Morgunblaðið - 10.05.2003, Page 24

HÖFUÐBORGARSVÆÐIÐ
24 LAUGARDAGUR 10. MAÍ 2003 MORGUNBLAÐIÐ
FORELDRAR barna í einkareknum leik-
skólum í borginni komu saman utan við fund-
arstað Leikskólaráðs Reykjavíkur við
Tryggvagötu í gær til að mótmæla því að nið-
urgreiðslur til barna í einkareknum leikskól-
um eru lægri en niðurgreiðslur til barna í leik-
skólum reknum af borginni.
Að sögn Sigríðar Guðlaugsdóttur, tals-
manns foreldranna, er tilefni mótmælanna sú
afgreiðsla Leikskólaráðs að fella tillögu þess
efnis að hækka niðurgreiðslur til einkareknu
leikskólanna. „Við erum mjög ósátt við þetta,“
segir Sigríður. „Staðan er sú að Leikskólar
Reykjavíkur anna ekki eftirspurn eftir leik-
skólaplássi og það er þar sem einkareknu
leikskólarnir koma inn. Þeir eru með 700–800
leikskólapláss og börnin sem nýta þau eru
langflest á biðlistum hjá borginni.“ Óttast for-
eldrarnir að verði ekkert að gert leggist
rekstur einkareknu leikskólanna af og þar
með þessi 700–800 rými.
Sem dæmi um muninn á niðurgreiðslunum
nefnir Sigríður að Reykjavíkurborg greiði
716.652 krónur á ári með hverju eins árs
gömlu barni sem sé á leikskóla reknum af
borginni en einungis 292.200 krónur með
hverju barni á einkareknu leikskólunum.
Munurinn þarna er 424.452 krónur. Hún tek-
ur þó fram að þar sé á ferðinni grófasta dæm-
ið. „Munurinn á niðurgreiðslunum fer aðeins
minnkandi eftir því sem börnin verða eldri en
á hinn bóginn eru það börn á aldrinum eins til
þriggja ára sem eru á einkareknu leikskól-
unum því það eru þau sem eru á biðlistunum.“
Þessi munur kemur að sögn Sigríðar svo
niður á foreldrum því þeir sem eru með börn
sín í fullri dagvistun á einkareknu leikskól-
unum borgi um 10.000 krónum meira í leik-
skólagjöld á mánuði en aðrir foreldrar.
„Þessu viljum við einfaldlega mótmæla og
reyna að knýja á um breytingar því okkur
finnst þetta vera sjálfsagt réttlætismál.“
Fyrir fund Leikskólaráðs í gær afhentu
foreldrarnir formlega undirskriftalista með
nöfnum 340 foreldra og fóru fram á að málið
yrði tekið upp að nýju í ráðinu. Að sögn
Bjarkar Vilhelmsdóttur, fulltrúa R-listans,
var það gert. Fyrir hafi legið tillaga sjálfstæð-
ismanna um að jafna niðurgreiðslur en hún
hafi verið felld.
„Við leggjum áherslu á að skoða málefni
einkareknu leikskólanna í heildarsamhengi
við uppbyggingu í leikskólamálum,“ segir
hún. „Við viljum m.a. bjóða einkareknu leik-
skólunum upp á þjónustusamning sem myndi
fela í sér að foreldrar borguðu það sama og
hjá borgarreknu leikskólunum og leikskól-
arnir fengju sömuleiðis sömu niðurgreiðslur.
Þá væri líka hægt að gera ráð fyrir þessum
leikskólum í okkar heildaráætlunum.“
Foreldrar mótmæla lágum greiðslum til einkarekinna leikskóla
Morgunblaðið/Sverrir
Foreldrar afhentu Þorláki Björnssyni, formanni Leikskólaráðs, undirskriftir 340 manns þar
sem lágum niðurgreiðslum til einkarekinna leikskóla er mótmælt.
