Glóðafeykir - 01.12.1987, Blaðsíða 70

70
GLÓÐAFEYKIR
Hróarsdal, þá á Ríp og eitt ár í Vík í Staðarhreppi, en frá 1898 á
Kárastöðum og átti þar heim til æviloka. Ólafur dó árið 1921, ári síðar
lét Sigurbjörg búið í hendur sonum sínum ,,og var hjá þeim ráðskona,
lengst hjá Sigurði”. Eftir lát móður sinnar á
ofanverðu ári 1942 leigði Sigurður jörðina og
sinnti eigi búsýslu síðan, en fékkst æ meir við
fræðimennsku og ritstörf ýmiss konar. Voru
þeir þrír bræður og allir ókvæntir: Sigurður
elztur, þá Jónas, átti lengi heima í Stafholti
syðra og dó þar hálffimmtugur og Einar
yngstur, heima á Kárastöðum og dó þar
innan við þrítugsaldur.
Sigurður á Kárastöðum lauk búfræðiprófi
frá Hólaskóla árið 1915. Hann kom víðaviðí
félagsmálum sveitar og sýslu. Hann var um
hríð endurskoðandi sveitarsjóðsreikninga
Rípurhrepps, sat nokkur ár í skattanefnd,
átti hlut að stofnun hrossaræktarfélags í
hreppnum svo og nautgriparæktarfélags og
var um skeið eftirlitsmaður nautgriparæktarfélaga í fjórum hreppum
sýslunnar. Þó var Sigurði sérlega ósýnt um allar skepnur. En hann átti
traust manna fyrir grandvarleika sakir, skyldurækni og ósérplægni.
Sigurður var markaumsjónarmaður í Skagafjarðarsýslu, sá um útgáfu
markaskrár og tók við því starfi af Jónasi afa sínum í Hróarsdal; mun
hann hafa búið 13 markaskrár til prentunar. Sigurður átti hlut að
stofnun lestrarfélags 1916, var form. ungmennafél. Hegra 1914- 1933,
átti sæti í stjórn Ungmennasamb. Skagafj. 1917 - 1941, lengstum ritari
og féhirðir og kjörinn heiðursfélagi Ungmennasambands 1960. Form.
sóknarn. Rípursóknar 1938 - 1962. Hann var áhugamaður um
skógrækt og skrúðgarða, kom upp skógarlundi heima hjá sér á
Kárastöðum, vann að plöntun trjáa og snyrtingu skrúðgarða á
Sauðárkróki og víðar í héraðinu, einnig í Reykjavík. I 6 sumur var
hann safnvörður við byggðasafnið í Glaumbæ, skrásetti muni safnsins
og merkti.
Sigurður á Kárastöðum var mjög hneigður til fræðistarfa og hvers
konar sögurýni. Hann viðaði að sér handritum og skjalagögnum
fornum var sískrifandi og löngum við týruljós og illa aðstöðu í
Kárastaðabænum gamla, lét eftir sig mikið efni í handriti. Hann var
einn af stofnendum Sögufél. Skagfírðinga 1936, átti sæti í útgáfustjórn
félagsins sem og í útgáfunefnd Skagfirzkra æviskráa og ritaði marga
þætti, er þar birtust. Hann átti drjúgan hlut að samningu hins merka
rits Jarða- og búendatal í Skagafjarðarsýslu 1781 - 1958. Hann var
Sigurður
Ólafsson