Milli mála - 2021, Page 243
242 Milli mála 13/2021
dreifa áhyggjum, beina huganum frá því sem þjakar hann.53
Madame d’Aulnoy sýnir þessu stefi greinilegan áhuga í „Bláa fugl-
inum“ og ekki einungis með frásögn af grimmum örlögum Sjarmörs.
Hún gerir grín að óánægju fólks með útlit sitt með því að bregða á
loft risavöxnum spegli – einmitt þegar leit Flórínu að Sjarmör
stendur sem hæst – þar sem þúsundir kvenna og karla úr öllum
heimshornum góna á mynd sína í speglinum, geifla sig og gretta,
og sjá sig eins og þau vildu líta út en gera ekki. Þessi fegrandi
blekking er afkáraleg og fólkið sem dvelur við draumsýnina óttast
mest að Flórína brjóti spegilinn með því að stíga á hann. Blekkingin
er líka að verki þegar Sjarmör lætur gabbast af Gríshildi í rökkrinu.
Umbreytingin á sér stað þegar honum verða ljós svikin við að sjá
hið sanna í gegnum glervegg og neita svo staðfastlega að kvænast
þeirri sem blekkti hann:
Sjarmör konungur tók strax að breytast. Fjaðrir þöktu nú handleggina og
mynduðu vængi, fótleggirnir urðu svartir og rindilslegir, bognar klær uxu
á fótum hans og líkaminn skrapp saman og varð alþakinn löngum, fín-
legum, ljósbláum fjöðrum; augun urðu kringlótt og glönsuðu eins og
sólin, nefið breyttist í fílabeinsgogg og á höfðinu mátti sjá hvítan skúf sem
var eins og kóróna í laginu. Fuglinn söng dásamlega og talaði á sama hátt.
Sjarmör æpti af skelfingu við að sjá þessa umbreytingu á sjálfum sér og
flaug í burtu eins fljótt og hann gat til að komast úr þessari hræðilegu höll.
Þetta nýja gervi, sem minnir þrátt fyrir allt á fyrri tign hans, gerir
honum kleift að fljúga á fund Flórínu og eiga með henni ljúfar
stundir í prísundinni því Flórína lætur ekki útlit síns heittelskaða
hafa áhrif á tilfinningarnar sem hún ber til hans. Listamenn hafa
sótt innblástur í þær senur og jafnvel dregið fram sjaldgæfa munúð
sem kemur fram í lýsingum höfundar á samskiptum Flórínu og
Bláa fuglsins á gluggasyllunni þar sem þau hjala hugfangin hvort
við annað: hún strýkur fjaðrirnar blíðlega en hann klappar henni
53 Sjá „divertir“, Dictionnaire de l’Académie française, 1re édition, 1694, https://www.dictionnaire-
academie.fr/article/A9D2849 og „divertissement, Dictionnaire de l’Académie française, 1re édi-
tion, 1694, https://www.dictionnaire-academie.fr/article/A9D2851.
UM BÓKMENNTALEG ÆVINTÝRI Í FRAKKLANDI Á 17. ÖLD
10.33112/millimala.13.9