Reykjavík
Munurinn allt að 424
þúsund með hverju barni
FRAMKVÆMDIR eru langt komnar við að bæta
aðgengi að Snoppu á Seltjarnarnesi en svo nefnist
oddinn þar sem eyjan Grótta tengist landi. Fram-
kvæmdirnar felast í endurbótum og stækkun bíla-
stæða auk þess sem sjóvarnargarður á svæðinu
hefur verið endurbyggður.
Í frétt frá bænum segir að aðsókn að útivist-
arsvæðinu á vesturhluta Seltjarnarness sé sífellt
að aukast. Þau bílastæði sem fyrir voru hafi því
ekki annað umferðinni og því hafi verið ákveðið að
ráðast í að endurbæta aðstöðuna.
Nýja aðstaðan verður malbikuð og rúmbetri en
eldri stæði auk þess sem vegspottinn frá Bygg-
görðum verður endurbættur en nú þegar er mal-
bikaður hjóla- og göngustígur fyrir hendi.
Aðgengi við
Snoppu bætt
Seltjarnarnes
TILLAGA YRKI arkitekta sf.
fékk 1. verðlaun í boðskeppni um
skipulag og hönnun þjón-
ustubygginga fyrir aldraða sem
Markarholt hyggst reisa í Mörk-
inni. Höfundar tillögunnar eru
Ásdís Helga Ágústsdóttir og Sól-
veig Berg Björnsdóttir arkitektar
en Hönnun hf. kom að verkfræði-
vinnu.
Samkeppnin fór fram í sam-
starfi við Arkitektafélag Íslands
og voru valdar sjö arkitekta-
stofur til þátttöku úr 35 umsókn-
um. Miðað er við að íbúðir verði í
fjórum stærðum, 60, 75, 90 og
110 fermetrar að flatarmáli. Í
þjónustukringlu verði heima-
hjúkrun, dagvist og heilsu- og fé-
lagsþjónusta.
Markarholt er sjálfseign-
arstofnun sem sett var á fót af
hópi áhugafólks í því skyni að
vinna með eldra fólki og opinber-
um aðilum að uppbyggingu
heilsu- og félagsþjónustu ásamt
hjúkrunarrýmum og íbúðum. Í
mati sínu lagði dómnefnd til
grundvallar aðkomu að byggingu
og lóð, listræn efnistök bygginga
og lóðar, innra fyrirkomulag og
kostnaðargát. Verðlaunatillagan
byggist á hugmynd um þorp þar
sem þjónustukringla er nið-
urgrafin og lögð grasi til að
mynda samfellt útivistarsvæði. Í
umsögn dómefndar segir að
þorpshugmyndin sé áhugaverð,
svæðið sé opið og aðlaðandi fyrir
gesti og gangandi, auk þess sem
ytri rými séu í góðum tengslum
við þá byggð sem fyrir er.
Í dómnefnd áttu fulltrúa Mark-
arholt, Skipulags- og bygging-
arsvið Reykjavíkurborgar og
Arkitektafélag Íslands. Eygló
Stefánsdóttir var formaður dóm-
nefndar.
Morgunblaðið/Kristinn
Höfundar verðlaunatillögunnar, Sólveig Berg Björnsdóttir og Ásdís Helga
Ágústsdóttir arkitektar hjá YRKI arkitektum sf.
YRKI arkitektar
hlutu 1. verðlaun
Sogamýri
Hönnunarsamkeppni um þjónustu-
byggingar fyrir aldraða í Mörkinni
FORSÆTISRÁÐUNEYTIÐ hefur ákveðið að
veita 500 þúsund krónur til gerðar viðskiptaáætl-
unar um byggingu menningarhúss í Bessastaða-
hreppi. Þetta kemur til viðbótar þeirri hálfu millj-
ón sem sveitarstjórn hreppsins hefur ákveðið að
veita til verkefnisins.
Í frétt á heimasíðu hreppsins kemur fram að
formaður sérstakrar viðræðunefndar um málið
hafi sent ráðuneytinu bréf í síðasta mánuði þar
sem óskað var eftir stuðningi við verkefnið.
Fá styrk fyrir
menningarhús
Bessastaðahreppur
♦ ♦ ♦