Hugur - 01.01.1995, Qupperneq 38

36
Alan M. Turing
HUGUR
4. Stafrænar tölvur
Það má skýra hugmyndina að baki stafrænum tölvum með því að
segja að þessum vélum sé ætlað að ráða við allar þær aðgerðir sem
reiknandi maður getur framkvæmt. Við gerum ráð fyrir að maður sem
reiknar fylgi föstum reglum sem honum leyfist ekki að víkja frá á
nokkurn hátt. Við getum líka gert ráð fyrir því að hann hafi þessar
reglur í bók og innihaldi bókarinnar sé breytt í hvert sinn sem nýtt
verk er lagt fyrir hann. Hann hefur einnig ótakmarkað magn af pappír
til að reikna á. Þó það breyti ekki miklu leyfum við honum
ennfremur að nota reiknivél til að leggja saman og margfalda.
Ef við notum þessa útskýringu sem skilgreiningu þá er hætta á að
við förum í hring. Við sneiðum hjá þessari hættu með lauslegri
greinargerð fyrir aðferðunum sem beitt er til að ná settu marki.
Yfírleitt má líta svo á að stafræn tölva sé sett saman úr þrem hlutum:
1. Geymslu
2. Reikniverki
3. Stýriverki
Geymslan geymir upplýsingar og samsvarar pappírnum sem maðurinn
notar, bæði þeim sem hann hefur fyrir útreikninga og blöðunum í
bókinni. Að svo miklu leyti sem maðurinn reiknar í huganum
samsvarar hluti geymslunnar minni hans.
Reikniverkið er sá hluti sem framkvæmir einstakar reikniaðgerðir.
Hverjar þessar einstöku aðgerðir eru er misjafnt frá einni vél til
annarrar. Yfirleitt geta tölvur framkvæmt allflóknar aðgerðir eins og
„Margfalda 3.540.675.445 og 7.076.345.687“. En fyrir sumar vélar
er aðeins mögulegt að framkvæma mjög einfaldar aðgerðir eins og
„Skrifa 0“.
Við höfum nefnt að í vélinni komi hluti geymslunnar í stað
bókarinnar sem inniheldur reiknireglur fyrir manninn. Þessi hluti er
þá kallaður „skipanatafla“. Stýriverkið sér um að skipanirnar séu rétt
framkvæmdar og í réttri röð. Það er byggt þannig að þetta gerist
óhjákvæmilega.
Upplýsingunum í geymslunni er skipt niður í fremur smáa pakka.
í tiltekinni vél gæti hver pakki til dæmis geymt tíu tölustafi.
Geymslunni er skipt niður í hluta sem hver um sig getur geymt einn