Póllinn - May 2023, Page 21

Ég sendi á nokkra vini mína og bað þau um að segja mér frá sinni upplifun af rasisma. Ég
setti svörin í samfelldan texta og umorðaði. Hér eru þeirra svör:
Anqi Wang, 19 ára, ekki ættleidd.
Ég hef orðið fyrir rasisma, ég held ég hafi verið í leikskóla þegar ég upplifði rasisma fyrst.
Það atvik sem situr eftir er þegar krakkanir sungu „mamma mín er Kínverji, pabbi minn er
Japani og aumingja ég”.
Valgerður Emmanuela Kehinde Reynisdóttir, 19 ára, ættleidd.
Ég varð fyrst fyrir rasisma þegar ég var um 6-7 ára, þá upplifði ég mig í fyrsta skipti öðruvísi
þar sem krakkarnir kölluðu húðina mína kúkabrúna.
Steinunn Anna Radha, 25 ára, ættleidd.
Ég hef orðið fyrir rasisma síðan ég var barn. Það var samt ekki fyrr en ég varð tvítug þegar ég
áttaði mig á því og fór að kynna mér hugtakið og hvað það þýddi að verða fyrir honum. Það
eru nokkur atvik sem sitja mest eftir, einelti í skóla, kynbundið ofbeldi þar sem húðlitur
minn var hlutgerður og gerður að blæti. Þegar ég gekk niður Laugaveginn og var kýld í
magann og nokkrir karlmenn kölluðu mig „black asian bitch”. Nýlegra atvik er þegar mér var
sagt að ég væri klikkuð og væri ekki „hvítum manni bjóðandi”.
Það hefur varla farið fram hjá mörgum að nýlega hefur myndast umræða um rasisma og þá
varðandi menningarnám. Í þessari umræðu hafa raddir litaðra einstaklinga verið þaggaðar og
þeirra skoðanir rengdar. Þetta er eitthvað sem við sjáum gerast aftur og aftur. Oft þegar
litaðir gagnrýna eitthvað sem tengist framkomu annarra í þeirra garð er því oft mætt með
neikvæðu viðmóti. En eins og flest vita kannski þá er rasismi ekki nýr á nálinni og er það
eitthvað sem litaðir einstaklingar hafa reynt lengi að koma út í kosmósið. Þetta sem þið hafið
lesið hér er samt sem áður aðeins brot af upplifunum einstaklinga, þær eru jafn mismunandi
og við erum mörg og ekki er hægt að nýta þetta smáa brot til að yfirfæra yfir á alla litaða og á
í rauninni alltaf að komast hjá því að alhæfa upplifun eins á heilan hóp. En vonandi gefur
þetta kannski smá tilfinningu fyrir því sem litaðir lenda í hérlendis.

Margrét B W Waage Reynisdóttir
19