n Þrátt fyrir að vera aðeins tvítugur hefur Daninn
Christian Eriksen lengi verið á milli tannanna á
fótboltaspekingum. Það er ekki að ástæðulausu því
hæfileikarnir sem búa í þessum pilti eru miklir. Hann
varð í raun fyrir því óláni fyrir tveimur árum að vera
kallaður hinn nýi Michael Laudrup en það er stimpill
sem enginn ungur leikmaður í Danmörku ætti að
þurfa að bera. Það ber þó vitni um hversu mikils
hann er metinn. Eriksen getur lagt upp mörk og er
farinn að skora meira. Hann verður algjör lykilmaður
hjá Dönum í sumar.„ Hann er hæfileikaríkasti leikmaður sem
ég hef séð koma frá Danmörku síðan Michael
Laudrup.“ – Preben Elkjær, fyrrverandi landsliðs-
maður Dana.
Mario Gotze
Þjóðerni: Þýskur Aldur: 19 ára Félagslið: Dortmund
Staða: Sóknarsinnaður miðjumaður Landsleikir/mörk: 12/2
n Á síðasta tímabili fór Mario Gotze gjörsamlega
á kostum með Dortmund þegar liðið varð þýskur
meistari. Hann vann sér inn sæti í byrjunarliði þýska
landsliðsins og hefur verið kallaður undrabarn. Á
þessu tímabili hefur hann verið mikið meiddur og
ekki getað hjálpað sínu liði undanfarna mánuði.
Aftur á móti er hann að komast á ról núna og var
í fyrsta skipti á bekknum hjá Dortmund í langan
tíma þegar liðið lagði Bayern um daginn. Gotze er
marksækinn og með góðan fótboltaheila. Frábær
leikmaður sem ætti að komast auðveldlega í hópinn
þrátt fyrir að hafa lítið sem ekkert spilað.„ Það er hrein unun að horfa á strákinn. Honum
finnst einfaldlega svo gaman að spila fótbolta.“
– Jürgen Klinsmann, fyrrverandi landsliðsmaður og
landsliðsþjálfari Þýskalands.
Kevin Strootman
Þjóðerni: Hollenskur Aldur: 22 ára Félagslið: PSV Eindhoven
Staða: Miðjumaður Landsleikir/mörk: 10/1
n Hinn 21 árs gamli Strootman er lykilmaður í liði
PSV Eindhoven í heimalandinu og allra yngsti
leikmaður hollenska landsliðsins. Þrátt fyrir ungan
aldur er hann í miklu uppáhaldi hjá Bert van Marwijk,
þjálfara Hollands. Frægðarsól hans hefur risið hratt
síðastliðin misseri og er hann orðinn meira og minna
fastamaður í liði þeirra appelsínugulu. Þá skoraði
hann sitt fyrsta landsliðsmark gegn Finnlandi á
síðasta ári. Hann er með mikið sjálfstraust, lætur
finna fyrir sér á vellinum og sér um varnarvinnuna
fyrir hina sóknarsinnuðu Van der Vaart og Wesley
Sneijder.„ Þessi strákur getur farið alla leið á toppinn.“
– Bert van Marwijk, landsliðsþjálfari Hollands.
Phil Jones
Þjóðerni: Enskur Aldur: 20 ára Félagslið: Manchester United
Staða: Varnarmaður Landsleikir/mörk: 4/0
n Phil Jones hefur kynnt sig rækilega fyrir landanum
í allan vetur með frækilegri frammistöðu sinni
hjá Manchester United. Það er búist við miklu af
þessum nautsterka strák sem getur spilað bakvörð,
miðvörð og djúpan miðjumann. Jones getur hlaupið
ógnarhratt með boltann þrátt fyrir að líta út eins
og kraftajötunn og hefur ótrúlega tækni miðað við
þennan mikla skrokk. Fabio Capello var byrjaður að
nota hann sem miðjumann í enska landsliðinu en
miðvarðarstaðan er framtíðin hjá Jones. Hann er
talinn næsti langtímafyrirliði enska landsliðsins.„ Phil Jones er framtíðarfyrirliði Manchester
United.“ – Sir Alex Ferguson, knattspyrnustjóri
Manchester United.
