Gerðir kirkjuþings - 2019, Blaðsíða 14

14 15
og vera öðrum hjálp að viðkomandi hugi að sínu eigin trúarlífi og átti sig einnig á því
að hann eða hún er manneskja eins og allir aðrir og hefur sínar þarfir. Sálgæsluaðilinn
þarf að þekkja sjálfan sig. Hann þarf að sjá og viðurkenna veikleika sína og styrkleika.
Þeir sem starfa í þjónustu við aðra eru alltaf leiddir til samfundar við sjálfan sig um leið.
Sálgæsluaðilinn er í samfylgd með öðrum en hann er líka í samfylgd með sjálfum sér.
Fjölskylduþjónusta kirkjunnar sér um handleiðslu fyrir presta, djákna og aðra sem starfa
á vegum kirkjunnar. Það eflir til muna faglega þjónustu kirkjunnar um landið allt.
Menntun presta á sviði sálgæslunnar er að eflast. Endurmenntun Háskóla Íslands
hefur boðið diplómanám í þeim fræðum og sækja starfandi prestar það, með stuðning
kirkjunnar.

Tónskólinn, söngmálastjóri og sálmabókin
Önnur merk starfsemi fer einnig fram í kjallaranum í Grensáskirkju þar sem Hjálparstarfið
er enn og Fjölskylduþjónustan var til skamms tíma. Það er Tónskóli Þjóðkirkjunnar.
Tónskólinn kennir nemendum kirkjutónlist og litúrgísk fræði og menntar organista til
starfa við kirkjur landsins. Þar fer fram metnaðarfull starfsemi sem hefur í gegnum tíðina
skilað út í kirkjurnar tónlistarfólki sem margt hvert hefur alið upp heilu kynslóðirnar í
tónlist. Kórar kirknanna ná til allra aldurshópa, allt frá leikskólabörnum og upp í eldri
borgara kóra. Söngmálastjóri þjóðkirkjunnar vinnur einnig að kirkjutónlistinni og fræðir,
styrkir og hvetur kórstjóra og kórmeðlimi um land allt.
Það fer að sjá fyrir endann á útkomu nýrrar sálmabókar sem hefur verið í smíðum
undanfarin ár. Ég vonast til þess að á næsta kirkjuþingi verði sungið upp úr þeirri bók
með hana í hönd en sálmarnir sem við sungum í helgistundinni áðan verða báðir í henni.
Græna kirkjan og umhverfismálin
Á þessu kirkjuþingi eru nokkrar tillögur bornar fram um umhverfismál. Umhverfisnefnd
kirkjunnar vinnur vel sitt verk og stendur vaktina við að hrinda umhverfisstefnunni í
framkvæmd. Mikið hefur farið fyrir umhverfismálunum í kirkjunni og græna kirkjan
hefur breiðst út í söfnuði landsins.
„Manneskjan er hluti af náttúrunni en ekki yfir hana hafin. Hún ber jafnframt sérstaka
ábyrgð vegna stöðu sinnar í sköpunarverki Guðs samkvæmt gyðing-kristinni hefð.
Þeirri ábyrgð fylgir sú siðferðilega skylda að hlúa að öllu lífi. Hlutverk mannkyns er að
yrkja jörðina, vernda hana og næra, og nýta gæði hennar af umhyggju og virðingu með
sjálfbærni að leiðarljósi“ segir m.a. í umhverfisstefnu þjóðkirkjunnar.
Nokkrir söfnuðir þjóðkirkjunnar hafa fengið viðurkenningu fyrir það að vera á grænni
leið. Til þess að ná því þarf að uppfylla viss skilyrði grænnar kirkju. Aðeins einn söfnuður
hefur nú þegar náð því að verða grænn söfnuður. Allir söfnuðir kirkjunnar taka þátt í því
að gera kirkjuna græna en eru mislangt á veg komnir. Græna kirkjan er því verkefni allrar
kirkjunnar og því má segja að þjóðkirkjan séu stærstu umhverfissamtök landsins með um
2/3 íbúa landsins innanborðs.
Þjóðkirkjan hefur nú í þrjú ár tekið þátt í umhverfisátaki fjölda kirkna heimsins sem
nefnist tímabil sköpunarverksins og stendur frá 1. september til 4. október ár hvert. Við