Tímarit lögfræðinga - 01.12.1988, Side 72

Eins og áður er getið, varð Úlfljótur, tímarit laganema, fertugur á þessu
starfsári. Var haldið upp á það með útgáfu veglegs afmælisrits. Þá var og
tekin sú djarfa ákvörðun af Þorsteini Hjaltasyni, þáverandi ritstjóra og fram-
kvæmdastjórum hans, að standa fyrir fjáröflun í því skyni að unnt yrði að
endurprenta uppselda árganga Úlfljóts. Þá var ástandið orðið svo að um
20% af heildarsafni ritsins voru algerlega ófáanleg.
Víkur þá sögu að starfsemi Orators starfsárið 1987—1988, er Franz Jezorski
var formaður. Starfsemi félagsins var þetta árið, eins og raunar undangengin
ár, með miklum blóma og var fremur aukið við hina hefðbundnu starfsemi
heldur en dregið úr. Má nefna meðal margs að sett var formlega á laggirnar
ELSA-nefnd (The European Law Students Association) innan Orators, en
starfsemi þeirrar nefndar felst, eins og nafnið gefur til kynna, í stúdentasam-
skiptum innan Evrópu. Alþjóðasamtök þessi eru nýstofnuð, en óhætt er að
segja að fari að óskum þá muni skapast dýrmætur vettvangur fyrir laganema
til að kynnast kollegum sínum og starfsemi þeirra á alþjóðlegum vettvangi
í framtíðinni.
Þá má geta þess að Háskólinn stóð fyrir gerð kynningarmyndar um laga-
deild í samvinnu við Orator. Mynd þessa, sem var frumraun á þessu sviði,
mun vera ætlunin að nota til kynningar laganáms I framhaldsskólum landsins.
Enn má svo geta þess að fjársöfnun sú, er áður var á minnst vegna endur-
prentunar á Úlfljóti, heppnaðist með svo miklum ágætum að hún dugði því
sem næst til endurprentunar alls uppselda upplagsins. Var af þessum sökum
ráðist í endurprentun þessa af ritstjóra þeirrar stjórnar, Stefáni Þ. Ólafssyni,
og framkvæmdastjórum hans. Lauk því verki nú á haustdögum og höfðu þá
alls verið endurprentuð 38 tölublöð af ritinu.
Á þessu starfsári beitti Orator sér fyrir aukinni samvinnu milli deildarfélaga
innan Háskólans og náði það samstarf hámarki er Orator stóð fyrir íþrótta-
hátíð Háskólans fyrir Stúdentaráð H. í. Var almennt mjög vel af framkvæmd
þessarar hátíðar látið og á Franz og hans samstarfsfólk heiður skilinn fyrir
mikið og óeigingjarnt starf.
Er húma tók að hausti, nánar tiltekið 18. október, var núverandi stjórn síðan
kjörin og var þar undirritaður kjörinn formaður, María Thejll varaformaður,
Björg Thorarensen ritstjóri Úlfljóts og meðstjórnendur þau Einar K. Hallvarðs-
son, Linda Bentsdóttir, Sóley Ragnarsdóttir og Stefán H. Stefánsson.
Þessi stjórn á mikið starf fyrir höndum, en fyrir réttum 60 árum var Orator,
félag laganema, stofnað af nokkrum framsýnum heiðursmönnum. Er fyrirhug-
að að minnast þessarar stofnunar á ýmsan hátt. Raunar má segja að þegar
hafi verið hafin framkvæmd þess en fráfarandi stjórn safnaði saman og lét
innramma myndir af öllum stjórnum frá upphafi. Einnig var samið við Ríkis-
sjónvarpið um kaup á öllum þeim þáttum af „Réttur er settur“ sem til eru.
Ýmis áform eru í deiglunni varðandi afmæli þetta sem hámarki mun ná
þann 16. febrúar næstkomandi, en enn er of snemmt að gera grein fyrir því
sem þá mun verða gert, nær væri frá því að greina þegar það hefur verið
framkvæmt.
Almennt má segja að hagur Orators sé mjög vænn um þessar mundir,
félagsstarfið hefur verið í miklum blóma á liðnum árum og starfsemin sífellt
að aukast. Stafar þessi framkvæmdagleði ekki síst af því að fjárhagur félags-
ins sjálfs er vel viðunandi en ekki síður er þess að geta að fjárhagur Úlfljóts
270