Tímarit hjúkrunarfræðinga - 01.04.2013, Blaðsíða 35

Tímarit hjúkrunarfræðinga – 2. tbl. 89. árg. 2013 31
samkvæmt kenningu Abrahams Maslow
þurfum við að uppfylla líkamlegar
grunnþarfir fyrst áður en við sinnum
þörfum fyrir öryggi, kærleika, virðingu
og sjálfsbirtingu. Í skólanum starfa ég á
viðverustað skjólstæðinga minna og er
því í kjöraðstöðu til að sinna þörfum þeirra
hverjar sem þær eru. Ég er í aðstöðu til
að grípa snemma inn í aðstæður þeirra
og veita viðeigandi stuðning því ég þekki
félagslegar aðstæður þeirra, þekki þau
sjálf, þarfir þeirra, styrkleika og veikleika.
Ég er með alla þætti þjónustunnar í hendi
mér en það er grundvallaratriði að sinna
þörfum þeirra af auðmýkt, umhyggju
og þekkingu ef hjúkrunin á að leiða til
farsældar.
Við, hin fullorðnu sem nú berum ábyrgð
á velferð samfélagsþegna þessa lands,
vitum að lífsaðstæður allt of margra
barna og ungmenna hér á landi eru
óviðunandi. Því til stuðnings nægir að
benda á nýútkomna skýrslu Unicef á
Íslandi sem heitir Réttindi barna: Ofbeldi
og forvarnir.
Skólahjúkrunarfræðingar eru þjónandi
leiðtogar og fyrirmyndir fagstéttar
sinnar í menntasamfélaginu. Þeir gegna
mikilvægu hlutverki í að koma auga
á börn og ungmenni sem þurfa hjálp
og eru í aðstöðu til að greiða götu
þeirra til farsældar. Það er kominn tími
til að yfirmenn heilsugæslunnar og
stjórnvöld sýni fyrirhyggju og hugrekki,
efli nærþjónustu við öll börn og
sjái til þess að í hverjum grunn­ og
framhaldsskóla séu daglega til staðar
skólahjúkrunarfræðingar. Til þess þarf
hæfa og ástríðufulla hjúkrunarfræðinga
sem eru leiddir áfram af eflandi
stjórnendum. Stjórnendur þurfa að vera
meðvitaðir um ábyrgð sína sem fyrirmyndir
annarra varðandi lífshætti, lífsviðhorf,
hugsjónir og samskiptahætti og byggja
ákvarðanir sínar og forgangsröðun
fjármuna á þeirri framtíðarsýn að á Íslandi
njóti öll börn mannréttinda.
Ég skora á Sigríði Maríu Atladóttur að
skrifa næsta þankastrik.
Samnorræn lungnaráðstefna
Samnorræn lungnaráðstefna, 46. Nordic Lung
Congress, verður haldin í Hörpu í Reykjavík dagana
13.-15. júní næstkomandi. Ráðstefnan er haldin annað
hvert ár og er hluti af norrænu samstarfi á sviði öndunar-
færasjúkdóma. Fagdeild lungna hjúkrunar fræðinga og
Félag íslenskra lungnalækna standa sam eiginlega að
ráðstefnunni. Á ráðstefnunni verður fjallað um nýjustu þekkingu í hjúkrun
og meðferð lungnasjúkdóma. Fyrir lesarar koma víða að, flestir frá
Norðurlöndunum.
Lungnasjúklingum fjölgar bæði hér á landi og erlendis. Lungnasjúklingar
og aðstandendur þeirra sækja sér aðstoð hjá heilsugæslu, bráðaþjónustu,
öldrunarþjónustu og líknarmeðferð. Því er mikilvægt að efla þekkingu á
hjúkrun lungnasjúklinga og hlutverki hjúkrunarfræðinga í umönnun þeirra.
Í boði er fjölbreytt dagskrá um hjúkrun lungnasjúklinga og fræðslu
til aðstandenda. Markmiðið er að deila rannsóknarniðurstöðum og
reynslu úr starfi með öðrum hjúkrunarfræðingum frá Norðurlöndunum.
Lögð verður áhersla á þjónustu við sjúklinginn, samhæfingu og
samfellu í þjónustu. Mikilvægi þverfaglegrar samvinnu og samvinnu milli
stofnana eins og heilsugæslu, bráðadeilda og hjúkrunarheimila verður í
brennidepli.
Ráðstefnan hefst í Hörpu 13. júní með tónlist og myndasýningu. Sama
dag verður móttaka í Ráðhúsi Reykjavíkur og föstudaginn 14. júní verður
kvöldverðarboð í Bláa lóninu. Hjúkrunarfræðingar eru hvattir til að kynna
sér dagskrá ráðstefnunnar og taka þátt.
Nánari upplýsingar eru á www.nlc2013.is, hjá Ragnheiði Alfreðsdóttur á
netfanginu ragnalf@landspitali.is eða hjá Bryndísi Stefaníu Halldórsdóttur
á netfanginu brynhall@landspitali.is.
Fr
ét
ta
pu
nk
tu
r