Tölvumál - 01.02.2008, Síða 27

T Ö L V U M Á L | 2 7
Þátttökufyrirtækin eru virk í nýsköpun og verja að meðaltali um 27% af
veltu sinni til rannsókna og þróunar. Þetta hlutfall hefur haldist nær óbreytt
síðastliðin þrjú ár. Árið 2006 hóf um helmingur fyrirtækjanna sölu á nýrri
vöru eða þjónustu.
Á hverju ári eru stjórnendur spurðir að því hvort fyrirtækin þeirra hafi sam­
einast öðrum fyrirtækjum og hvort fyrirtækin, eða starfsmenn þeirra, hafi
stofnað ný fyrirtæki á árinu. Fjöldi þeirra fyrirtækja sem hafa sameinast
öðrum fyrirtækjum hefur farið vaxandi, úr 3% árið 2005 í 10% á árinu
2007. Árið 2004 stofnuðu um 5% fyrirtækjanna, eða starfsfólk þeirra, ný
fyrirtæki en hlutfallið var orðið um 13% árið 2006.
Skortur á starfsfólki mesta ógnunin
Í rannsókninni eru stjórnendur fyrirtækjanna spurðir spurninga sem snúa
að mögulegum ógnunum við afkomu fyrirtækja þeirra. Árið 2005 töldu 23%
þátttakenda að skortur á hæfu starfsfólki hefði verið ógnun við afkomu
fyrirtækja þeirra árið áður (sjá mynd 3). Fyrr á árinu 2007 höfðu aftur á
móti 48% stjórnenda áhyggjur af skorti af starfsfólki, eða nær tvöfalt fleiri.
Um helmingur stjórnenda nýrra íslenskra tæknifyrirtækja líta því svo á að
skortur á hæfu starfsfólki sé mikil eða í meðallagi mikil ógn við afkomu.

MYND 3. Svör stjórnenda við spurningunni: „Var skortur á framboði á
hæfu starfsfólki mikil eða lítil ógnun við afkomu fyrirtækisins á síðasta ári
(2006)?“
Athyglisvert er að á árinu 2007 sögðu stjórnendur aftur á móti skort á
fjármagni og almennt efnahagsástand síður ógnun við afkomu fyrirtækja
þeirra en árin áður. Árið 2005 töldu 27% stjórnenda að ógnun árið áður
vegna efnahagsumhverfis hafi verið í meðallagi eða mikil, en árið 2007
töldu aðeins 17% stjórnenda að svo væri. Að sama skapi sögðu 33%
stjórnenda árið 2005 að skortur á fjármagni hefði skapað í meðallagi eða
mikla ógn við afkomu árið 2004. Þetta hlutfall var hinsvegar lægra, eða um
21%, árin 2006 og 2007 (sjá mynd 4).

MYND 4. Svör stjórnenda við spurningunni: „Var skortur á framboði á
fjármagni mikil eða lítil ógnun við afkomu fyrirtækisins á síðasta ári?“
Aðeins 7% fyrirtækjanna fá fjármagn frá hinu opinbera
Í rannsókninni eru stjórnendur spurðir hvort þeir hafi fengið fjármagn inn
í fyrirtækin árið áður og þá hvaðan það fjármagn hafi komið. Innan við
helmingur fyrirtækjanna (43%) fékk inn nýtt fjármagn á árinu 2006. Aðeins
um 7% fyrirtækjanna fengu einhvers konar fjárhagslegan stuðning frá hinu
opinbera. Um 12% fyrirtækjanna fengu fjármagn frá stofnendum og er þá
átt við stofnendur sem eru einstaklingar, og um 6% frá bönkum og eru þar
lán meðtalin. Mynd 5 sýnir dreifingu svara.

Rannsóknin nær til fyrirtækja
sem byggja starfsemi sína á
tæknisérþekkingu starfsfólks
Fjöldi starfa í hópi þátttökufyrirtækja
sem eru fimm ára og yngri hefur
tvöfaldast á tveimur árum