Milli mála - 2021, Side 244
Milli mála 13/2021 243
með fætinum og goggar mjúklega í hana.54 Blái fuglinn er aðeins
einu sinni kallaður páfagaukur í sögunni en þessir framandi, litríku
fuglar sem hermt geta eftir mannsröddinni voru þekktir sem gælu-
dýr meðal franska aðalsins á 17. öld. Þegar páfagaukur markgreifa-
ynjunnar Suzanne Du Plessis-Bellière, sem var vinsæl í samkvæmis-
lífi Parísarborgar um miðja 17. öld, gaf upp öndina var til að mynda
brugðið á leik og ortar fjölmargar sonnettur í minningu fuglsins
sem allar áttu að innihalda sömu rímorðin.55 Skemmtanagildi gælu-
dýrsins varð því langlífara en það sjálft.
Þótt ekki sé vitað með vissu hvenær Madame d’Aulnoy samdi
„Bláa fuglinn“ hafa efnistök hennar og áherslur breyst umtalsvert
frá því hún laumaði „Hamingjueyjunni“ inn í Söguna um Hypolite,
greifa af Duglas. Í „Bláa fuglinum“, eins og víðar í ævintýrum sín-
um, dregur höfundurinn upp sterka mynd af kvenhetju sinni, á
kostnað karlhetjunnar. Tvær konur, guðmóðir og móðir Gríshildar,
leggjast á eitt um að gera Sjarmör og Flórínu lífið leitt og reynast
þeim fyrrnefnda yfirsterkari. Hann missir alla von, býr sig undir að
lifa við ástleysi það sem eftir er og flýr andvökunætur og angist með
ópíum.56 Flórína, snjöll og úrræðagóð og með góðu álfkonuna sér
við hlið, tekur örlögin í sínar hendur þegar faðir hennar snýr við
henni bakinu, elskhuginn missir móðinn og mótlætið steðjar að í
líki annarra kvenna sem beita öllum brögðum til að fá fram vilja
sinn. Hún skiptir um ham af eigin hvötum, klæðist druslum og
leggur land undir fót þar til hún finnur konunginn og tekst að
tryggja hamingju þeirra beggja af mikilli hugkvæmni. Ævintýrið
endar vel og það hefur verið hin besta skemmtun fyrir áheyrendur
að hlýða á „Bláa fuglinn“; sagan er full kímni og hugarflugs og
Madame d’Aulnoy setur á svið kvenhetju sem ætla má að hafi verið
áheyrendum hennar að skapi, að minnsta kosti þeim sem gátu séð
sig í sögupersónunni.
54 Damay-Vissuzaine, „Division de l’espace et ouverture du corps : « Gracieuse et Percinet »,
« L’Oiseau bleu » (Madame d’Aulnoy) et « Plus Belle que Fée (Mademoiselle de La Force), entre
texte et image“, 152–155.
55 Sonnetturnar tuttugu og fimm voru gefnar út árið 1656 af Charles Sercy; sjá Speyer, „La poule de
Sylvie et le pigeon de Sapho: le bestiaires galant des recueils collectifs de la seconde moitié du
XVIIe siècle“, 37.
56 Frá 17. öld hefur ópíum verið notað í Evrópu til að deyfa sársauka og valda vímu; sjá Butel,
L’opium, histoire d’une fascination.
ÁSDÍS R. MAGNÚSDÓTTIR