Ársrit um starfsendurhæfingu - 2011, Síða 44

ATVINNULÍF
Aukið samstarf við atvinnulíf
Rannsóknir og reynsla bæði hérlendis
og erlendis hafa sýnt fram á það að
starfsendurhæfing í nánu samstarfi við
atvinnulíf og vinnustaði skilar mun meiri
árangri varðandi endurkomu til vinnu en
önnur nálgun. Um þetta er m.a. fjallað
í grein Ingibjargar Þórhallsdóttur á bls.
54 í þessu ársriti. Hér á landi hefur á
undanförnum árum átt sér stað mikil
og metnaðarfull uppbygging á ýmsum
úrræðum í starfsendurhæfingu. Flest
hafa þau lagt mesta áherslu á menntun
og heilsueflingu en skortur hefur verið
á markvissari þjálfun og tengingu við
atvinnulífið. Víða erlendis er til dæmis
í boði öflug sérfræðiþjónusta sem miðar
að því að aðstoða einstaklinga við að
yfirvinna hindranir sem geta bæði
verið í vinnuumhverfinu sem slíku og
einnig af sálfélagslegum toga. Þessi
tegund úrræða hefur skilað mjög góðum
árangri.
Hjá Starfsendurhæfingarsjóði á sér
stað töluvert þróunarstarf í þessum
efnum og einnig hafa úrræðaaðilar verið
hvattir til að þróa starfstengd úrræði af
þessum toga til dæmis með veitingu
styrkja til uppbyggingar þeirra. Verið
er að fara af stað með tilraunaverkefni
um vinnuprófanir og sérstakan stuðning
á vinnustöðum og eins er áhugi fyrir
því að útfæra nánar hugmyndir um
reynsluráðningar og aukinn stuðning á
vinnustöðum. VIRK hefur einnig aukið
samstarf við Tryggingastofnun ríkisins
vegna vinnusamninga öryrkja. VIRK
hefur ennfremur áhuga á að þróa aukna
þjónustu fyrir atvinnulíf í formi aðstoð-
ar við uppbyggingu á fjarvistarstefnu
og vinnuferlum til að tryggja farsæla
endurkomu starfsmanna til vinnu eftir
veikindi og slys.

Vinnufundur um starfsendur-
hæfingu og forvarnir
Þann 8. febrúar síðast liðinn var haldinn
vinnufundur um starfsendurhæfingu
og forvarnir á vegum VIRK og aðila
vinnumarkaðarins. Þátttakendur á
þessum vinnufundi voru starfsmenn
VIRK og fulltrúar stofnaðila VIRK
– það er fulltrúar stéttarfélaga og
atvinnurekenda. Alls tóku þátt um
50 manns. Boðið var upp á fræðslu
fyrir hádegi og eftir hádegið var skipt
í umræðuhópa þar sem var rætt um
hvernig auka megi starfsendurhæfingu
í atvinnulífinu og uppbyggingu á
þróunarverkefni til næstu 2-3 ára til að
stuðla að vinnutengdri endurhæfingu,
forvörnum, betri stjórnun fjarvista
og farsælli endurkomu til vinnu eftir
veikindi og slys.
Þessi vinnufundur heppnaðist mjög vel,
góðar umræður voru í vinnuhópum og
margar góðar hugmyndir komu fram
sem nauðsynlegt er að vinna áfram.
Hér á síðunni eru nokkrar myndir frá
þessum fundi.
44
A
TV
IN
N
U
LÍ
F
www.virk.is