Læknablaðið - 15.09.1994, Blaðsíða 4

280
LÆKNABLAÐIÐ 1994; 80
Lesendakönnun 1994
Læknablaðið, Fréttabréf lækna
Um það bil 38% lækna lesa öll eintök
Lœknablaðsins og 75% lesa öll eintök Frétta-
bréfsins. Þetta kemur fram í lesendakönnun
sem gerð var fyrri hluta ársins. Ætlunin var að
afla upplýsinga um hvernig Læknablaðið og
Fréttabréfið eru lesin og athuga síðar hvort
breytingar yrðu þar á eftir sameiningu blað-
anna.
Þetta hefur ekki verið gert áður og verður
því að fara varlega í túlkanir á niðurstöðum.
Það er þó ljóst að ýmislegt er hægt að læra af
könnuninni, til dæmis þarf að vanda betur frá-
gang spurninga og sennilega hafa þær færri því
svörun var aðeins um 38%, en í nýlegri les-
endakönnun Nordisk Medicin meðal íslenskra
lækna var svörunin 55%.
Hér á eftir verður sagt frá helstu niður-
stöðum úr könnuninni en þeim sem hafa áhuga
á að fá nákvæmari tölulegar niðurstöður er
bent á að hafa samband við ritstjórn, sem mun
senda þeim tölurnar ef óskað er. Þegar spurt
var hve stóran hluta af blöðunum menn væru
vanir að lesa sögðu 38% að þeir læsu um það
bil helming af Læknablaðinu en 82% að þeir
læsu um það bil helming af Fréttabréfinu.
Læknar eyða hins vegar að jafnaði meiri tíma í
lestur Læknablaðsins en 69% sögðust lesa það
í 10 mínútur eða lengur en samsvarandi tala
fyrir Fréttabréfið var 43%.
Kannski er áhugaverðasti hluti könnunar-
innar sá er varðar þann tíma sem læknar verja
til lestrar á læknisfræðilegu efni. Þannig sögð-
ust 89% lesa meira en eina klukkustund í viku
en 33% meira en fimm klukkustundir í viku.
Tæplega 60% notuðu meira en 70% af tíman-
um til lestrar læknisfræðitímarita. Um 67%
sögðust hafa lesið eitthvað af sex síðustu ein-
tökum Nordisk Medicin en 33% höfðu lesið
Lakartidningen (blað sænsku læknasamtak-
anna), British Medical Journal 43%, The
Lancet 37% og JAMA 22%, fjöldi lækna hafði
lesið enn önnur tímarit.
Um 65% læknar töldu að auglýsingar veittu
mikilvægar og nytsamar upplýsingar stundum
eða oft og um 22% höfðu rætt innihald auglýs-
ingar við samstarfsmenn.
Mikill meirihluti lækna taldi að Læknablað-
inu og Fréttabréfinu tækist að vera félagsblöð
læknafélaganna og vettvangur umræðu urn
heilbrigðismál. Einnig taldi mikill meirihluti
blöðin hvetja til rannsókna og fræðimennsku
og þeim tækist að vera tímarit fyrir læknis-
menntun og hvettu til símenntunar lækna.
Ritstjórn þakkar þann áhuga sem læknar
hafa sýnt þessari könnun og vonar að upplýs-
ingarnar um lestrarvenjur lækna þyki athyglis-
verðar, kannski einkum fyrir þá sem huga að
endur- og símenntun lækna. Fjöldi athuga-
semda, sem ekki verður sagt frá með tölum,
bárust með svörunum. Munu þær ræddar og
skoðaðar af ritstjórn. Sumar þessara athuga-
semda fjalla um könnunina sjálfa, gagnrýna
hana og benda á leiðir til að lagfæra spurningar
og bæta könnunina. Aðrar tillögur eru um útlit
og hönnun blaðsins, málfar og frágang. Enn
aðrar hvetja til að blöðin komi oftar út. Nokkr-
ar ábendingar eru um nauðsyn harðari ritstýr-
ingar á efni Fréttabréfs. Ætlunin er að gera
nýja lesendakönnun að ári.
Vilhjálmur Rafnsson ritstjóri