Tölvumál - 01.02.2008, Side 28

2 8 | T Ö L V U M Á L
MYND 5. Uppspretta þess fjármagns sem kom inn í fyrirtækin árið 2006.
Stjórnendur eru bjartsýnir
Á fyrrihluta ársins 2007 reyndist meirihluti stjórnenda bjartsýnn á næstu
framtíð þegar spurt var um viðhorf til gengis tæknifyrirtækja næstu misserin.
Einnig töldu um 76% fyrirtækjanna, á fyrri hluta ársins 2007, að þau myndu
skila hagnaði á árinu. Fjöldi þeirra fyrirtækja í rannsókninni sem gerir ráð
fyrir að skila hagnaði fer jafnframt vaxandi milli ára. Flestir stjórnendur
nýrra íslenskra tæknifyrirtækja líta þannig framtíðina björtum augum.
Að lokum
Ljóst er að umsvif nýrra íslenskra tæknifyrirtækja hafa aukist á síðustu
árum. Afkoma fyrirtækjanna fer almennt batnandi, heildarvelta þeirra hefur
aukist jafnt og þétt og bjartsýni ríkir meðal stjórnenda. Á sama tíma virðist
skortur á hæfu starfsfólki vera vaxandi vandi. Sá skortur stafar líklega af
aukinni eftirspurn eftir vörum og þjónustu fyrirtækjanna samfara harðnandi
samkeppni um starfsfólk í kjölfar þeirrar þenslu sem hefur átt sér stað í
efnahagslífinu.
Á hinn bóginn virðist sú ógn sem stjórnendur telja stafa af skorti á framboði
af fjármagni fara minnkandi. Sú breyting gæti endurspeglað betra gengi
fyrirtækja og þar með minni þörf á utanaðkomandi fjármagni. Jafnframt
virðast stjórnendur ekki telja almennt efnahagsumhverfi, þ.m.t. gengi
krónunnar, jafn mikla ógnun við afkomu fyrirtækja sinna og áður. Þó er rétt
að hafa í huga að áhrif af gengi krónunnar og skortur á fjármagni leggjast
þyngst á fyrirtæki sem eru mjög nýskapandi og selja stærstan hluta af
vörum sínum og þjónustu á erlenda markaði.
Meginmarkmið rannsóknarinnar er að efla vitneskju um stofnun, vöxt og
viðgang nýrra tæknifyrirtækja. Miðað er við að niðurstöður rannsóknarinnar
nýtist bæði stjórnendum við stjórnun fyrirtækja sinna og stjórnvöldum við
að byggja upp umhverfi sem hvað best styður tækninýsköpun.
Rannsóknin er langtímarannsókn og hefur gögnum verið safnað á hverju
árið frá árinu 2005. Þegar gögnum rannsóknarinnar var safnað í fyrsta sinn
árið 2005 tóku 65 fyrirtæki þátt en árið 2007 voru þau 119. Nánast öll þau
fyrirtæki sem sóst hefur verið eftir þátttöku frá taka þátt í rannsóknni.
Fyrsta árið sem fyrirtæki tekur þátt í rannsókninni er framkvæmdastjóri
fyrirtækisins yfirleitt heimsóttur en eftir það er spurningalistinn lagður
fyrir í síma. Ýmsir þættir sem skipta miklu máli á hinum mikilvægu fyrstu
árum fyrirtækja eru rannsakaðir. Spurt er um stofnskilyrði og ástæður
fyrir stofnun fyrirtækjanna og einnig margvíslegra spurninga um vöxt og
viðgang fyrirtækjanna. Árangur rannsóknarinnar byggir á því að stjórnendur
séu tilbúnir að svara spurningalista á hverju ári og því er ánægjulegt
að ný íslensk tæknifyrirtæki séu tilbúin að leggja sitt af mörkum til
rannsóknarverkefnisins með þátttöku sinni.
Rannsóknin er unnin af Rannsóknarmiðstöð Háskólans í Reykjavík í
nýsköpunar­ og frumkvöðlafræðum og er styrkt af Rannsóknarsjóði.
Nánari niðurstöður og upplýsingar um rannsóknina má nálgast á vefnum
www.hr.is/svvt.
Helmingi fleiri telja nú skort á
starfsfólki ógnun við afkomu
Á hinn bóginn virðist sú ógn sem
stjórnendur telja stafa af skorti á
framboði af fjármagni fara minnkandi
Flestir stjórnendur nýrra íslenskra
tæknifyrirtækja líta framtíðina björtum
augum