Gerðir kirkjuþings - 2019, Blaðsíða 68

68 69
21. mál 2019
Flutt af kirkjuráði
Þingsályktun um skipun nefndar
til endurskoðunar á starfsreglum um íslensku þjóðkirkjuna erlendis
Kirkjuþing samþykkir að skipuð verði þriggja manna nefnd til þess að endurskoða
starfsreglur um íslensku þjóðkirkjuna erlendis nr. 1003/2005, með síðari breytingu.
Biskup Íslands, kirkjuráð og utanríkisráðherra tilnefni hver um sig einn nefndarmann.
Biskup Íslands skipi nefndina og skal sá sem biskup tilnefnir vera formaður hennar.
Nefndin skili tillögum sínum að breyttum starfsreglum til kirkjuráðs sem leggur þær
fram sem tillögur að nýjum starfsreglum fyrir kirkjuþing 2020.
Greinargerð.
Starfsreglur um íslensku þjóðkirkjuna erlendis eru að mörgu leyti barns síns tíma og
þarfnast gagngerrar endurskoðunar. Starfsreglurnar þurfa að taka tillit til þess fjölbreytta
starfsumhverfis er söfnuðir og prestar búa við erlendis.
Nú eru starfandi íslenskir söfnuðir í London, Danmörku, Noregi, Svíþjóð, Lúxemborg
og á Kanaríeyjum. Prestsþjónusta er með misjöfnum hætti á þessum stöðum, allt frá því
að vera fullar stöður fjármagnaðar í viðkomandi landi eða af þjóðkirkjunni eða prestar
sem koma með reglulegu millibili til að sinna lágmarksþjónustu.
Utanríkisráðuneytið lét vinna skýrslu m.a um borgaralega þjónustu við Íslendinga á
erlendri grundu. Þar er lagt til aukið samstarf sendiráða við þjóðkirkjuna og því ber að
fagna. Þjóðkirkjan þjónar þar sem hennar er þörf og þegar til hennar er leitað á erlendri
grundu. Þjónusta við Íslendinga erlendis er mikilvæg vegna tungumálsins sem er nátengt
trúar- og tilfinningalegri vídd manneskjunnar. Því hefur samstarf þjóðkirkjunnar við
sendiráðin erlendis verið mikils metin, sér í lagi á sviði sálgæslunnar. Hið menningar- og
félagslega hlutverki sem hún gegnir skal heldur ekki vanmetið.
Biskupsembættið hefur verið í góðu samtali og samráði við utanríkisþjónustuna vegna
þeirra sameiginlegu verkefna þessara tveggja aðila í þjónustunni og liggur fyrir skýrsla
biskupsembættisins sem nefndin gaumgæfi og byggi tillögur sínar á.
Lögð er áhersla á að nefndin leiti sér upplýsinga hjá nágrannakirkjum sem og þeim
kirkjum í Evrópu, þá sér í lagi í Þýskalandi, sem hafa búið góðan ramma utan um kirkjulega
þjónustu borgara sinna á erlendri grundu.
Nýjar starfsreglur þurfa að taka á þeim fjölbreyttu aðstæðum sem íslenskir söfnuðir
erlendis búa við, annars vegar hvað varðar stöðugildi, lagaumhverfi og hins vegar
fjármögnun.
Kostnaður: Sjá kostnaðaráætlun fjármálastjóra þjóðkirkjunnar.
Nefndarálit löggjafarnefndar
Nefndin hefur fjallað um málið og leggur til að tillagan á þskj. 21 verði samþykkt óbreytt.