Ársrit um starfsendurhæfingu - 2011, Qupperneq 43

43www.virk.is
ATVINNULÍF
greiðslur frá sjúkrasjóðum stéttarfélaga
í allt að 6-9 mánuði. Auk þessa eiga
starfsmenn oft rétt á örorkulífeyri hjá
lífeyrissjóðum sem reknir eru af aðilum
vinnumarkaðarins eftir að bótatímabili
hjá sjúkrasjóði lýkur. Það geta því liðið
1-2 ár áður en starfsmenn á vinnu-
markaði sækja um bótagreiðslur hjá
opinberum aðilum í kjölfar veikinda
eða slysa og það er einmitt þetta
tímabil sem skiptir öllu máli varðandi
árangur í starfsendurhæfingu. Ef
við ætlum að bjóða upp á þjónustu í
starfsendurhæfingu á skipulegan hátt
snemma í fjarvistaferli einstaklings þá
er það einungis mögulegt í samvinnu
við aðila vinnumarkaðarins.
Aðilar vinnumarkaðarins sömdu um
stofnun Starfsendurhæfingarsjóðs í
kjarasamningum á árinu 2008. Síðan
hafa þeir staðið vörð um uppbyggingu á
þessari þjónustu og lagt mikla áherslu á
að efla hana og þróa í samvinnu við bæði
stéttarfélög og atvinnulíf. Allir sem fá
greidda dagpeninga frá sjúkrasjóðum
stéttarfélaga fá upplýsingar um
þjónustuna og að auki er sérstaklega
haft samband við marga þessara
einstaklinga og þeim boðið upp á viðtal
hjá ráðgjafa í starfsendurhæfingu.
Einnig á sér stað fræðsla um þjónustuna
fyrir trúnaðarmenn og stjórnendur
á vinnustöðum til að auka líkur á því
að menn leiti sér aðstoðar snemma í
ferlinu ef þörf er á.
Það er ekki nýtt að aðilar vinnumarkað-
ar semji um mikilvæg mál velferðar-
kerfisins í kjarasamningum – hvorki hér
á landi né á hinum Norðurlöndunum.
Samtök launamanna hafa einnig
í gegnum tíðina gegnt mikilvægu
hlutverki við að byggja upp það
velferðarkerfi sem við búum við í dag og
auk þess er stór hluti velferðarkerfisins
hér á landi til staðar vegna samstarfs
verkalýðshreyfingar og atvinnurekenda
og má þar til dæmis nefna lífeyris-
sjóðina, atvinnuleysistryggingar og rétt
til launa og bótagreiðslna í veikindum.
Með stofnun Starfsendurhæfingarsjóðs
hafa aðilar vinnumarkaðarins ákveðið að
taka meiri ábyrgð á þessum málaflokki
og byggja upp öfluga starfsendurhæfingu
á vinnumarkaði – samfélaginu öllu til
heilla.
Þjónusta í samstarfi við
stéttarfélög og
atvinnurekendur
Þjónusta ráðgjafa VIRK fer fram hjá
stéttarfélögum um allt land. Þannig
er lögð áhersla á að hafa þjónustuna
dreifða og aðgengið gott. Allir ráðgjafar
stéttarfélaganna vinna í samræmi við
vinnu- og siðareglur VIRK og trúnaður
ríkir á milli ráðgjafa og einstaklings um
allt sem þeim fer á milli. Þjónustan
er einstaklingsbundin og tekur mið
af aðstæðum og þörfum hvers og eins
einstaklings. Með því að staðsetja
ráðgjafa hjá stéttarfélögum um allt
land er aðgengi félagsmanna jafnað
auk þess sem tryggð er góð samvinna
við bæði sjúkrasjóði stéttarfélaganna og
atvinnurekendur á svæðinu en þetta eru
þeir aðilar sem bera ábyrgð á launa- og
bótagreiðslum einstaklinga í fjarvistum
vegna veikinda og slysa. Ráðgjafar nýta
sér jafnframt tengsl stéttarfélagsins við
atvinnulífið og fyrirtækin á staðnum og
geta á þann hátt smám saman aukið
aðkomu atvinnulífsins að starfseminni.