Morgunblaðið - 05.11.2003, Blaðsíða 12
FRÉTTIR
12 MIÐVIKUDAGUR 5. NÓVEMBER 2003 MORGUNBLAÐIÐ
Endurskoðendur Aco-
Tæknivals, ATV,
KPMG, hafa sent
stjórn ATV álit þar
sem fram kemur að
ekki komi til breytinga
á árshlutareikningi
ATV fyrir fyrstu sex
mánuði ársins en
stjórnin taldi að ekki
væri allt með felldu
hvað varðar samruna
Aco og Tæknivals. Mun
stjórn ATV ekki aðhaf-
ast frekar í málinu að
svo stöddu þrátt fyrir
að hún telji að ekki hafi
verið rétt staðið að
samrunanum.
Í byrjun september
sl. kynnti stjórn AcoTæknivals
Kauphöll Íslands þá afstöðu að sitt-
hvað kynni að vera athugavert við
samruna Tæknivals og Aco í árs-
byrjun 2001. Taldi stjórn ATV að
efnahagur Aco hafi verið ofmetinn
um a.m.k. 100 milljónir króna. Var
skoðun stjórnarinnar byggð á áliti
Ernst & Young.
Í kjölfarið var AcoTæknival sett á
athugunarlista Kauphallarinnar.
Kauphöllin taldi það ekki sitt
verkefni að rannsaka málið
Stjórn AcoTæknivals óskaði eftir
því við Kauphöllina að það yrði
rannsakað hvort eitthvað í umrædd-
um samruna hefði brotið gegn þeim
reglum sem gilda um starfsemi fé-
laga hér á landi og þá einkum með
tilliti til ábyrgðar forsvarsmanna fé-
lagsins eða félaganna á þeim tíma.
Kauphöllin telur það ekki verkefni
sitt að taka að sér frekari rannsókn
á máli þessu og vísar til þar til
bærra yfirvalda, að því er segir í til-
kynningu til Kauphallar Íslands.
Stjórn AcoTæknivals óskaði eftir
því við endurskoðendur félagsins,
KPMG Endurskoðun, að þeir könn-
uðu hvort þau atriði sem vörðuðu
fyrrgreinda afstöðu stjórnar félags-
ins á samrunanum hefðu áhrif á
reikningsskil félagsins miðað við 30.
júní 2003.
Viðskiptakröfur afskrifaðar
fyrir 199 milljónir
Í áliti KPMG kemur fram að í sex
mánaða uppgjöri 2001, sem var
fyrsta uppgjör sem gert var í sam-
einuðu félagi, hafi í rekstrarreikn-
ingi verið gerð sérstök niðurfærsla
vegna krafna og eignarhluta í fé-
lögum að fjárhæð 119 milljónir
króna. Í ársreikningi fyrir 2001
kemur fram í skýringum að gjald-
færð er sérstök niðurfærsla og af-
skrift vörubirgða að fjárhæð 205
milljónir króna sem færð er með
vörunotkun. Þá kemur einnig fram í
skýringum að gjaldfærð er niður-
færsla og afskrift viðskiptakrafna og
eignarhluta í öðrum félögum, meðal
annars rekstrarkostnaðar að fjár-
hæð 179 milljónir króna. Tap á árinu
2001 nam 1.081 milljón króna. Í árs-
lok 2001 voru til í niðurfærslusjóði
viðskiptakrafna 86 milljónir króna
til að mæta þeim kröfum sem hugs-
anlega kynnu að tapast.
Á árinu 2002 var enn frekar lagt í
niðurfærslusjóð viðskiptakrafna
þannig að hann nam um 110 millj-
ónum í árslok 2002. Á þessu tímabili
frá samruna félaganna hafa endan-
lega verið afskrifaðar viðskiptakröf-
ur að fjárhæð 199 milljónir króna
þannig að ljóst má vera að verulegar
fjárhæðir hafa verið færðar til
gjalda í rekstrarreikningi félagsins
vegna niðurfærslu vörubirgða og
viðskiptakrafna, að því er fram kem-
ur í áliti KPMG.
Að sögn Skarphéðins Berg Stein-
arssonar, stjórnarformanns ATV,
mun stjórnin ekki aðhafast frekar í
þessu máli að svo stöddu hvað svo
sem síðar muni koma í ljós. Hins
vegar muni stjórn ATV áfram skoða
hvort ástæða kunni að vera til að
rannsaka þetta mál frekar. Það sé
eftir sem áður skoðun stjórnarinnar
að ekki hafi verið staðið að samrun-
anum og skýrslugjöf um hann með
eðlilegum hætti.
