Morgunblaðið - 12.12.2020, Blaðsíða 14

14 DAGLEGT LÍF
MORGUNBLAÐIÐ LAUGARDAGUR 12. DESEMBER 2020
Kristín Heiða Kristinsdóttir
khk@mbl.is
Ég flutti heim til Íslandssumarið 2019 og opnaðimyndlistarbúð hér áLaugaveginum og ég
seldi fyrsta verkið mitt á meðan ég
var að bera inn. Salan stoppaði ekki.
Langflestir viðskiptavina minna
voru erlendir ferðamenn og mynd-
listarsafnarar, en Íslendingar
keyptu líka og voru þá stórtækir,
þeir vildu stóru verkin,“ segir Birgir
Breiðdal, eða Biggi myndlistar-
maður, en engan bilbug er að finna á
honum þrátt fyrir Covid og fáa
ferðamenn. Nú er hann búinn að
stækka litlu búðina við Laugaveg 72,
sem er líka gallerí og vinnustofa, og
hann rekur hana í samstarfi við
konu sína, Ásu Heiði Rúnarsdóttur,
sem einnig er myndlistarmaður.
„Við ætlum að opna í dag stórt
gallerírými hér við hliðina, í húsi
númer 74, af því ég hef ekki getað
hengt upp stóru verkin mín. Vegg-
irnir í litlu búðinni stóðu oft án mál-
verka því ég hafði ekki undan að
mála. Við unnum í fyrra fram að öðr-
um degi jóla og opnuðum aftur strax
eftir jól, en fórum svo út og ætluðum
að hvíla okkur í janúar og febrúar.
Eftir það skall Covid á og við opnuð-
um ekki aftur fyrr en í sumar en þá
byrjuðu lætin aftur. Búðin nánast
tæmdist af myndlistarverkum.“
Þarf ekki að fara til útlanda
Biggi nýtur þess vel að vera á
staðnum í verslun sinni og fyrir vik-
ið í nánum samskiptum við fólkið
sem kaupir af honum myndlist-
arverk.
„Þegar ferðamenn streymdu til
Íslands var upplifun mín hér í búð-
inni oft eins og ég væri staddur í út-
löndum, því erlenda fólkið sem kom
inn fór alltaf að spjalla. Þar sem ég
hef búið á Ítalíu, Spáni og Frakk-
landi get ég talað þau tungumál og
það losaði um málbeinið; allir fóru
að segja mér sögur frá sínum lönd-
um og lýsa yfir ánægju sinni með Ís-
land. Við þessi samskipti hvarf þörf-
in hjá mér til að fara til útlanda, því
ég var alltaf að hitta fólk frá öðrum
löndum. Þegar maður er að selja sín
eigin málverk er maður í svo nánum
tengslum við viðskiptavinina. Ég
þarf að sjá til þess að manneskjan
fái verkið heim til síns heimalands
og að hún treysti mér til að senda
það. Það skiptir máli að þetta fólk sé
í beinum samskiptum við myndlist-
armanninn, það er ekki að spjalla við
fínan gallerista í jakkafötum. Þetta
er mín persónulega vinnustofa og
fólki finnst líka gaman að fylgjast
með mér vinna verkin,“ segir Biggi
og bætir við að ef landið opnist í
febrúar fyrir ferðamönnum sé eins
gott að hann verði tilbúinn með nógu
mörg verk, svo hann hafi undan.
„Fólk hefur líka verið að panta
hjá mér á netinu núna í Covid og
margt af því hefur keypt af mér verk
áður.“
Var boðið að sýna í Kóreu
Biggi lærði arkitektúr í Mílanó
á Ítalíu á sínum tíma og vann við það
árum saman.
„Einn daginn ákvað ég að snúa
mér að myndlist en eftir að hrunið
skall á var lítið að gera hjá myndlist-
arfólki og arkitektum, svo ég fór að
vinna sem fótboltaþjálfari hjá
FRAM og Þrótti og var þar í tíu ár.
