Eimreiðin - 01.10.1924, Page 25

Þrjú kvæði.
Eftir Jakob Thórarensen.
Svefn.
Dulrænt afl það er,
hið ógurlega,
sem að svefn vér nefnum,
afl, er aftan hvern
öllu lífi
þrýstir í algleymi og þögn,
Hátt knýr himinveg
hremmivængjum
örn af móði og megni,
en höfga haldinn
hann á náttmálum
flug til jarðar fellir.
Frár er fjörhugur,
framgjörn æskan,
stæltir vöðvar sterkra,
en á eina lund
alt má lúta
á vegum hins hljóðláta valds.
Daprast dagsaugu,
drúpa foldir,
værð er um dali og voga,
maðki og hauki mild
og mengi öllu,
— móðuratlot moldar.