Glóðafeykir - 01.12.1987, Blaðsíða 19

GLÓÐAFEYKIR
19
Lokaorð
Innanlandsmarkaðurinn hefur lengst af verið mikilvægasti
markaður hins íslenska landbúnaðar. Það hefur því valdið ómældum
erfiðleikum, að sala landbúnaðarvara á innanlandsmarkaði hefur
verið að dragast saman á íbúa frá því um 1970. Má ætla, að þær
verðsveiflur, sem hér á undan er drepið á, og leitt hafa af
geðþóttaákvörðunum misviturra stjórnmálamanna, ásamt með
auknum áróðri fyrir neyslu innfluttrar gerfifæðu séu einn stærsti
þátturinn í því efni. Ekki er enn séð fyrr endann á þeirri þróun, og er
mál margra, að taka þurfi alla sauðfjárræktarstefnuna til
endurskoðunar til að mæta betur kröfum markaðarins.
Aðgerðir hófust árið 1980 með löggjöf til þess að draga
landbúnaðarframleiðsluna saman svo hún nemi innanlandsneyslu.
Þessar aðgerðir, ásamt með bústofnssamdrætti er leitt hefur bæði af
niðurskurði vegna búfjársjúkdóma, svo og erfiðu árferði árin 1979,
1981 og 1983, hafa leitt til þess, að sláturfjárfjöldi hefur dregist
verulega saman. Haustið 1978 var slátrað á sláturhúsi KS um 65
þúsundum fjár, en núna í haust (1986) er gert ráð fyrir að slátrun sé
nálægt 45 þúsund fjár, og er þó þar innifalinn nokkur niðurskurður
vegna riðuveiki. Má því búast við enn minni slátrun næsta haust vegna
samdráttar bústofns. Það er því augljóst hverjum manni, að nýting
hússins er með þessu móti orðin alltof léleg. Þarf því að vinda bráðan
bug að því að bregðast við þessari þróun á raunhæfan hátt, þannig að
allir megi vel við una. En þann kafla í sláturhúsasögu KS munu aðrir
skrifa, og læt ég því þessu spjalli lokið.
Skrifað í september og október 1986
Guðbr. Þorkell Guðbrandsson