Eftir það kom ég við á mínum gömlu
heimaslóðum í Mílanó og heimsótti
kóreska vini mína og sýndi þeim
málverkin mín í símanum, sem varð
til þess að þeir buðu mér til Kóreu til
að sýna þar. Ég fór þangað sumarið
2019 og það var rosaleg upplifun að
koma til Kóreu og í Seúl málaði ég
til dæmis „live“ á fatnað módela á
tískusýningu. Allt þetta ævintýri
kveikti aftur á gamla myndlistar-
Bigga.“
Ekki nóg með það, heldur
skellti Biggi sér á námskeið í kvik-
myndagerð í Ármúlaskóla nú í
Covid-tíð.
„Ég lifnaði allur við og komst
að því að þetta var það sem mig
hafði alltaf langað að læra, en það
virkaði ekki þegar ég var ungur, var
bæði flókið og dýrt, svo ég gekk veg
skynseminnar og lærði arkitektúr.
Ég skemmti mér konunglega á kvik-
myndanámskeiðinu og ákvað að því
loknu að búa til stuttmynd. Ég fékk
strákana í lið með mér sem voru
með mér á námskeiðinu og við létum
vaða. Þarna kom þjálfarinn í mér
sterkt fram sem leikstjórnandi; að
láta allt ganga eins og á æfingu eða
við stjórn fótboltamóts.“
Erfitt að vera strákur í dag
Biggi segist ekki hafa áttað sig
á því fyrr en eftir á að í myndinni
geri hann upp fortíð sína.
„Í grunninn fjallar myndin um
það hversu erfitt það geti verið að
vera strákur. Þjóðfélagið er þannig
uppbyggt að það eru margir strákar
þarna úti sem þora ekki að gangast
við tilfinningum sínum og við-
kvæmni. Allir þessir venjulegu
strákar sem vita ekki hvernig þeir
eiga að bregðast við tilfinningum
sínum, kunna það ekki af því sam-
félagið er alltaf að segja þeim að
strákar eigi að vera á einhvern
ákveðinn hátt. Hættan er að fólk
endi í blindgötu þegar það er alltaf
að reyna að vera annað en það er.
Ég hef lengi haft áhyggjur af ung-
lingsstrákum, þyngslum þeirra og
leiða sem stundum endar í sjálfsvígi.
Boðskapur myndarinnar er að allir
geta gert það sem hugur þeirra
stendur til og hjartað segir. Ég er
stoltur af þessu framtaki mínu og
vonandi á myndin eftir að hjálpa ein-
hverjum. Ég endaði á að semja lagið
sjálfur sem kemur fyrir í myndinni
og ég spila aðeins á bassa í því, en
það hafði líka verið draumur minn
að læra á bassa. Þegar tökum lauk
var það besti dagur lífs míns. Nú er
ég búinn að koma þessu út úr kerf-
inu. Ég þarf ekkert að verða brjál-
æðislega góður á bassa eða meika
það í kvikmyndaheiminum, ég er
bara svo feginn að ég framkvæmdi
það sem ég hafði svikið mig um. Ég
fékk að upplifa gleðina í kringum
þessa sköpun, það er nóg. Ég ætla
ekki að vera bitri gaurinn á elliheim-
ilinu sem gerði ekkert af því sem
hann langaði að gera. Líf mitt hefur
gjörbreyst, nú er gaman að lifa.“
Ætlar ekki að vera bitri gaurinn
Birgir Breiðdal lærði arkitektúr á sínum tíma og
vann við það árum saman. Síðan sneri hann sér að
myndlist en eftir hrun tók hann að sér í áratug að
vera fótboltaþjálfari. Að því loknu vaknaði myndlist-
armaðurinn aftur og nú hefur hann gert stuttmynd.
Morgunblaðið/Eggert
Myndlistarmaður Biggi opnar í dag stærra rými svo hann geti hengt upp stóru myndlistarverkin sín í búðinni.
Ævintýri Biggi í Kóreu að mála listaverk á klæði módela á tískusýningu.
Nóg að gera Biggi hengir upp eitt verka sinna í nýju rými verslunarinnar.
Eiguleg bók eftir Guðrúnu Hannele
Henttinenmeð nýjum útfærslum á
fallegum og sígildum vettlingamynstrum.
ÞJÓÐLEGIR VETTLINGAR
LANDSINS MESTA ÚRVAL BÓKA Bókabúð Forlagsins | Fiskislóð 39 | Opið 10–19 alla daga til jóla | www.forlagid.is