Tímarit lögfræðinga - 01.11.1983, Síða 7

Eins og framanskráð æviágrip ber með sér, átti Gunnar Thoroddsen að
baki óvenjulega langan og viðburðaríkan starfsferil. Það mun fágætt, ef
ekki einsdæmi hér á landi, að einn og sami maður hafi haft á hendi öll
þau embætti og störf sem Gunnar Thoroddsen gegndi um dagana — verið
tvfvegis lagaprófessor, alþingismaður um áraraðir, borgarstjóri á annan ára-
tug, sendiherra, hæstaréttardómari og þrívegis ráðherra, þar af síðast for-
sætisráðherra.
Gunnar Thoroddsen kom víða við á langri leið, og er langt frá að öll
störf hans séu tíunduð hér að framan, en aðalþættir starfssögu hans eru:
þjóðmál, embættisstörf og lögfræði.
Gunnar Thoroddsen hóf ungur afskipti af stjórnmálum. Hann var kjörinn
alþingismaður tuttugu og þriggja ára að aldri og mun vera yngsti maður,
sem sæti hefur átt á Alþingi. Hann var um áratugi áhrifamaður á Alþingi og
í flokki sínum. Um árabil var hann forystumaður og frumkvöðull í borgar-
málefnum Reykvíkinga.
Embættisstörf Gunnars Thoroddsens voru mikil og margvísleg, hvort held-
ur litið er til borgarstjóratlmabils hans, ráðherrastarfa eða sendiherrastarfa.
Er eigi unnt að rekja þá sögu hér.
Gunnar Thoroddsen kom mjög við sögu lagamanna, bæði sem lagakenn-
ari, fræðimaður og dómari. Um lagakennslu hans get ég ekki dæmt af eigin
reynd, en það mun vera sammæli nemenda hans, að hann hafi verið góður
kennari og vinsæll. Doktorsritgerð hans: Fjölmæli er vandað rit og verður
óefað lengi grundvallarrit á sínu sviði. Auk þess hefur hann ritað ýmsar rit-
gerðir um lögfræðileg efni. Gunnar var að vísu ekki lengi hæstaréttardóm-
ari, en hafa ber og I huga, að hann mun all oft hafa verið varadómari í
Hæstarétti á meðan hann var lagakennari. Auk þess hafði hann ýmis skipti
af málefnum lögfræðinga sem embættismaður og alþingismaður. Lögfræð-
ingar hafa því sérstaka ástæðu til að minnast hans.
Gunnar Thoroddsen var góður ræðumaður, traustur og rökfastur, snjall-
yrtur og gagnorður. Vandaði hann jafnan málfar sitt, hvort heldur var í ræðu
eða riti. Hann var háttvís maður og kurteis, alúðlegur en þó virðulegur.
Hann var vinsæll og átti sérstaklega auðvelt með að laða menn að sér.
Hann var sannkallaður ,,séntilmaður“.
Saga Gunnars Thoroddsen fléttast á marga vegu inn í þjóðarsöguna á
starfsárum hans.
Gunnar Thoroddsen var óvenjulega fjölhæfur maður, er átti sér yndis-
stundir utan daglegs erils og anna. Hann unni tónlist og iðkaði hana, lék
á hljóðfæri og samdi lög. Hann var og góður hagyrðingur, þó að hann flík-
aði lítt þeirri Iþrótt.
Gunnar Thoroddsen var kvæntur Völu Ásgeirsdóttur, hinni ágætustu konu,
er studdi hann í starfi og bjó honum fagurt heimili. Lifir hún mann sinn
ásamt fjórum börnum þeirra.
Ólafur Jóhannesson
125