Árbók VFÍ/TFÍ - 01.06.2005, Qupperneq 27

Menntamálanefnd VFÍ lýsir yfir stuðningi við hugmyndir um að auka stjórnunarlegt og
fjárhagslegt sjálfstæði verkfræðideildar HÍ. Gæði verkfræðimenntunar á íslandi verða
best tryggð með því að efla starfsemi þeirra stofnana sem sinna tæknimenntun hér á landi
og auka um leið samstarf þeirra á milli. Aðeins þannig geta þessar stofnanir verið
samkeppnishæfar við erlenda tækniháskóla. Menntamálanefnd er ennfremur sammála
vísinda- og tæknistefnu núverandi ríkisstjórnar um að endurskilgreina beri skipulag og
starfshætti opinberra rannsóknastofnana þannig að kraftar þeirra nýtist betur. Þetta
mætti t.d. gera með því að stofna öflugan vísindakjarna á grunni rannsóknastofnana,
verkfræðideildar HÍ og THÍ.
Ályktun um gæði verkfræðimenntunar
I umfjöllun um framtíðarstefnu VFI í menntamálum fjallaði nefndin um hvernig unnt
yrði að fylgjast með og tryggja gæði verkfræðináms við verkfræðideild HÍ, ennfremur
gæði verkfræðináms við aðra háskóla sem hugsanlega myndu taka upp kennslu í verk-
fræði á næstu árum. Menntamálanefndin sendi frá sér ályktun í mars 2004 þar sem lagt
var til að allt nám til B.Sc.-prófs í verkfræði verði tekið út og metið af alþjóðlega viður-
kenndum vottunaraðila. Bent var á að heppilegt væri að leita til ABET í Bandaríkjunum
til að annast slíka úttekt. Stofnunin hefur áður gert slíka úttekt hérlendis og njóta úttektir
hennar virðingar um allan heim.
Þekking og kunnátta verkfræðinga hefur verið hornsteinn tækniframfara í landinu
undanfarna áratugi. Almenningur hefur getað reitt sig á og treyst þeirra faglegu vinnu-
brögðum. Grundvöllur þessa er öflug menntun þar sem verulegar kröfur eru gerðar til
nemenda um að tileinka sér tiltekna færni og þekkingu. Menntamálanefnd
Verkfræðingafélags Islands (MVFÍ) hefur lengi staðið vörð um að þessi þekking og færni
sé til staðar. Nefndin hefur verið umsagnaraðili iðnaðarráðuneytisins um hvort einstakl-
ingar séu til þess hæfir að mega bera titilinn verkfræðingur. Matskröfurnar eru opinberar
og gegnsæjar og þar kemur m.a. fram mikilvægi þess að vel sé vandað til undirstöðu
námsins. Nauðsynlegt er að meta hvort skólar hér á landi sem bjóða upp á nám í verk-
fræði eða ætla að bjóða upp á slíkt nám standist þær kröfur sem gera verður til verk-
fræðináms. Slíkt mat er í samræmi við stefnu Menntamálaráðuneytisins um gæðamat í
skólastarfi og mun einnig tryggja að nemendur sem stunda slíkt nám fái greiða inngöngu
í framhaldsnám við góða verkfræðiskóla hvar sem er í heiminum. Ennfremur geta
nemendur verið vissir um að þeir fái heimild til að kalla sig verkfræðing að loknu
meistaraprófi í verkfræði sem tekið er að öllu leyti eða að hluta til við þessa skóla og þá
að hluta til við aðra viðurkennda skóla.
Alþjóðleg úttekt er ekki aðeins mikilvæg fyrir Islendinga til að viðhalda kröfum til hins
lögverndaða starfsheitis verkfræðingur, heldur er hún mikilvæg til að íslensk verkfræði-
menntun og íslenskir verkfræðingar njóti trausts á alþjóðavettvangi og til að námið hér-
lendis sé samkeppnishæft við nám í erlendum verkfræðiskólum.
Ályktanir sendar ráðherra
Báðar þessar ályktanir voru sendar í nafni félagsins til menntamálaráðherra og fleiri aðila
er tengjast tæknimenntun á háskólastigi. Til þess að fylgja þessum ályktunum eftir var
jafnframt beðið um fund sem fyrst með menntamálaráðherra. Vegna mikilla anna hjá
nýjum menntamálaráðherra og síðan vegna fjölmiðlafrumvarps fékkst ekki fundur með
ráðherra fyrr en 15. september 2004. Þá höfðu forsendur breyst að því leyti að farið var
að ræða sameiningu Tækniháskólans og Háskólans í Reykjavík. Á fund ráðherra fóru for-
maður félagsins og framkvæmdastjóri ásamt formanni MVFÍ. Ráðherra tók vel í erindi
sendimanna varðandi ABET-úttekt á öllu verkfræðinámi og hvatti jafnframt til samvinnu
milli VFI og nýja háskólans um skipulag verkfræðináms þar.
2 5
Félagsmál Vfl/TFÍ