Tímarit hjúkrunarfræðinga - 01.09.2009, Side 19

Tímarit hjúkrunarfræ›inga – 4. tbl. 85. árg. 2009 15
Í inngangi kemur fram að bókin byggist
á vinnu höfundar með toppstjórnendum
og hópum tengdum þeim en Lencioni er
talinn einn af helstu sérfræðingum heims
í þjálfun stjórnendahópa. Hann ítrekar
að hugmyndafræðin, sem bókin byggist
á, nýtist öllum þeim sem taka þátt í
hópstarfi, hvort heldur sem er teymum,
rannsókna- og verkefnahópum, nefndum
eða stjórnum.
Óhætt er að fullyrða að hópvinna sé
algeng í starfi okkar hjúkrunarfræðinga.
Líklega svo algeng að við leiðum ekki
lengur hugann að þeim þáttum sem hafa
áhrif á starfið í hópnum og árangur þess,
þar með talið hegðun eða framkomu
okkar sjálfra. Höfundur bókarinnar
heldur því fram að árangursrík hópvinna
sé grundvöllur velgengni fyrirtækja og
stofnana. Hann segir enn fremur að
árangursrík hópvinna sé í reynd afar
sjaldgæf en það sé bæði mögulegt og í
raun einfalt að byggja upp sterka hópa
sem skila árangri. Það sé hins vegar um
leið sársaukafullt og krefjandi.
Brestirnir, sem titill bókarinnar vísar til,
eru: Skortur á trúnaði og trausti, hræðsla
við ágreining innan hópsins, skortur á
hollustu við hópinn og ákvarðanir hans,
að taka ekki ábyrgð og ónóg áhersla
hópmeðlima á sameiginlegan árangur.
Bókinni er skipt í tvo hluta. Fyrri hlutinn
er dæmisaga þar sem fylgst er með
nýráðnum leiðtoga hóps sem átt hefur
í vandræðum og hvernig hann ásamt
meðlimum hópsins nær að byggja
upp virkan, starfhæfan hóp. Lýst er
aðstæðum, persónum og leikendum og
gangi mála við uppbyggingu hópsins.
Leiðtoginn (57 ára gömul kona) er
sannfærður um að með góðum hópi
muni árangur ekki láta á sér standa.
Hann er því tilbúinn til þess að gera
það sem gera þarf til þess að ná því
marki þó erfitt sé og mótstaðan vakni.
Brestirnir fimm, sem fléttaðir eru inn í
framvindu sögunnar, eru teknir fyrir einn
af öðrum, birtingarmynd þeirra skoðuð,
vangaveltur og viðbrögð leiðtogans og
hópsins kynnt.
Í síðari hluta bókarinnar er líkanið, sem
sagan byggist á, útskýrt, þættir sem
einkenna starfhæfa og óstarfhæfa hópa
dregnir fram sem og aðgerðir til að
yfirvinna brestina. Auk þess er þar að
finna spurningalista sem lesendur geta
nýtt sér til að meta starfhæfni hópa sem
þeir tilheyra.
Bókin er auðveld yfirlestrar og fljótlesin.
Sagan er einföld en grípandi og
samskiptin í hópnum ljóslifandi. Við lestur
bókarinnar þekkir maður sjálfan sig og
aðra í hliðstæðum aðstæðum. Þessi bók
er ekki alveg ný af nálinni en stendur
fyrir sínu þrátt fyrir það. Hún hefur verið
á metsölulista Wall Street Journal frá
2004. Þessi bók og fleiri bækur Lencioni
eru meðal annars fáanlegar í bókabúðinni
Skuld og Bóksölu stúdenta. Hægt er að
lesa meira um Lencioni og ritverk hans á
www.tablegroup.com/pat/.
Hrund Sch. Thorsteinsson er sviðsstjóri
á kennslu- og fræðasviði LSH og lektor
við hjúkrunarfræðideild Háskóla Íslands.
Í erindi á Vordegi deildarstjóra á LSH í maí sl. fjallaði Dr. Connie Delaney, prófessor
við hjúkrunarfræðideild HÍ og skólastjóri hjúkrunarfræðideildar Háskólans í
Minnesota, um leiðtogahlutverkið og mikilvægi samvinnu á breytingatímum. Hún
studdist meðal annars við bók Lencioni sem hér er til kynningar. Eftir að hafa
kynnt mér bókina betur tel ég hana eiga erindi við hjúkrunarfræðinga, hvaða
starfi sem þeir gegna.
Hrund Sch. Thorsteinsson, hrundsch@landspitali.is
The five dysfunctions of a team: A
leadership fable. Höfundur: Patrick
Lencioni. Útgefandi: Jossey-Bass,
San Fransisco, 2002. ISBN: 0-7879-
6075-6. Bókin er 229 bls.
BÓKARKYNNING
FIMM BRESTIR HÓPVINNU