Morgunblaðið - 13.04.2006, Blaðsíða 23
MORGUNBLAÐIÐ FIMMTUDAGUR 13. APRÍL 2006 23
ERLENT
Ritstjórar bandaríska götublaðsinsThe New York Post hafa vikið einumdálkahöfunda sinna, Jared PaulStern, úr starfi eftir að greint var frá
því að hann sætir rannsókn alríkisyfirvalda
vegna gruns um að hann hafi reynt að kúga
milljarðamæringinn Ron Burkle til að greiða
sér 220.000 dollara, en fyrir vikið lofaði Stern að
sjá til þess að umfjöllun á slúðursíðum New
York Post um Burkle yrði síður neikvæð.
Mál þetta hefur orðið tilefni mikillar umræðu
í fjölmiðlum vestra, en það þykir vekja spurn-
ingar um siðferði fjölmiðla og faglega blaða-
mennsku, einkum að því er varðar umfjöllun um
fræga og ríka fólkið.
Helsti samkeppnisaðili The New York Post,
blaðið Daily News, hefur gert sér mikinn mat
úr þessu máli; en Daily News hefur eins og The
New York Post haldið úti síðu þar birt er slúður
um fræga fólkið og því hvergi hlíft. Hefur Daily
News raunar einnig flett ofan af vafasömum
starfsháttum yfirmanns Sterns, Richards John-
son, en sá mun hafa þegið gjafir frá ýmsum
þeirra, sem reglulega er fjallað um á blaðsíðu
sex í New York Post, þ.e. í slúðurdálkunum
áhrifamiklu. Segir m.a. í Daily News sl. mánu-
dag að Joe nokkur Francis hafi flogið með
Johnson og vini hans í einkaþotu til Mexíkó ný-
verið, þar sem haldið var piparsveinapartí hon-
um til heiðurs og sem mun hafa kostað alls
50.000 dollara.
Segir í Daily News að reglulega birtist fréttir
af Francis á blaðsíðu sex í New York Post,
„næstum alltaf jákvæðar fréttir“.
Kvartaði við Rupert Murdoch
Mál lausapennans Sterns þykir hins vegar
enn vafasamara. Ron Burkle, sem er 56 ára og
hefur m.a. stundað fjáröflun fyrir Demókrata-
flokkinn, mun um nokkurt skeið hafa verið afar
óánægður með umfjöllun slúðurdálkahöfunda
New York Post um hann. Telur hann að oft og
iðulega hafi þar verið að finna tóma vitleysu um
hann, en aldrei hafði blaðið fyrir því að bera
fréttirnar undir hann. Er tekið sem dæmi að
blaðið hafi nýverið sagt frá því að Burkle væri í
tygjum við fyrirsætuna Gisele Bundchen, enn-
fremur að ýmsum nafngreindum aðilum, þ.á m.
leikaranum Tobey Maguire, hefði verið flogið í
einkaþotu Burkles í nýársveislu í húsi hans í
Aspen.
Lögmaður Burkles segir hins vegar að
Burkle og Bundchen séu vinir, þau hafi aldrei
átt í rómantískum samskiptum. Ennfremur að
hann eigi engar eignir í Aspen og enn síður hafi
hann látið fljúga með Maguire eða aðra þangað.
Mun Burkle hafa þótt þessi rangi fréttaflutn-
ingur svo leiðigjarn að hann skrifaði sjálfum
Rupert Murdoch, fjölmiðlakonunginum sem á
og rekur New York Post, bréf þar sem hann
kvartaði undan skrifunum. Engin breyting varð
þó á skrifum blaðsins.
Hefur Burkle sagt að hann hafi ekki verið að
kvarta undan neikvæðum fréttum um sig, ein-
ungis þeim sem bersýnilega ættu sér enga stoð í
raunveruleikanum og sem hefði mátt afstýra, ef
blaðamenn hefðu haft fyrir því að leita sannleik-
ans.
Segir Burkle hafa lagt gildru
Burkle brá því á það ráð að eiga fund með
Jared Paul Stern, sem er 36 ára gamall slúð-
urdálkablaðamaður, og hafði alríkislögregluna,
FBI, með í ráðum. Var fundur þeirra, 31. mars
sl., tekinn upp á myndband. Er fullyrt að þar
hafi Stern boðist til að sjá til þess að Burkle
fengi friðhelgi fyrir neikvæðum fréttum, gegn
því að hann borgaði honum 220.000 dollara, um
16,5 milljónir ísl. króna.
Stern skrifaði aðstoðarmanni Burkles síðar
tölvupóst þar sem hann gaf upplýsingar um það
inn á hvaða bankareikning í hans eigu mætti
leggja 100.000 dollara.
Verður þó að fylgja sögunni að Stern neitar
því algerlega í viðtali í The Washington Post að
hann hafi gerst brotlegur við lögin. Sakar hann
Burkle um að hafa lagt fyrir sig gildru, að hann
hafi einungis verið að reyna að fá Burkle til að
fjárfesta í fatalínu, sem hann hannar sjálfur, og
jafnframt bjóða honum þjónustu sína sem sér-
fræðings í almannatengslum.
Mál þetta þykir hið athyglisverðasta, enda
virðist það svipta hulunni af vafasömum vinnu-
brögðum þeirra blaðamanna vestra sem fást við
slúðurfréttir.
Slúðurfréttamennska á sér raunar langa
sögu vestra en gjarnan er talað um að Walter
Winchell hafi fundið upp þá sérgrein, að fjalla
um fræga fólkið, í blaðinu New York Evening
Graphic fyrir mörgum áratugum síðan. Virðist
sem hefð hafi síðar skapast fyrir því að ekki
væri gerð sama krafa um nákvæmni til slúð-
urblaðamanna og annarra, sem skrifa í dag-
blöðin vestra. En þeirri spurningu er nú velt
upp í The Baltimore Sun hvort slúðurfrétta-
menn sverti ekki ímynd blaða sinna og fagsins í
heild sinni ef það sé rétt að þeir þiggi gjafir
gegn því að hagræða umfjöllun sinni eða vekja
athygli á smástjörnu sem vilji koma sér á fram-
færi, svo dæmi séu tekin.
„Á 35 ára ferli hef ég aldrei heyrt annað
eins,“ hefur Washington Post hins vegar eftir
Martin Dunn, aðalritstjóra Daily News, um mál
Sterns. „Ég veit að blaðamenn kunna í gegnum
tíðina að hafa þegið flösku af viskíi frá ein-
hverjum, en ég hef aldrei heyrt um að blaða-
menn sneru dæminu alveg við, og segðu við við-
mælendur sína að þeir gætu haft áhrif á hvort
fréttir yrðu réttar eða rangar gegn því að þeim
væru greiddar háar fjárhæðir í peningum.
Þetta er alveg fáheyrt.“
Slúðurdálka-
höfundur sakaður
um fjárkúgun
Málið þykir vekja áleitnar spurningar um sið-
ferði og vinnubrögð götublaðanna bandarísku
Eftir Davíð Loga Sigurðsson
david@mbl.is
AP
Jared Paul Stern segir Ron Burkle hafa lagt
fyrir sig gildru. Stern segist ekkert misjafnt
hafa gert og ekki hafa brotið lögin.
’„Ég veit að blaðamenn kunna í gegnum tíðina að hafa
þegið flösku af viskíi frá ein-
hverjum, en ég hef aldrei
heyrt um að blaðamenn sneru
dæminu alveg við.“‘