Frjáls verslun - 01.09.2005, Page 80

80 F R J Á L S V E R S L U N • 9 . T B L . 2 0 0 5
Verslunin Drangey á sér rúmlega sjötíu ára sögu. Og svo skemmtilega vill til að þrír af fjórum eigendum hafa verið
konur sem allar heita María. Drangey byrj-
aði sem matvöruverslun á Grettisgötu árið
1934. Tveimur árum síðar keypti María Sam-
úelsdóttir Ammendrup verslunina sem flutti
á Laugaveginn árið 1941og var þá aðallega
verslað með vefnaðarvörur. Tengdadóttir
Maríu, María Magnúsdóttir Ammendrup,
tók við rekstrinum 1975 og voru þá leður-
vörur í öndvegi. Árið 1995 keypti María
Maríusdóttir verslunina og var vöruúrvalið
áfram töskur, hanskar, seðlaveski og fleira.
Drangey opnaði aðra verslun í Smáralind
2002 og voru þá teknar inn heimilis- og
gjafavörur meðfram leðurvörunum og þá sér-
staklega töskum sem löngu var orðið sérein-
kenni verslunarinnar. Árið 2004 hætti síðan
Drangey við Laugaveginn og starfsemin var
efld í Smáralind.
„Ég ætlaði alltaf að vera með tvær versl-
anir, en það gekk því miður ekki upp. Það
dró úr sölunni á Laugaveginum og svo varð
ég þess vör að viðskiptavinir mínir kusu
frekar að koma í Smáralindina. Annað sem
ég tók eftir var að í Smáralindinni gilda
aðrir viðskiptahættir en á Laugaveginum. Í
Smáralind má reikna með því að fólkið komi
þangað vikulega og geri sín viðskipti þar, en
á Laugaveginum er meirihlutinn gangandi
vegfarendur sem fara Laugaveginn á tveggja
til þriggja mánaða fresti og þá ekki fyrst og
fremst í verslunarerindum.
Ég byrjaði minn starfsferil á skrifstofu.
Þaðan lá leiðin í fjölmiðla, var einn vetur með
morgunþátt í Ríkisútvarpinu ásamt Stefáni
Jökulssyni og fór síðan í sjónvarpið þar sem
ég starfaði sem skrifta og síðar pródúsent
á Stöð 2 í 10 ár. Ég hafði alltaf haft löngun
til að fara út í eigin atvinnurekstur og dag
einn var ég á gangi niður Laugaveginn og
staðnæmdist við Drangey, verslun sem mér
leist vel á. Ég hringdi í Maríu og spurði hvort
hún væri nokkuð að selja og það fór nú svo
að fimm dögum síðar átti ég verslunina. Ég
held að nafn mitt hafi haft nokkuð að segja
hversu vel tókst með kaupin.“
María er allt í öllu í verslun sinni: „Ég
vil hafa Drangey persónulega og hef smám
saman verið að breyta henni í þá áttina án
þess að víkja frá töskunum. Ég sæki sýn-
ingar erlendis og flyt allar mínar vörur sjálf
inn. Ég hef alltaf reynt að hafa í kringum mig
fallegar vörur frá góðum framleiðendum. Á
því lifir Drangey svo segja má að búðin sé
samsett af mér.“
Fjölskylda Maríu er stór. „Ég á þrjú upp-
komin börn og barnabörnin eru orðin sjö og
eru þau gullmolarnir í lífi mínu. Ég reyni að
vera með þeim mestan þann tíma sem ég á
afgangs. Og að vera með þeim er mér mikil
lífsfylling.
Önnur áhugamál á ég ekki svo mörg.
Fólk er alltaf að tala um að fara í ræktina.
Ég læt mér nægja að fara í göngutúra og
fer stundum í sund. Það er ótrúleg vinna að
reka verslun og það gerir enginn til lengdar
nema hafa mikinn áhuga og hann hef ég svo
sannarlega. Svo segja má að fyrir utan fjöl-
skylduna sé Drangey mitt áhugamál.
Eitt er ónefnt, en það er Félag kvenna í
atvinnurekstri, þar sem ég er í stjórn. Ég hef
mikla ánægju af að taka þátt í starfi félagsins
með konum sem eru hver annarri skemmti-
legri. Þess má einnig geta að ég bjó í 19 ár
á Ísafirði og var einn af stofnendum Litla
leikklúbbsins, sem fagnaði 40 ára afmæli
sínu fyrr á árinu.“
María gerir lítið af því að taka sér sumar-
frí: „Ég vil helst vera heima hjá mér á sumrin
og lifa í þeirri von að veðrið verði gott. Ég
fór um páskana í fyrsta sinn til Kanaríeyja
og var mjög hrifin og skil nú hvað fólk er að
sækja þangað.“
FÓLK
verslunareigandi
í Drangey
María
Maríusdóttir
María Maríusdóttir.
„Ég hef alltaf reynt að hafa
í kringum mig fallegar vörur
frá góðum framleiðendum
og á því lifir Drangey,
svo segja má að búðin
sé samsett af mér.“
Nafn: María Maríusdóttir.
Fæðingarstaður: Reykjavík, 7. 4. 1948.
Foreldrar: Maríus Jónsson
og María Pálsdóttir.
Sambýlismaður: Guðbrandur Jónsson.
Börn: Kristján, Eggert
og Sigþór Samúelssynir.