Tölvumál - 01.02.2008, Qupperneq 69

T Ö L V U M Á L | 6 9
Einar H. Reynis
í stjórn fjarskiptahóps Ský
Ýmis öfl toga og teygja tölvufjarskiptin og koma áhrifin úr mörgum áttum;
tískustraumar, ný tækni, endalok eldri tækni, sterk staða leiðandi fyrirtækja,
staðlar og opinber stefna stjórnvalda. Skýrslutæknifélagið hefur lagt sig
fram um að taka púlsinn á fjarskiptamálum með því að halda ráðstefnur og
fundi með reglulegu millibili og í ljósi mikils áhuga Íslendinga á þessu sviði
hafa þeir atburðir jafnan verið meðal þeirra fjölsóttustu á ári hverju.
Stofnun fjarskiptahóps
Lengst af fór undirbúningur fjarskiptaráðstefna þannig fram að settar
voru saman tilfallandi nefndir til að vinna að undirbúningi atburða. Þá
voru jafnan kallaðir til ýmsir sérfræðingar hverju sinni en fyrir nokkru
var stofnaður sérstakur faghópur um fjarskiptamál innan félagsins og
fjölsóttur stofnfundur sýndi hversu mikill áhugi er á þessum málum.
Stjórn fjarskiptahópsins vinnur að undirbúningi ráðstefna og funda um
fjarskiptamál og alveg af nógu að taka. Skýrslur og kannanir sýna líka
að útbreiðsla og notkun á tölvufjarskiptum er óvíða meiri en á Íslandi en
fjarskiptahópurinn var sá fyrsti innan félagsins sem hélt ráðstefnu utan
Reykjavíkur og þar var fjallað um háhraðanet í dreifbýlinu.
Tækifærin blasa líka við og tölvufjarskiptin hafa gert miklar vegalengdir að
engu. Nægir að benda á mikla möguleika til menntunar sem þróunin hefur
alið af sér og nýjar víddir í ferðaþjónustu.
Eitt aðalsmerki þverfaglegra félaga á borð við okkar er að geta teflt fram
ólíkum sjónarmiðum og þannig leyft gestum funda og ráðstefna að draga
sínar eigin ályktanir og spyrja fyrirlesara milliliðalaust um það sem á
þeim brennur. Það er með slíkt að leiðarljósi sem þjónusta félagsins hefur
þróast.
Frá fjarskiptahópi
Ský
Ýmis öfl toga og teygja
tölvufjarskiptin og koma áhrifin úr
mörgum áttum
Stjórn fjarskiptahópsins vinnur að
undirbúningi ráðstefna og funda um
fjarskiptamál og alveg af nógu að taka
Þó tölvufjarskipti hafi ekki verið mikið í sviðsljósi fjölmiðla nema síðastliðinn áratug eða þar um
bil er saga tölvufjarskipta á Íslandi nánast jafnlöng sögu Skýrslutæknifélagsins og tölvufjarskipti
hafa skipt sköpum fyrir mörg fyrirtæki og stofnanir í áratugi. Bæði hefur verið um að ræða víðtæk
net innan landsins en einnig tengingar til útlanda.