Bókasafnið - Mar 2024, Qupperneq 42

42 Sveinbjörg Sveinsdóttir
Stofnkostnaður við kerfisinnleiðingu hljóðaði upp á tæpar 44 m.kr. í samningi og árlegt
þjónustugjald eftir gangsetningu reiknaðist í kringum 42 m.kr. Samningurinn er til átta ára
með möguleika á framlengingu um fjögur ár þannig að samningstími getur teygt sig í tólf
ár ef áhugi verður á því.
Undirbúningur og samkomutakmarkanir
Ekki var beðið boðanna þegar samningur var í höfn og hófst undirbúningur verkefnisins
með formlegum hætti á fjarfundi aðila 18. nóvember 2020. Þetta átti eftir verða fyrsti fjar­
fundurinn af mörgum því heimsfaraldur stóð yfir og lokaði á möguleika á ferðum milli landa.
Innleiðingarárin mörkuðust af samkomutakmörkunum, fjarvinnu og ­fundum, áhyggjum
og veikindum. Þessar ytri aðstæður bættu í álag sem fyrir var vegna innleiðingar nýs bóka­
safnskerfis.
Á fjögurra mánaða undirbúningstíma verkefnisins voru unnar hönnunarlýsingar fyrir
umsömdu kerfisviðbæturnar, kerfishögun ákveðin auk þess sem lögð var lokahönd á verk­
og tímaætlun. Verkáætlun var frá upphafi mjög stíf en gert var ráð fyrir gangsetningu kerfa
í júní 2022 og átti sú tímasetning eftir að standast.
Mynd 8: saMninguM MiLLi Landskerfi bókasafna og ex Libris fagnað á fJarfundi