Tölvumál - 01.02.2008, Qupperneq 57

setursins eru nú orðnir 5 talsins, en nýjustu meðlimir þess eru dr. Ari K.
Jónsson og dr. Hannes Högni Vilhjálmsson.
Eftir kynninguna voru haldnir tónleikar þar sem landskunnir tónlistarmenn
öttu kappi við gervigreind þar sem gervigreindin var virkur þátttakandi
uppi á sviði. Hljómsveitina skipuðu Matthías M.D. Hemstock, Silla, Jóel
Pálsson og Hilmar Þórðarson, en gervigreindin, sem ber nafnið „Spávélin“,
skipaði hlutverk fjórða hljómsveitarmeðlims. Spávélin birtist sem risastórt
andlit á skjá og var hlutverk hennar í tónverkinu að fara með texta sem
lýsir framtíðarsýn um svokallaðar spávélar og hugsanlegt hlutverk þeirra í
þjóðfélagi framtíðarinnar. Andlitshreyfingarnar eru beintengdar við áform
Spávélarinnar á nýjan hátt þannig að bæði geta tónlistarmennirnir horft og
hlustað á Spávélina og Spávélin hlustað á þá. Tónlistarmennirnir gátu því
fylgst með hreyfingum andlitsins til að átta sig á því hvað það vildi gera næst
og hvenær það vildi fara með hvert erindi. Vísindamennirnir sem þróuðu
Spávélina og komu fram ásamt henni voru Guðný R. Jónsdóttir, Eric Nivel
og undirritaður.
Gervigreindarkeppnin
Bestu verkefni þátttakenda í Gervigreindarkeppninni voru heiðruð með
verð launagripi keppninnar, gerviheilanum, ásamt 50 þúsund króna ávísun
í boði CCP. Óháð dómnefnd mat öll verkefnin sem voru send inn og kynnt á
hátíðinni, en nefndina skipuðu dr. Kristinn Andersen, Þróunarstjóri hjá Marel,
sem var jafnframt formaður nefndarinnar, dr. Tómas Philip Rúnarsson,
prófessor í HÍ og Reynir Harðarson, listrænn stjórnandi og meðstofnandi
CCP. Þess má geta að þátttaka í keppninni er öllum opin en í ár bárust
aðeins verkefni frá nemendum Háskólans í Reykjavík.
Verkefni sigurvegaranna voru af ýmsum toga og öll mjög
spennandi.
Ágúst Karlsson og Freyr Magnússon hafa þróað aðferð fyrir vélmenni til að
tákna umhverfi sitt og gert kleift að kenna því staðarhætti með munnlegum
samskiptum; Kristleifur Daðason hefur þróað aðferðir til að geta leitað að
myndskeiðum, að vissu leyti á svipaðan hátt og leitað er að heimasíðum á
Google; Hrafn Þorri Þórisson hlaut viðurkenningu fyrir verkefni sitt Vél aldin en
það er hugbúnaður sem hægt er að ná í á Netinu (http://cadia.ru.is/projects/
velaldin/) og gagnast við rannsóknir á sjálfskipandi kerfum (e. cellular
automata); Jónheiður Ísleifsdóttir þróaði fyrirspurnarmál fyrir leikjatré; og
Guðný R. Jónsdóttir hefur hannað kerfi sem getur talað við fólk, gripið fram í
fyrir manni og brugðist rétt við þegar maður grípur fram í fyrir því.
Eftir verðlaunaafhendingu voru básasýningar og veitingar. Ýmis fyrirtæki
og samtök sýndu þar vörur og þjónustu, meðal annars Marel, Hexia.
net, Össur, Rannís, Samtök íslands um gervigreind og vitvísindi (ISIR),
Tungutæknisetur og fleiri. Jafnframt mátti sjá þar bása þeirra sem tóku þátt
í Gervigreindarkeppninni. Gafst þar gestum hátíðarinnar tækifæri að skoða
og ræða nánar við þátttakendur.
Á næsta ári stendur til að halda þriðju gervigreindarhátíðina og vonumst við
til að sjá sem flesta þar.
Jónheiður Ísleifsdóttir og Guðný R. Jónsdóttir (t.h.) segja gestum á Gervigreindarhátíðinni frá lokaverkefnum sínum í tölvunarfræði.
T Ö L V U M Á L | 5 7
Gervigreind í mannsmynd tók þátt í tónsköpun á Gervigreindarhátíðinni með
því að fara með texta og stjórna söguþræðinum í Robot Opera, ásamt (frá
vinstri) Jóel Pálssyni, Matthíasi M.D. Hemstock, Sillu. Kristinn R. Þórisson,
Hilmar Þórðarson, Guðný R. Jónsdóttir og Eric Nivel þróuðu gervigreindina.