Sex mánaða uppgjör ATV óbreytt
Ekkert aðhafst
að svo stöddu
Morgunblaðið/Golli
Árshlutareikningur ATV gefur rétta mynd af nú-
verandi stöðu félagsins, samkvæmt áliti KPMG.
HUGBÚNAÐARFYRIRTÆKIÐ
Maritech sem sérhæfir sig í hugbún-
aði fyrir sjávarútveg og fiskeldi, hefur
eignast 100% hlut í Ark Computing í
Bretlandi, sem verður nú Maritech
UK. Kaupverð er ekki gefið upp. Ark
Computing hefur séð um sölu og
þjónustu á sjávarútvegslausnum
Maritech undanfarin tvö og hálft ár.
Halldór Lúðvígsson, forstjóri
Maritech, segir að Maritech hafi
keypt 30% hlut í Ark Computing fyrir
tveimur og hálfu ári, en nú hafi verið
ákveðið að kaupa fyrirtækið að fullu
sem lið í að styrkja markaðssókn
Maritech á Bretlandseyjum. „Við höf-
um náð ágætis árangri en teljum okk-
ur geta gert betur. Með því að ná full-
um tökum á félaginu getum við
skerpt áherslur félagsins á sjávarút-
veg,“ sagði Halldór í samtali við
Morgunblaðið. Hann segir að Ark
Computing sé fimm manna fyrirtæki,
sérhæft í Microsoft Business Sol-
utions lausnum og hafi verið í eigu
starfsmanna. Velta fyrirtækisins á
síðasta ári nam um 100 milljónum
króna. Aðspurður segir Halldór að
Maritech hafi gengið vel í Bretlandi í
sölu, sérstaklega á hugbúnaðarlausn-
um fyrir fiskeldi. „Markmið okkar er
að styrkja Maritech UK, og sjá
áframhaldandi vöxt. Það er mín skoð-
un að þetta félag eigi mikið inni og að
við getum náð mun meiri markaðs-
hlutdeild í Bretlandi en við höfum
gert hingað til.“
Ný skrifstofa í Seattle
170 manns starfa hjá Maritech
Group, sem auk Íslands og Bretlands
er með skrifstofur í Chile, Kanada og
Noregi. Viðskiptavinir eru um 800 í
12 löndum. Velta félagsins á síðasta
ári nam 1,8 milljörðum króna. Að-
spurður segist Halldór búast við að
Maritech haldi áfram að vaxa, og vaxi
um 30% á næsta ári, en meginvöxtur
félagsins er í Norður-Ameríku að
hans sögn. „Við höfum verið með
skrifstofu í Halifax og erum að opna
skrifstofu í Seattle þar sem eru tals-
verðir vaxtarmöguleikar,“ sagði Hall-
dór að lokum.
Maritech kaupir
breskt fyrirtæki
VIÐSKIPTI
HANNES Hlífar Stefánsson
(2.567) vann það afrek að sigra mol-
davíska stórmeistarann Viktor Bo-
logan (2.673) í aðeins 17 leikjum í
sjöttu umferð Mjólkurskákmótsins á
Hótel Selfossi. Það er afar sjaldgæft
að ofurstórmeistarar tapi í innan við
20 leikjum, hvað þá með hvítu eins og
gerðist í þessari skák.
Bologan er í 27. sæti á heimslista
FIDE, sem telur um 50.000 skák-
menn. Hann er jafnframt þriðji stiga-
hæsti skákmaðurinn á stórmeistara-
mótinu á Selfossi. Bologan hefur
unnið margt afrekið á skákferli sín-
um. Þannig sigraði hann á gríðarlega
sterku skákmóti í Dortmund í ágúst
sl. þar sem þeir Viswanathan Anand
(2.774) og Vladimir Kramnik (2.785)
urðu að láta sér lynda að deila öðru
sætinu, vinningi á eftir Bologan.
