Læknaneminn - 01.12.1974, Blaðsíða 34

strákar. Það er nefnilega ekki svo galið að láta sér
detta í hug, að fleiri stelpur en strákar hafi áhuga á
læknisfræði, a. m. k. eru miklu fleiri konur en karl-
ar starfandi að heilbrigði þessarar þjóðar, ef allt er
tekið. Það er vonandi, að menntaskólastelpur fari nú
að sjá að sér og hætta að láta gamlar siðvenjur og
hjónabandsmarkaðsþrýstinginn draga sig á asnaeyr-
unum inn í þessar „heppilegri“ kvennagreinar, s. s.
meinatækni og hjúkrun („sem taka nú bara 3 ár“),
á meðan bekkjafélagar þeirra láta ekkert fæla sig
írá skemmtilegra námi og ábyrgðarmeiri störfum,
þótt margir þeirra væru e. t. v. betur komnir annars
staðar. Það er ekki andskotalaust, að stelpur skuli
vera helmingur stúdenta, en aðeins 10% læknanema.
Haldið var þing norrænna læknaskóla hér í
Reykjavík í október. Nokkrir fulltrúar frá F. L. sátu
þingið. Þar komust þeir í tæri við nokkra norræna
gauka, sem einnig sátu þingið hér. Þau kynni leiddu
til þess, að áhugi kviknaði hjá þeim á því að auka
og endurnýja samstarf norrænna læknanema. Var á-
kveðið að byrja á því að kynna vel skólana og fyrir-
komulag þeirra hver fyrir öðrum bréflega, halda
síðan ráðstefnu í Svíþjóð í des.-jan. til þess að ræða
málin. Stefán Karlsson (5. ár) hefur verið aðal-
sprautan af okkar hálfu fram að þessu og stendur
hann nú í ströngu við bréfaskriftir. Stefán er líka
einn þriggja manna í nefnd, sem á að kanna, hvort
ekki sé kominn tírni til að endurskoða kröfur þær,
sem gerðar eru til manna á kandídatsári, hvaða
breytingar kæmu þá helst til greina og hvernig mætti
vinna að málinu. Reyndar er héraðsskyldan laust
bundið ákvæði, sem breyta má með litlu penna-
striki, en hin eru fastari. Flest ykkar vita náttúrlega
ástæður fyrir því að þessi mál eru tekin fyrir nú.
Þar ber hæst nýju reglugerðina — það má ræða hvort
ekki sé ástæða til að breyta „árinu“ eitthvað til sam-
ræmis við hinn nýja anda hennar — og svo hafa
mörg ykkar heyrt um að borið hefur á erfiðleikum
við niðurröðun kandídata, þannig að þeir geti lokið
árinu á ekki alltof löngum tíma. Með Stefáni í nefnd-
inni eru Sigurjón Sigurðsson (7. ár) og Uggi Agn-
arsson (6. ár), en hann er formaður nefndarinnar.
Eg man eftir því frá því að ég fyrst kom inn í
deildina, að ýmsir hugsandi læknanemar hafa haft
á orði, að læknastúdentar þyrftu að koma sér upp
stefnuskrá, þar sem mörkuð væri stefna félags þeirra
í grundvallaratriðum. Með því mætti koma í veg fyr-
ir, að mál væru leyst með hentistefnu og happa-
glappaaðferðinni, en í staðinn væru málin rædd og
leyst með ákveðin grundvallarsjónarmið og mark-
mið í hug. Stjórn F. L. hefur nú fengið þrjá menn
(Jens Þórisson 5. ár, Guðmund Benediktsson 5. ár,
Einar Stefánsson 3. ár) sem kjarna að starfshópi til
að upphugsa og semja drög að stefnuskrá fyrir F. L.
Fundir hópsins verða auglýstir og öllum læknanem-
um opnir. Starfið á sennilega eftir að taka þó nokk-
urn tíma, þar sem mörg mál þarf að ræða og er ekki
áætlað að starfinu ljúki fyrr en á árinu ’1975—’76.
Hópurinn mun aðallega ræða hlutverk og stöðu
lækna í þjóðfélaginu, skipun og tilgang læknanáms
nú, gagnrýna það sem miður fer og koma sér niður
á framtíðarmarkmið í þessum efnum. Vonum við,
að fólk í yngri árgöngum, sem kannski hefur hvað
óbrenglaðastar hugsjónir í málum yfirleitt, komi og
láti ljós sitt skína og marki sín spor í stefnuskránni.
Þið munið nú sjálfsagt öll eftir kennarakönnun-
inni, sem gerð var í fyrra og átti að hrista alvarlega
upp í kennurum okkar. Við höfum setið á bunkan-
um frá því að okkur barst hann í hendur, vorum
reyndar ekki hrifin af kennaraspurningunum, skild-
um ekki tilgang sumra, gátum ekki svarað öðrum og
fannst aðrar óþarfar eða óljósar. Okkur fannst þó
kannski rétt að senda kennurunum hverjum um sig
sína dissectio. Svo heyrðum við á læknanemum að
þeir væru líka forvitnir um niðurstöðurnar. Birtist
því í þessu blaði á öðrum stað lauslegt yfirlit yfir
þær eftir Ölaf P. Jakobsson. Svona í framhaldi af
þessu má gleðja ykkur með því, að enn ein skoðana-
könnunin stendur fyrir dyrum, og nú um mál mál-
anna, takmörkunarmálið. Má eiginlega líta á þá
könnun sem nokkurs konar liðskönnun, könnun á af-
stöðu læknanema og stuðning þeirra við skoðanir
okkar og baráttu F. L. fyrr og síðar. Okkur hefur
fundist í vetur, að læknastúdentar væru í bunkum
að glata hugsjónum fyrri ára, alltof marga farið að
dreyma um Númerus-Kláusinn eða eitthvað þaðan
af verra.
Lifið heil.
Lára Halla Maack.
30
LÆKNANEMINN