Morgunblaðið - 23.03.2005, Blaðsíða 4

4 MIÐVIKUDAGUR 23. MARS 2005 MORGUNBLAÐIÐ
FRÉTTIR
„AUÐVITAÐ vill maður geta haldið
páskana sína hátíðlega. En ég á bara
engan pening, það er málið. Þess
vegna leita ég hingað. Hér get ég
fengið smá búbót í formi matar sem
gerir mér kleift að hafa hátíðlega
páska,“ sagði einstæð móðir á fimm-
tugsaldri, sem er með fjögur börn í
heimili, í samtali við Morgunblaðið
þar sem hún beið eftir páskaúthlut-
un Fjölskylduhjálpar Íslands sem
fram fór í gær. Sagðist hún vera að
leita til félagsins í annað skiptið á
stuttum tíma, en fjárhagur hennar
er ekki beysinn um þessar mundir
sökum þess að hún missti vinnuna
fyrir skömmu. „Það má segja að ég
sé í smá biðstöðu síðan ég missti
vinnuna, en ég er í þeirri aðstöðu að
ég get hreinlega ekki borgað af lán-
unum mínum. En þetta er bara tíma-
bundið ástand meðan ég er atvinnu-
laus. Þannig að aðstoðin frá
Fjölskylduhjálpinni kemur sér rosa-
lega vel á þessum tímapunkti.“
Blendnar tilfinningar
Aðspurð segist viðmælandi blaðs-
ins bera blendnar tilfinningar gagn-
vart því að leita sér aðstoðar. „Mér
finnst auðvitað mjög leiðinlegt að
þurfa að koma hingað, en hins vegar
hjálpar það mér mikið hversu ynd-
islegar manneskjurnar eru sem hér
vinna. Viðmót þeirra gerir þetta
mun léttbærara. Enda er það sjálf-
sagður hlutur að leita hingað ef mað-
ur þarf virkilega á því að halda og að
mínu mati er þetta ekkert til að
skammast sín fyrir. En auðvitað er
þetta erfitt og maður myndi ekki
gera þetta nema vegna þess að mað-
ur nauðsynlega þarf á aðstoðinni að
halda, það er alla vega mín afstaða.“
„Mér finnst mjög erfitt að koma
hingað og leita mér aðstoðar. Þetta
er eitthvað sem maður hefur aldrei
þurft að gera áður í lífinu. Mér finnst
maður vera orðinn eitthvað svo lítill
og bágur að þurfa að gera þetta,“
segir annar viðmælandi Morgun-
blaðsins sem einnig var stödd í húsa-
kynnum Fjölskylduhjálpar Íslands.
Um er að ræða konu á sextugsaldri
sem er öryrki og tekjutryggð þannig
að hún hefur aðeins 56 þúsund krón-
ur á mánuði sér til framfærslu. Segir
hún ávallt hafa verið snúið að ná
endum saman, enda tekjurnar lágar,
en að ástandið hafi fyrst orðið veru-
lega slæmt eftir að maðurinn hennar
missti atvinnuna fyrir skömmu. Eru
þau hjónin með tvö ungmenni á
heimilinu á sinni framfærslu. „Við
vorum líka í vandræðum fyrir jólin,
en eftir áramót varð maðurinn minn
atvinnulaus og þá versnaði ástandið
til muna. En ég vona að þetta lag-
ist.“
Segir hún þetta í þriðja skiptið á
síðustu mánuðum sem hún leitar að-
stoðar hjá Fjölskylduhjálpinni. „Það
er mjög gott að koma hingað, í raun
alveg yndislegt miðað við allt og allt,
enda vilja starfskonurnar allt fyrir
mann gera. Það má segja að það að
fá páskaúthlutunina núna geri okkur
hreinlega kleift að hafa eitthvað á
boðstólum um páskana.“ Spurð
hvernig aðstaðan væri ef Fjöl-
skylduhjálparinnar nyti ekki við hik-
ar viðmælandi blaðamanns áður en
hún segir svo lágróma: „Það væri
mjög slæmt. Ég get satt að segja
ekki hugsað þá hugsun til enda hvað
ég myndi gera ef ég gæti ekki leitað
hingað. Það er því mjög gott að fá
aðstoð á borð við þessa.“
Erfitt en ekkert til að
skammast sín fyrir
Morgunblaðið/Golli
Mæðrastyrksnefnd er einn þeirra aðila sem veita aðstoð fyrir páskana.
Myndin er tekin af starfsstúlkum nefndarinnar við vinnu sína nýverið.
„HÉR var fullt úr úr dyrum og
löng biðröð fyrir utan þegar út-
hlutunin hófst,“ sagði Anna Auð-
unsdóttir, varaformaður Fjöl-
skylduhjálpar Íslands, í samtali við
Morgunblaðið,
en mikið var að
gera hjá félaginu
í gær þegar sér-
stök páskaút-
hlutun fór fram í
húsakynnum
þess. Sagði hún
alla hafa sýnt
þolinmæði og
góða biðlund.