Það er athyglisvert við viðureign
þeirra Bologans og Hannesar, að
fyrstu tíu leikirnir höfðu áður komið
upp í einvígi þeirra í heimsmeistara-
keppninni í Nýju-Delhí á Indlandi ár-
ið 2000. Fyrsti leikur Bologan frá eig-
in brjósti var því sá ellefti og þeir
urðu einungis sjö áður en hann
neyddist til að gefa, en þá hafði staða
hans farið versnandi með hverjum
leik. Þessi sögulega skák tefldist
þannig:
Hvítt: Viktor Bologan
Svart: Hannes Hlífar Stefánsson
Ítalski leikurinn
1.e4 e5 2.Rf3 Rc6 3.Bc4 Bc5 4.c3
Rf6 5.d3 a6 6.Bb3 d6 7.Rbd2 0–0 8.h3
Be6 9.Rf1 h6 10.g4 Rh7 --
Sjá stöðumynds 1.
11.g5? --
Bologan hyggst endurbæta skák
þeirra Hannesar á heimsmeistara-
móti í Nýju Delhi 2000, en í þeirri
skák lék Bologan 11. Hg1, en skák-
inni lauk með jafntefli
Endurbótin er þó algjörlega mis-
heppnuð og taflmennska Bologans er
ótrúleg til loka skákarinnar.
11. . . hxg5 12. Hg1 Bxb3 13. axb3 --
Eftir 13. Dxb3 Df6 14. R1h2 Bb6
15. Bxg5 Rxg5 16. Hxg5 er staðan
nokkuð jöfn.
13. . . f5!
Hannes opnar f-línuna til að sækja
að riddaranum á f3 og peðinu á f2.
14. exf5? --
Betra er 14. Bxg5 Dd7 15. Bh6 Hf7
16. Hg3 Rf6 o. s.frv.
14. . . Hxf5 15. Rg3 Hf7 16. b4 Bb6
17. Be3? --
Bologan hefur gjörsamlega misst
tökin á stöðunni og tapar nú manni.
Eftir 17. Rf1 d5 18. Re3 e4 19. dxe4
dxe4 20. Rxg5 Rxg5 21. Dxd8+ Hxd8
22. Hxg5 Hdf8 getur hvítur barist
áfram, þótt svartur eigi yfirburðatafl.
17. . . Df6
Sjá stöðumynd 2.
og hvítur gafst upp.
Eftir 18. b5 Rd8 19. Rh2 Bxe3 20.
Rg4 Bxf2+ 21. Kf1 Df4 22. Rh5 Df5
23. Hh1 Bh4+ 24. Kg2 Re6 á svartur
mann yfir og unnið tafl.
Önnur úrslit í sjöttu umferð urðu
þau, að Francisco Vallejo Pons og
Vladimir Malakhov gerðu jafntefli,
einnig þeir Laurent Fressinet og Iv-
an Sokolov. Þá sigraði Nick deFirmi-
an Þröst Þórhallsson. Skák þeirra
Nikolic og Rowson lauk með jafntefli
og heldur Nikolic því forystunni á
mótinu.
Sjöunda umferð á mótinu verður
tefld í dag, en teflt er daglega og um-
ferðir hefjast klukkan 15. Mjög góð
aðstaða er fyrir áhorfendur á móts-
stað, en aðgangur er ókeypis.
Hannes sigraði Bol-
ogan í 17 leikjum
SKÁK
Hótel Selfoss
MJÓLKURSKÁKMÓTIÐ
28. okt.–7. nóv. 2003
Daði Örn Jónsson
Bragi Kristjánsson
Stöðumynd 1. Stöðumynd 2.
dadi@vks.is
FORVARNASTARF í fíkniefnamál-
um líður fyrir það að verkefni sem
stjórnvöld styrkja eru oftar en ekki
skammtímaverkefni og því ekki hægt
að treysta á fjármagn til lengri tíma.
Forvarnir eru langtímaverkefni sem
þarf að skipuleggja og vinna á
löngum tíma með markvissum hætti.
Árni Einarsson, framkvæmda-
stjóri Fræðslumiðstöðvar í fíknivörn-
um (FRÆ), segir þetta hamla starf-
semi þeirra sem treysta á fjármagn
frá hinu opinbera, og sníða þeim
þröngan stakk og þess vegna þurfi að
leita annað eftir styrkjum. „Lang-
flest verkefni sem stjórnvöld styrkja
eru skammtímaverkefni. Það gerir
þeim sem vilja vinna til lengri tíma
mjög erfitt um vik, því þeir vita ekki
hvort von sé á áframhaldandi styrkj-
um eða ekki,“ segir Árni.
