Tímarit hjúkrunarfræðinga - 2022, Síða 22

22 Tímarit hjúkrunarfræðinga | 1. tbl. 98. árg. 2022
Ef maður er í góðu
formi ræður maður líka
betur við erfiðleika
sem koma upp í lífinu
Ólafía Kvaran hjúkrunarfræðingur varð heimsmeistari árið 2019 þegar hún sigraði
21 km Spartan Race hindrunar- og þrekhlaup í sínum flokki. Árið 2021 landaði hún
svo Evrópumeistaratitlinum, hún segir útihlaup vera sína hugleiðslu og hleypur
þess vegna oftast ein. Við heyrðum í hjúkrunarfræðingnum og hlaupakonunni
Ólafíu sem segist ekki vera hætt að keppa en ætli samt að njóta lífsins meira á
komandi árum og setja minni pressu á sjálfa sig. Hún segist vera mjög meðvituð
um mikilvægi þess að hafa heilsu eftir að eiginmaður hennar fór í hjartastopp fyrir
nokkrum árum. Það breytti lífsviðhorfi fjölskyldunnar.
Óla, eins og hún kýs að kalla sig, kom sá og sigraði
árið 2019, eftir að hafa lent í fjórða sæti árið áður.
Svo skall heimsfaraldur á, hún hélt þó ótrauð áfram
að hlaupa og tók þátt í Evrópumeistaramóti sem
haldið var í Verbier í Swiss haustið 2021. Óla sigraði
og var Evrópumeistari í sínum aldursflokki í 21
km Spartan Race. Í kjölfarið mætti hún til leiks á
heimsmeistaramótið 2021 sem haldið var í heitum
eyðimerkursandi í Abu Dhabi og landaði þar öðru
sætinu.
Óvænt boð á heimsmeistaramót í liðakeppni Keppt er í
íþróttinni í fjölmörgum löndum í Evrópu og Asíu og hún nýtur
mikilla vinsælda í Bandaríkjunum. Í Spartan-hlaupum takast
keppendur á við ýmiss konar hindranir í hlaupi sem oft er með
mikilli hækkun. ,,Spartan-hlaup eru yfirleitt alltaf utanvegahlaup.
Yfirleitt eru mótin haldin á stórum útivistarsvæðum,
heimsmeistaramótið sem ég fór á 2019 var haldið á risastóru
skíðasvæði og þar vorum við að hlaupa í skíðabrekkum.
Evrópumótið sem ég fór á var svo haldið í skíðaþorpi í Sviss,“
útskýrir Óla. Hún segir að það sé hentugt að halda þessi mót í
skíðaþorpum því þar séu hótel, veitingastaðir og öll aðstaða fyrir
keppendur. ,,Keppt er í fjórum vegalengdum, 5 km, 10 km, 21 km
og 42 km og ég hef verið að keppa í 21 km hlaupum.“
En hvernig byrjaði þetta ævintýri? „Það gerðist satt best að segja
mjög óvænt sumarið 2017, þá var mér og tveimur æfingafélögum
mínum boðið að keppa sem lið. Spartan var að fara að halda
heimsmeistaramót í liðakeppni um haustið og vantaði lið frá
Íslandi. Ekkert okkar hafði prófað Spartan-hlaup áður en við
ákváðum samt að skella okkur í liðakeppnina, mér fannst þetta
spennandi áskorun og kolféll strax fyrir íþróttinni. Ég ákvað
því að halda áfram og fljótlega var ég komin á kaf í pælingar
og æfingar. Í upphafi árs 2018 fór ég að skoða hvernig best
væri að æfa fyrir Spartan-mót sem endaði með því að ég fór
til New York á þjálfaranámskeið og í framhaldinu til Boston á
framhaldsnámskeið. Fyrra námskeiðið var bókleg þjálfunarfræði
en það seinna tæknilegt, verklegt nám. Í Spartan-hlaupum eru
Texti: Sigríður Elín Ásmundsdóttir | Myndir: Úr einkasafni