Birtingur - 01.06.1959, Síða 30

Geir Kristjánsson:
LEIKHÚSANNÁLL
Það er raunaleg staðreynd sem blasir við augum, þegar litið er yfir skrá
Þjóðleikhússins um tölu sýningargesta. Beztu leikritin eru nær undan-
tekningarlaust verst sótt. Óperur og óperettur eru hinsvegar vel sóttar,
þótt þær teljist aldrei til leiklistarviðburða, og aðeins barnaleikrit ná eitt-
hvað svipuðum fjölda sýningargesta. Ekki voru það fleiri en 3151 sem
sáu öndvegisleikrit eins og „Húmar hægt að kveldi“, en aftur dró önnur
eins vella og ,,Betlistúdentinn“ 15.073 sýningargesti. Um þá sýningu þótti
það helzt til frásagnar í blöðum, að þá hefðu verið tíu tonn á sviðinu í
einu, og væri sannarlega fróðlegt að vita, hvað þjóðleikhússviðið hefur
mikið burðarþol.
„Blóðbrullaup“ Lorca í Þjóðleikhúsinu
Leikstjóri Gísli Halldórsson
„Blóðbrullaup" Lorca hefur víðasthvar fallið þar sem það hefur verið
sýnt, og jafnvel þótt átt hafi í hlut leikhús með stórum meiri orðstír en
Þjóðleikhúsið. Leikritið er sérstætt og kannski alltof spánskt til að fólk
af öðru þjóðerni ráði við það. Sýning þess hér var mikið í molurn, þrátt
fyrir augljósa alúð jafn góðs listamanns og Gísli Halldórsson er. Þýðing
Magnúsar á Vögguþulunni er of íburðarmikil og ekki nógu nákvæm til að
eiga heima í leikritinu. Hún verður þar alls ekki sá váboði sem hún á að
vera; allt atriðið verður einhvernveginn utangátta, og það sem verra er:
slítur leikritið í sundur. „Sjálf er vaggan gull“ á t. d. að vera „vaggan er
úr járni“, ef nákvæmlega væri þýtt, og undirstrikar fátækt. Það var vegna
fátæktar Leonardós, að hann og brúðurin fengu ekki að eigast, eins og
kemur fram, þegar hann segir við hana: „Tveir uxar og lélegt hreysi var
þér ekki samboðið. Þar liggur hundurinn grafinn.“
Það hefur ugglaust verið leikstjóranum freisting, með Hannes Sigfússon
sem þýðanda, að gera sýninguna ljóðræna. En „Blóðbrullaup“ er ekki
fyrst og fremst ljóðrænt verk, það er demónískt verk. Ilið myrka fljót
með söng milli tannanna, ástríðuofsinn, er aflið sem knýr það. „Mér var
það þvert um geð; ég segi þér satt: mér var það þvert um geð. Ég
26 Birtingur