„Þetta gekk
ótrúlega vel fyrir sig og góð
stemning var á staðnum.“
Aðspurð áætlar Anna að á bilinu
130–140 fjölskyldur hafi fengið út-
hlutun hjá Fjölskylduhjálpinni í
gær, en gera má ráð fyrir að að
baki hverri umsókn séu allt frá
einum upp í sex einstaklinga. Seg-
ir hún einstæða feður, sem eru
með börnin sín yfir páskana, hafa
verið mjög áberandi meðal um-
sækjenda í gær.
Spurð hvort þau hafi náð að
sinna öllum umsóknum svarar
Anna því játandi. „Það fengu allir
eitthvað í restina, en reyndar var
þá allt kjöt- og fiskmeti búið. En
það fór enginn í fýlu, enda ennþá
nóg til af alls kyns dósa- og pakka-
mat sem auðvitað kemur í góðar
þarfir.“
Allir fengu
eitthvað
Anna Auðunsdóttir
STEFNT er að því að ný verksmiðja
sem framleiða á vörubretti úr endur-
unnum pappír taki til starfa í hús-
næði Kísiliðjunnar í Mývatnssveit
innan árs og að þar starfi 18–20
manns. Landeigendur í Reykjahlíð
keyptu húsnæði Kísiliðjunnar fyrir
skömmu og sagði Ólafur H. Jónsson,
formaður Félags landeigenda, að
þegar ljóst var að ekkert yrði af kís-
ilduftverksmiðju í húsunum, hefði
legið beinast við að kanna aðrar hug-
myndir. „Landeigendur hafa haft þá
yfirlýstu stefnu að sækja frekar
verkefni til sín en að bíða eftir að
aðrir komi með þau til þeirra.“
Ólafur sagði að þarna væri um að
ræða fjárfestingu upp á um 1.800
milljónir króna og að fjármögnun
verkefnisins væri að mestu lokið.
Iðnaðarráðuneytið hafði lofað um
200 milljóna króna framlagi í fyrir-
hugaða kísilduftverksmiðju. Ólafur
sagðist gera sér vonir um að Ný-
sköpunarsjóður beini þeim fjármun-
um inn í þetta verkefni.
Nýlega undirrituðu landeigendur
viljayfirlýsingu ásamt sveitarstjórn
Skútustaðahrepps, iðnaðarráðu-
neytisins og íslenskum frumkvöðl-
um, um að stefnt skuli að því að
starfrækja verksmiðju í húsnæði
Kísiliðjunnar til framleiðslu á vöru-
brettum úr endurunnum pappír sem
til fellur hér á landi. Ólafur sagði að
þetta væri verksmiðja sem notaði
mikla orku og að til framleiðslunnar
yrði notuð vél sem hefði verið í þróun
undanfarin ár og reynst vel. Fram-
leiðslan verður í lokuðu kerfi og það
umhverfisvænsta sem hægt er að
hugsa sér í stóriðju sem þessari, að
sögn Ólafs.
Hann sagði það nauðsynlegt að
landeigendur og íbúar á svæðinu
væru með í svona fyrirtæki, öðruvísi
náist ekki hámarksárangur. „Það er
þess vegna sem við erum harðir á því
að orkan í Suður-Þingeyjarsýslu eigi
að vera á hendi þeirra sem þar eiga
land og þar búa.“
Húsnæði Kísiliðjunnar í Mývatnssveit fær nýtt hlutverk
Morgunblaðið/Birkir Fanndal
Húsnæði Kísiliðjunnar við Mývatn gæti í framtíðinni hýst verksmiðju sem framleiðir vörubretti.
Fjármögnun nær lokið
Á LISTA Samræmdrar vefmæl-
ingar hefur nú verið bætt við frek-
ari upplýsingum um heimsóknir á
vefsvæði mbl.is. Þegar slóðin
http://www.modernus.is/ er valin
birtist listi með stærstu vefjum
landsins. Fyrir aftan nafn mbl.is er
plúsmerki. Þegar smellt er á það
opnast svæði þar sem bætt hefur
verið við tveim nýjum vefhlutum,
Forsíðan og Fréttavefur – annað. Á
listanum má sjá að í síðustu viku
heimsóttu 164.927 stakir gestir alla
vefi mbl.is. Þar af byrjuðu 151.837
gestir heimsóknir á forsíðu mbl.is
sem eru rúmlega 95% allra gesta
mbl.is. Gestir sem skoðuðu innhald
frétta sem voru á forsíðu mbl.is
voru 107.902 eins og sjá má á vef-
hlutanum Fréttavefur – annað.