Robert Lewandowski
Þjóðerni: Pólskur Aldur: 23 ára Félagslið: Dortmund
Staða: Framherji Landsleikir/mörk:40/13
n Annar maður hjá Dortmund, framherjinn
Lewandowski, er maður sem allir framherjar þurfa
að varast. Þegar ljóst var að Lucas Barrios yrði ekki
með Dortmund í upphafi tímabils fékk Lewandowski
traustið og hefur ekki litið til baka síðan. Hann er
ótrúlega markheppinn og algjört rándýr í teignum.
Ef Pólverjar ætla að gera einhverja hluti á heimavelli
verður Lewandowski að skora mörk og það er pressa
á honum að gera slíkt. Hann hefur verið hreint
magnaður í þýsku deildinni í allan vetur.„ Hann er ótrúlega öflugur í teignum og ég
ber fullt traust til hans.“ – Jurgen Klopp, þjálfari
Borussia Dortmund.
Yann M’Vila
Þjóðerni: Franskur Aldur: 21 árs Félagslið: Stade Rennes
Staða: Varnarsinnaður miðjumaður Landsleikir/mörk: 18/1
n M’Vila verður einn af þeim leikmönnum sem hvað
mest spennandi verður að sjá á EM. Hann spilar sem
djúpur miðjumaður og hefur vakið mikla athygli í
frönsku deildinni þar sem hann spilar með Rennes.
Hann var orðinn fyrirliði liðsins aðeins 18 ára. M’Vila
er ekki bara í því að brjóta niður sóknir andstæðing-
anna heldur býr hann yfir gríðarlegri sendingargetu
og er mjög yfirvegaður. Framtíðin er björt hjá M’Vila
sem gæti verið vaðandi í tilboðum frá stórum liðum
standi hann undir væntingum á EM.„ M’Vila er ferska blóðið sem franska landsliðið
vantaði.“ – Fyrirsögn í France Football eftir hans
fyrsta landsleik.
Alan Dzagoev
Þjóðerni: Rússneskur Aldur: 21 árs Félagslið: CSKA Moskva
Staða: Framherji Landsleikir/mörk: 18/4
n Eins og svo margir rússneskir framherjar er besti
eiginleiki Dzagoev hversu duglegur hann er. Dzagoev
hættir aldrei að hlaupa en hann býr þó einnig yfir
miklum hæfileikum. Hann er afskaplega góður að
lesa leikinn og fljótur að aðlagast öllum aðstæðum.
Dzagoev var fljótur að vinna sig upp goggunarröðina
hjá rússneska landsliðinu en Guus Hiddink hafði
mikið álit á honum. Það hefur aðeins vantað upp á
markaskorunina en fari nokkur mörk að detta gæti
Dzagoev beðið björt framtíð.„ Hann er með ótrúlegan leikskilning
fyrir svona ungan leikmann.“ – Guus Hiddink,
fyrrverandi landsliðsþjálfari Rússlands.
Thiago Alcantara
Þjóðerni: Spænskur Aldur: 21 árs Félagslið: Barcelona
Staða: Miðjumaður Landsleikir/mörk: 3/0
n Eflaust er ekki til verra landslið að spila fyrir en
Spánn þegar menn eru ungir og efnilegir miðjumenn.
Það er ekki eins og menn séu að fá mörg tækifæri á
undan snillingum á borð við Xavi, Iniesta, Fabregas,
Alonso og Busquets. En Thiago er einstakur eins
og sást á EM U21 árs landsliða síðasta sumar. Hann
býður upp á enn meiri breidd á þessari annars vel
mönnuðu miðju. Sendingargeta hans er í Barcelona-
klassa, yfirvegunin algjör og þá getur hann einnig
skorað.„ Hann getur orðið næsti Xavi.“ – Pep Guardiola,
þjálfari Barcelona.