Tölvumál - 01.02.2008, Blaðsíða 23

T Ö L V U M Á L | 2 3
3f er félag um upplýsingatækni og skólastarf, er það opið öllum sem áhuga
hafa á þeim málum. Félagið á sér nokkra sögu en upphaflega stóðu effin
þrjú fyrir Félag forritara fræðslukerfisins en það var áður nafn þess. Eins og
núverandi nafn félagsins ber með sér þá er það vettvangur þeirra sem með
einum eða öðrum hætti koma að upplýsingatækni í menntun. Í félaginu eru
því kerfisstjórar, þeir sem forrita kennsluforrit, kennarar af öllum skólastigum
frá leikskóla til háskóla, skólastjórnendur og margir fleiri.

Eitt af markmiðum stjórnar félagsins er að efla starfsemi þess m.a. með
því að halda fræðslufundi, námskeið og ráðstefnur. Frá 1999 til 2005
hélt menntamálaráðuneytið árlega ráðstefnu, UT, þar sem fjallað var um
upplýsingatækni í skólastarfi. Þessar ráðstefnur eru nú aflagðar, í bili að
minnsta kosti og því hefur myndast ákveðin eyða. Það hefur því skort vett­
vang fyrir þá sem vinna að upplýsingatæknimálum og menntun að hittast og
skiptast á reynslu. Stjórn 3f hefur áhuga á að bæta úr því og stefnir að árlegu
ráðstefnuhaldi. Haustið 2005 stóð félagið fyrir tveggja daga ráð stefnu um
fjarnám í Fjölbrautaskóla Suðurnesja og nú í byrjun nóvember 2007 var svo
haldin ráðstefna í Verzlunarskóla Íslands undir heitinu „Vörður vísa veginn“.
Vörður vísa veginn
Heiti ráðstefnunar vísar m.a. til þess að í kennslu og í notkun upplýsingatækni
eru margar leiðir, það er þó gott að hafa viðmið eða hjálp til að styðjast við.
Vörðurnar geta þannig t.d. verið þeir sem aðstoða kennara og nemendur í
notkun upplýsingatækni. Leitast var við að bjóða upp á metnaðarfulla dagskrá
á ráðstefnunni í Verzlunarskólanum. Þar fluttu um það bil 20 fyrirlesarar
erindi en heildarfjöldi þátttakenda var um 100 manns. Góður rómur var
gerður að ráðstefnunni og gestir virtust almennt vera mjög sáttir. Einn af aðal
fyrirlesurum ráðstefnunnar, Kolbrún Svala Hjaltadóttir, fjallaði einmitt um
rannsókn sem hún hefur gert á áhrifum þess að veita kennurum faglegan
stuðning í notkun á upplýsingatækni. Niðurstöður hennar sýna að slíkur
stuðningur hefur úrslitaþýðingu varðandi það að kennarar nýti sér tæknina
og möguleika hennar. Sigurður Fjalar Jónsson var á svipuðum slóðum í sínu
erindi þar sem hann talaði um innleiðingu á upplýsingatækni í skólastarf.
Það eru frumkvöðlar í skólakerfinu sem taka upp nýja tækni og aðferðir en
erfiðara reynist síðan að koma reynslu og þekkingu þeirri til annarra kennara.
Það þarf að koma til þjálfun, hvatning, námsefni og fleira sem segja má að
séu nokkurs konar vörður fyrir kennara við innleiðingu á upplýsingatækni.
Salvör Gissurardóttir flutti þriðja aðalerindið en þar fjallaði hún um Second
Live og möguleika þess sýndarveruleika í námi og kennslu. Salvör hefur
sannarlega hlaðið vörður og vísað kennurum leiðina í notkun á nýrri tækni
í gegnum tíðina.

Áður en eiginleg dagskrá 3f hófst voru kynntar niðurstöður könnunar á
notkun barna og unglinga á netinu og nýmiðlum. Menntamálaráðherra flutti
inngang að þeirri kynningu en niðurstöðurnar eru fróðlegar og vert að skoða
þær á saft.is, vef um örugga netnotkun barna.

Tvær síðustu lotur ráðstefnunnar samanstóðu af þremur málstofum hvor. Í
hverri málstofu voru flutt þrjú stutt erindi. Umfjöllunarefni þeirra voru mjög
fjölbreytt, þau tengdust öllum skólastigum og snertu marga þætti skólastarfs
og upplýsingatækni. Svo einhver dæmi sé tekin þá má nefna umfjöllun um
þróunarverkefni á leikskóla, þýðingarvél, notkun alvarlegra leikja við kennslu,
upplýsingatækni í nýjum menntaskóla, endurmenntun kennara, fjarnám,
kerfisstjórnun í skólum og skólanet. Glærur og fleira frá ráðstefnunni má sjá
á vefnum 3f­radstefna.wikispaces.com.
Ráðstefnunni lauk svo með boði til Háskólans í Reykjavík þar sem ráð­
stefnugestir nutu góðra veitinga og skeggræddu málin.
Nýttum okkur opinn hugbúnað
Við skipulagningu ráðstefnunnar var ákveðið að nota ýmsa þá þjónustu
sem er í boði á netinu og nýtist jafnframt í skólastarfi. Undirbúningsnefnd
notaði Mindmeister og Google Docs við skipulagningu, settur var upp wiki­
ráðstefnuvefur, glærum var safnað á SlideShare og myndum á Tabblo. Þess
má einnig geta að félagið 3f er með nýjan vef, 3f.is, sem styðst við Joomla
vefumsjónarkerfið sem er opinn hugbúnaður.

Félagið mun halda ótrautt áfram ráðstefnuhaldi og þakkar kærlega þeim sem
fluttu erindi og sóttu ráðstefnuna Vörður vísa veginn. Stór hópur félagsmanna
er ákaflega önnum kafið fólk, margir algjörlega ómissandi í skólum landsins
þar sem þeir gegna veigamiklu hlutverki við að aðstoða bæði kennara og
nemendur við notkun á upplýsingatækni.
og vörðurnar
3f
Björn Sigurðsson
vefstjóri Menntagáttar hjá HugAx
Salvör Gissurardóttir fjallaði um Second Live