Glóðafeykir - 01.12.1987, Side 15

GLÓÐAFEYKIR
15
umsjónaraðila með þeirri uppbyggingu til að tryggja, að þau hús sem
byggð yrðu, uppfylltu þær kröfur, sem útflutningsmarkaðirnir gerðu
til slíkra húsa. Menn gerðu sér ennfremur ljóst strax í upphafi, að
fjármagn þyrfti að tryggja til að þessi uppbygging yrði möguleg innan
þeirra tímatakmarkana, sem nefndin setti. Voru því jafnframt gerðar
tillögur um fjármagnsútvegun til Stofnlánadeildar landbúnaðarins,
svo hún gæti veitt lán til bygginganna. Einnig var gerð tillaga um
stofnun sjóðs, er styrkja myndi byggingu húsanna með óendurkræfu
framlagi. Ástæðan fyrir því var sú, að menn gerðu sér ljóst, að hús þessi
yrðu það dýr í byggingu, að ekki væri möguleiki á að
rekstrarkostnaður þeirra færi óskertur inn í afurðaverðið, án þess að
hafa alvarlegar afleiðingar á markaðsstöðu afurðanna. Einnig var
ljóst, að bændur gætu ekki tekið þennan kostnað á sig í lækkuðu
skilaverði svo nokkru næmi.
Skagfirskir bændur fylgdust að sjálfsögðu vandlega með þessari
þróun, og það mun hafa verið á aðalfundi Akradeildar árið 1967, sem
tillaga kemur fram til aðalfundar KS um að félagið hæfi undirbúning
að stækkun sláturhússins. Þessi tillaga var rædd, og töldu menn rétt að
fylgjast vandlega með framvindu mála, og hvernig sláturhúsa-
íætluninni reiddi af. Árin 1968 og 1969 voru norðlenskum bændum
•'.far erfið. Hafís fyllti voga og víkur, kal og grasleysi var gífurlegt
vandamál og fjárhagsstaða bænda og kaupfélags því með lakasta
móti. Var því beðið átekta um sinn.
Endurbygging hefst
Á stjórnarfundi í árslok 1971 var tekin ákvörðun um að hefja á
næsta ári endurbyggingu sláturhússins á Eyri skv. tillöguteikningum,
er þá lágu fyrir. Voru þær í samræmi við fyrrnefnda sláturhúsaáætlun,
sem yfirvöld búnaðarmála höfðu gert tillögu um og Alþingi samþykkt.
Var áætluninni eins og fyrr er tæpt á, gert ráð fyrir að Stofnlánadeild
landbúnaðarins veitti hagstæð langtímalán sem næmu allt að 50%
byggingakostnaðar. Framleiðnisjóður landbúnaðarins átti svo að
veita til viðbótar óendurkræft framlag sem næmi allt að 33%
byggingarkostnaðar. Þótti mönnum sýnt, að kaupfélaginu myndi
takast að afla þeirra 17% sem á vantaði.
Snemma sumars árið 1972 hófst svo endurbyggingin og um haustið
var í síðasta sinn slátrað eftir gamla laginu. Varð þá að gera ýmsar
skammtímaráðstafanir svo hægt væri að lóga í hálfbyggðu húsinu. Að
lokinni haustslátrun var tekið til óspilltra málanna við framhald
byggingarinnar, og tókst með miklu harðfylgi að ljúka henni í tæka tíð
fyrir haustslátrun 1973. Þurfti einungis að fresta slátrun um örfáa daga