Skýringar á þessari áherslu á
skammtímaverkefni segir Árni hugs-
anlega vera leifar frá gamalli tíð þeg-
ar menn litu á forvarnaverkefni sem
aukaverk. Einnig vilji stjórnmála-
menn gjarnan sjá árangur strax, en
það geti reynst erfitt. Hugarfars-
breytingar taki tíma og margt verði
að vinna saman til þess að vænta
megi viðvarandi árangurs. Áhersla á
skammtímaverkefni valdi því að ekki
sé æskileg samfella í forvarnastarfi
en það komi niður á skipulagningu og
langtímamarkmiðum.
Fræðslumiðstöðin er 10 ára í dag
og rekin að mestu leyti fyrir styrki
frá almenningi og fyrirtækjum. Á
þeim 10 árum sem FRÆ hefur verið
starfandi hefur margt í forvarna-
starfsemi gegn vímuefnum breyst,
og margt til batnaðar. „Vitund fólks
almennt um mikilvægi forvarna hef-
ur verið að aukast,“ segir Árni. Hann
segir að sem betur fer
sé ekki lengur einblínt
á að byrgja brunninn
eftir að barnið er dottið
ofan í.
Starfið grundvallað
á rannsóknum
„Við settum okkur
það markmið með
þessari miðstöð að
starf okkar myndi
grundvallast á rann-
sóknum og því sem
best væri vitað og
menn teldu vænlegast
til árangurs á hverjum
tíma. Einnig var það
okkar markmið að taka
þátt í að virkja sem
flesta í samfélaginu,
t.d. foreldra, skóla og íþróttafélög,
með fræðslu og upplýsingum til að
taka þátt í þessu starfi á þeim grund-
velli að vímuefnamál snerti allt sam-
félagið. Þetta er ekki verkefni sem
menn geta verið að vinna með enda-
lausum átökum, reyna að hreinsa til á
borðinu í eitt skipti fyrir öll,“ segir
Árni.
Hann segir að margt hafi áunnist á
þessum 10 árum. Nú þyki sjálfsagt
að forvarnir séu hluti af daglegum
verkefnum skóla og íþróttahreyfing-
in hafi verið að taka sér tak í þessum
efnum. Einnig hafa mörg sveitar-
félög sett sér sérstakar vímuvarna-
áætlanir og foreldrar hafa sömuleiðis
verið að opna augun í þessum málum.
„Ef við lítum í eigin barm hefðum
við auðvitað viljað gera meira. Við
þurfum hins vegar að sníða okkur
stakk eftir vexti og fjármagnið sem
við höfum handa á milli hverju sinni
ræður ferðinni. Við
byggjum verkefni okk-
ar fyrst og fremst á
styrkjum og framlögum
frá stofnunum, einstak-
lingum og fyrirtækjum.
Á síðasta ári voru styrk-
ir sem við fengum frá
stjórnvöldum u.þ.b.
15% af rekstrarfé okk-
ar. Hitt sækjum við út í
samfélagið og njótum
þar heilmikillar velvild-
ar.“
Ný vefsíða í
mánuðinum
Árni segir að mið-
stöðin ætli að halda
áfram að vinna á þeim
grundvelli sem lagt var
upp með fyrir 10 árum, að byggja
starfið á rannsóknum og þekkingu.
Nú er unnið hörðum höndum að því
að setja upp nýja vefsíðu FRÆ, for-
varnir.is, en þar verður hægt að nálg-
ast upplýsingar um fíkniefnamál og
forvarnir. Árni segist vonast til að
síðan komist í gagnið í þessum mán-
uði. Dreifingu á bókinni Fíkniefni og
forvarnir, handbók fyrir heimili og
skóla, er nú að ljúka, en á síðustu
tveimur árum hefur um 6.000 eintök-
um af bókinni verið dreift til heimila
á landinu þar sem eru börn fædd
1987 til 1989. Nú er unnið að því að
gera fræðslu- og námsefni fyrir nem-
endur í 8. bekk grunnskóla upp úr
bókinni í samvinnu við Námsgagna-
stofnun. Er því efni ætlað að bæta úr
brýnni þörf á þess konar námsefni.
FRÆ mun áfram standa að fræðslu
og ráðgjöf á sviði forvarna á öllum
skólastigum, segir Árni.
Fræðslumiðstöð í fíknivörnum hefur starfað í áratug
Forvarnir ekki skipu-
lagðar fram í tímann
Árni Einarsson,
framkvæmdastjóri
Fræðslumiðstöðvar í
fíknivörnum.