Fyrirtækið Modernus sér um
mælingu á öllum stærstu vefjum
landsins og birtir lista einu sinni í
viku þar sem sjá má fjölda notenda,
innlit og flettingar. Þrír vefir
mbl.is, visir.is og eve-online birta
þess utan upplýsingar um vefsvæði
sem tengjast vefjum þeirra.
Fyllri upplýs-
ingar um heim-
sóknir á mbl.is
ÚRSKURÐARNEFND um holl-
ustuhætti og mengunarvarnir hefur
komist að þeirri niðurstöðu að Um-
hverfis- og heilbrigðisstofu Reykja-
víkur hafi verið óheimilt að setja
dreifingarbann á drykkinn Kristal
plús, sem Ölgerðin Egill Skalla-
grímsson framleiðir. Í tilkynningu
frá Ölgerðinni kemur m.a. fram að
fyrirtækið íhugi að krefja Reykja-
víkurborg um skaðabætur.
Úrskurðarnefndin telur að ekki
verði séð að refsingar og viðurlög í
reglugerð um aukaefni í matvælum
eigi við um úrræði stjórnvalda um
bætiefni í matvælum. Ekkert sé
frekar í lögum um matvæli sem
styðji aðgerðir Umhverfis- og heil-
brigðisstofu. Fellst nefndin því á það
með Ölgerðinni að ekki hafi verið
heimilt að setja dreifingarbann á
umræddan drykk.
Ölgerðin íhugar
bótakröfu á
Reykjavíkurborg
HAFÍSINN heldur áfram að hopa en
flugvél Landhelgisgæslunnar fór í
gær í eftirlits- og ískönnunarflug úti
fyrir Norðurlandi og Vestfjörðum.
Að sögn Veðurstofunnar eru sigl-
ingaleiðir orðnar vel greiðfærar úti
fyrir öllu Norðurlandi. Siglinga-
leiðin fyrir Horn var sömuleiðis orð-
in fær en varasöm vegna stöku smá-
jaka. Ísspöngin var næst landi um
sex sjómílur norður af Horni.
Siglingaleiðir
greiðfærar úti
fyrir Norðurlandi
ALLSHERJARNEFND Alþingis
mælir með því að starfsemi mat-
vöruverslana, sem uppfylla ákveðin
skilyrði, verði heimiluð föstudaginn
langa, páskadag og hvítasunnudag.
Björn Bjarnason dómsmálaráðherra
lagði frumvarp þess efnis fram á Al-
þingi í vetur. Allsherjarnefnd hefur
fjallað um frumvarpið og leggur til
að það verði samþykkt. Skilyrðin
sem matvöruverslanirnar þurfa að
uppfylla eru þau að verslunarrýmið
sé undir 600 fermetrum og að a.m.k.
2/3 hlutar veltunnar séu sala á mat-
vælum, drykkjarvöru og tóbaki.
„Nefndin ræddi hvort frumvarpið
skerti með einhverjum hætti rétt
verslunarfólks til frítíma, en telur að
kjarasamningar verndi þann rétt
með afgerandi hætti,“ segir m.a. í
áliti nefndarinnar.
Áður en frumvarpið verður sam-
þykkt, þarf það að fara til annarrar
og þriðju umræðu á Alþingi. Líklegt
er talið að það verði samþykkt fyrir
þinglok í vor.
Fái að hafa opið
um páskana
Í GÆR voru sprengjusérfræð-
ingar Landhelgisgæslunnar
kallaðir út eftir að tilkynning
um að tundurdufl hefði fundist
á Langanesi barst Gæslunni frá
lögreglunni á Þórshöfn. Tund-
urduflið var breskt, frá tímum
seinni heimsstyrjaldarinnar og
fannst í flæðarmálinu við
Lambanes.
Sprengjusérfræðingar Gæsl-
unnar fóru á vettvang til þess
að eyða því og var það sprengt
um miðjan dag í gær. Er
sprengjusérfræðingarnir höfðu
verið á staðnum um tíma fundu
þeir tvö tundurdufl til viðbótar.
Ákveðið var að bíða til morguns
og eyða þeim í birtingu í dag.
Að sögn Gylfa Geirssonar,
yfirmanns sprengjudeildar
Landhelgisgæslunnar, getur
talsverð hætta skapast ef menn
fara að eiga við tundurduflin.
Sú hætta sé fyrir hendi að
tundurduflið springi ef menn
reyni t.a.m. að opna þau. Því sé
mikilvægt að fólk haldi sig
fjarri og láti lögreglu vita.
Þrjú tundurdufl fundust á
Langanesi og eru sprengju-
sérfræðingar Gæslunnar bún-
ir að eyða einu þeirra.
Þrjú tund-
urdufl
fundust á
Langanesi