SunnudagsMogginn - 15.11.2009, Blaðsíða 42

42 15. nóvember 2009
Þ
að er sunnudagur. Ég er í ræktinni að refsa
lóðunum – eða öfugt – þegar síminn hringir.
Það eru útlönd.
Halló?
„Er þetta Orri Páll?“
Já.
„Sæll, ég heiti Betty og hringi frá Berlín. Ég vinn við
að kynna kvikmyndina 2012 og samkvæmt mínum upp-
lýsingum munt þú taka viðtalið við Chiwetel Ejiofor.“
Ég átti að taka viðtal við hann í síðustu viku en eitt-
hvað fór úrskeiðis. Ég hélt að búið væri að aflýsa því.
„Nei, nei. Okkur tókst að koma viðtalinu aftur á dag-
skrá. Gleymdist að láta þig vita? Ertu samt ekki klár?“
Hvenær?
„Eftir tíu mínútur.“
Tíu mínútur?
„Já, ertu ekki á skrifstofunni?“
Nei, ég er í ræktinni.
„Ræktinni!!?“ Hlær.
„Hvað viltu gera?“
Ég tek auðvitað viðtalið. Dríf mig heim.
„Farðu varlega!“
Ég hendi frá mér lóðunum og hleyp út í bíl. Tíu mín-
útum og nokkrum handbremsubeygjum síðar hringir
Betty aftur.
„Ertu kominn heim?“
Það örlar á glettni í röddinni, þeysireið mín hefur
greinilega kryddað tilveru hennar.
„Hérna er Chiwetel. Eigðu gott viðtal!“
Meistari hins sjónræna
„Halló.“
Minn kæri Ejiofor, hvernig hefur þú það í dag?
„Ég hef það fínt en þú?“
Ég er svolítið móður en annars góður.
Talið berst fyrst að nýju hamfaramyndinni hans Ro-
lands Emmerichs, 2012, en Ejiofor fer með eitt stærsta
hlutverkið í henni.
„Ég er mjög ánægður með útkomuna. Þetta er frábær
mynd. Roland er meistari hins sjónræna í kvikmyndum
án þess að það komi niður á sögunni sjálfri. Hann er
mjög ástríðufullur sagnaþulur. 2012 er að mínu viti mjög
spennandi bíóupplifun – algjört ævintýri,“ segir Ejiofor
með fáguðum breskum hreim. Hann er yfirvegaður og
býður af sér góðan þokka.
Ejiofor er greinilega aðdáandi Emmerichs. „Já, ég hef
haft mjög gaman af myndunum hans gegnum tíðina,
ekki síst hamfaramyndunum. Ég dáist að því hvað þær
eru trúverðugar og ekta. Handritið náði strax helj-
artökum á mér og þar sem ég þekki fyrri verk Rolands
hafði ég aldrei efasemdir um að honum tækist að gæða
það lífi á hvíta tjaldinu. Þetta snýst ekki bara um has-
arinn, myndin spyr margra áhugaverðra spurninga,
ekki síst af siðferðilegum toga.“
Samviskan holdi klædd
Ejiofor fer með hlutverk jarðfræðingsins dr. Adrians
Helmsleys sem skyndilega verður innsti koppur í búri í
Hvíta húsinu eftir að hann kemst á snoðir um að stór-
kostlegar breytingar eru að verða á jarðskorpunni og
gufuhvolfi jarðar.
„Adrian er þessi dæmigerði vísindamaður, hafinn yfir
argaþras stjórnmálanna. Hann er með hugann við stað-
reyndir. Honum er ljóst hvernig stjórnvöld ætla að
bregðast við yfirvofandi hamförum en hefur stöðugar
efasemdir um áformin. Um leið og hann berst við ytri
aðstæður þarf hann því líka að etja kappi við eigin sam-
visku. Á vissan hátt má segja að hann sé holdgervingur
samviskunnar í sögunni. Hin þögla hetja.“
Stjarna Ejiofors hefur risið hratt í Hollywood á um-
liðnum árum. Hann vakti fyrst athygli í Amistad fyrir
rúmum áratug en af nýrri myndum má nefna Endgame,
American Gangster og Talk to Me, en hann fékk Inde-
pendent Spirit-verðlaunin fyrir leik sinn í þeirri mynd.
Ejiofor hefur einnig farið með hlutverk í Inside Man,
Kinky Boots og hinni umtöluðu Children of Men.
Skyldi hann líta á 2012 sem stærsta tækifærið til þessa?
„Í vissum skilningi geri ég það. 2012 er stórmynd sem
fengið hefur gríðarlega kynningu enda umfang fram-
leiðslunnar mikið. Það er ekki þar með sagt að fólk
flykkist til að sjá hana – en vonandi gerist það. Auðvitað
er aðsókn ekki upphaf og endir alls í kvikmyndum en
hún spillir sannarlega ekki fyrir. Maður er nú einu sinni
að þessu til að ná til fólks.“ Það er skammt stórra högga
á milli. Ejiofor er nú við tökur á nýrri njósnamynd Phil-
lips Noyce, Salt, ásamt Angelinu Jolie og Liev Schreiber.
