Skírnir - 01.09.1990, Blaðsíða 194

446
SIGMUNDUR GUÐBJARNASON
SKÍRNIR
Ágætu kandídatar. í dag fögnum við með ykkur og fjölskyldum
ykkar þeim mikilvæga áfanga sem þið hafið náð með háskólaprófinu.
Háskóli Islands hefur veitt ykkur breiðan og traustan grunn til að
byggja á því að menntun ykkar mun halda áfram með ýmsum hætti.
Sum ykkar leita eftir formlegri framhaldsmenntun en öll munum við
mannast í lífsins skóla en einnig þar er námsferillinn misjafnlega langur
og strangur.
Mörg ykkar munu halda til náms og starfa við erlenda háskóla. Það
verður í senn tími erfiðis, átaka og ánægju þegar þið sannið fyrir sjálfum
ykkur að þið eruð jafnokar samstúdenta og samstarfsmanna ykkar, að
þið standist samanburð við bestu námsmenn annarra landa. Farið því
utan og aflið ykkur frekari þekkingar, þjálfunar og reynslu og styrkið
umfram allt sjálfstraust ykkar. Ég vil samt vara ykkur sérstaklega við
einni freistingu sem á vegi ykkar kann að verða en það er freistingin til
að setjast að erlendis. Þú munt, ágæti kandídat, þá fá gullin tækifæri og
freistandi boð um vel launuð störf og stöður hjá virtum fyrirtækjum og
háskólum, boð sem erfitt verður að hafna. Þú munt sennilega vilja taka
slíku boði í 2-3 ár en auðvitað ætlar þú heim seinna. Ef þú starfar
erlendis lengi þá vex hættan á að þú missir fótfestuna og glatist Islandi.
Börn þín vaxa þá úr grasi á erlendri grund og enn ætlar þú heim til
Islands en bara seinna. Loks lætur þú af störfum fyrir aldurs sakir og
þá loks kemur þú heim til að njóta ævikvöldsins hér að leiðarlokum.
Þetta er ekki sú mynd sem við viljum sjá af æviferli þínum. Þú stendur
í þakkarskuld við ættjörðina og þessari þjóð áttu að helga krafta þína.
Þessar freistingar þekki ég af eigin raun. Fyrir þrjátíu árum tók ég
slíku tilboði um að koma til starfa við bandarískan háskóla. Árin liðu
eitt af öðru og þegar þau voru að verða tíu fórum við loksins heim. Það
getur vissulega verið mjög erfitt að hafna gulli og glæstri framtíð fyrir
tækifæri til að takast á við ný og erfið verkefni. Slíkar freistingar verða
væntanlega á vegi þínum í einhverri mynd, kæri kandídat, en við
treystum því að þú komir heim til starfa fyrr en síðar.
Samkeppni um vel menntað vinnuafl mun stöðugt fara vaxandi,
einkum samkeppni um tæknimenn og fólk þjálfað til vísindastarfa.
Ljóst er að skortur verður á slíku fólki bæði í Evrópu og Banda-
ríkjunum.
Fyrir nokkrum vikum var ég á fundi evrópskra háskólarektora þar
sem fjallað var um Evrópu morgundagsins í ljósi Evrópubandalagsins