Ejiofor hóf feril sinn í leikhúsi í Lundúnum þar sem
hann hefur leikið jöfnum höndum í nýjum og klass-
ískum verkum. Fékk t.a.m. mikið lof fyrir túlkun sína á
elskhuga elskhuganna í Rómeó og Júlíu eftir Shake-
speare um árið. Ejiofor hefur haldið tryggð við sviðið og
á síðasta ári hlaut hann Laurence Olivier-verðlaunin
fyrir túlkun sína á Óþelló.
„Ég er og verð með annan fótinn á sviðinu. Ég elska
leikhúsið og hef verið svo heppinn að geta sameinað
vinnu fyrir leikhús, sjónvarp og kvikmyndir. Það er
draumastaðan enda höfða allir miðlarnir til mín. Auð-
vitað getur verið snúið að láta þetta ganga upp en aðal-
málið er að finna verkefni sem henta manni.“
Starfssystir Ejiofors, Dame Judi Dench, viðraði nýver-
ið þá skoðun sína að ungir leikarar í dag séu of óþol-
inmóðir. Þeim liggi svo mikið á að komast í sjónvarp og
kvikmyndir að þeir hafi ekki tíma til að drekka í sig arf-
leifð leikhússins.
„Já og nei,“ svarar Ejiofor þegar hann er spurður
hvort hann deili þessu sjónarmiði með Dame Judi. „Ég
held að þetta sé tvískipt enda eru langanir og þrár leik-
ara mismunandi. Sumir ungir leikarar hafa engan áhuga
á að vinna í leikhúsi en aðrir þrá ekkert heitar. Sjálfur
heyrði ég til síðarnefnda hópnum meðan ég var í leik-
listarskóla. Ég sá bara sviðið. Áhuginn á kvikmyndaleik
kom svo í kjölfarið. Það er ekki vafi að reynsla mín úr
leikhúsinu hefur hjálpað mér í kvikmyndunum. Annars
er það fyrst og fremst ástríðan sem skilar manni áfram.“
Fleiri tækifæri í dag
Hann segir að ekki megi heldur gleyma því að tækifærin
séu mun fleiri í dag en þegar Dame Judi var að stíga sín
fyrstu skref í leiklistinni á sjötta áratugnum. „Það er
mikil spurn eftir ungum leikurum í sjónvarpi og kvik-
myndum og leikhúsið verður að lifa við þá samkeppni.
Eins og ég segi hef ég verið svo lánsamur að geta sam-
einað þetta en það á ekki við um alla. Í mínum huga
snýst þetta um að finna verkefnin sem ögra manni mest
og reyna á sköpunargáfuna, gildir þá einu hvort þau eru
í leikhúsi, sjónvarpi eða á hvíta tjaldinu.“
Ejiofor er borinn og barnfæddur í Lundúnum en býr á
tveimur stöðum í dag, í Lundúnum og Los Angeles.
„Verkefnin hafa hagað því þannig að ég er alltaf meira
og meira í Los Angeles. Ég græt það ekkert enda kann ég
afskaplega vel við mig í borginni. LA er suðupottur.“
Eins og nafnið gefur til kynna er Ejiofor af afrísku
bergi brotinn, foreldrar hans eru frá Nígeríu. Hann
kveðst vera ákaflega stoltur af uppruna sínum. „Ég á
vini og ættingja í Nígeríu sem ég reyni að heimsækja eins
oft og ég get. Nígería er mér afar kær.“
Kvikmyndagerð stendur í blóma í Nígeríu, raunar er
iðnaðurinn þar sá næst-afkastamesti í heimi með tilliti
til framleiddra mynda. „Nollywood, eins og kvik-
myndageirinn í Nígeríu er kallaður, hefur vaxið hratt á
undanförnum tveimur áratugum. Vegna tengsla minna
við landið hef ég margoft verið beðinn um að taka að
mér verkefni í Nollywood en ekki haft tök á því ennþá.
Hver veit nema það verði næsta skrefið á ferlinum?“
Ástríðan
skilar
manni
áfram
Bretinn Chiwetel Ejiofor, sem leikur
eitt aðalhlutverkið í 2012, er rísandi
stjarna í heimi kvikmyndanna. Í við-
tali við Sunnudagsmoggann upplýsir
Ejiofor að þrátt fyrir velgengni á
hvíta tjaldinu verði hann áfram með
annan fótinn í leikhúsinu.
Orri Páll Ormarsson orri@mbl.is
„Í mínum huga snýst þetta um að
finna verkefnin sem ögra manni
mest og reyna á sköpunargáfuna,
gildir þá einu hvort þau eru í leik-
húsi, sjónvarpi eða á hvíta tjald-
inu,“ segir Chiwetel Ejiofor.
Kvikmyndir