Tölvumál - 01.02.2008, Qupperneq 11

T Ö L V U M Á L | 1 1
Er ávallt tengd
Í starfinu þá nota ég nota fartölvuna mína, er í miklum rafrænum sam­
skiptum og nota þráðlaust net talsvert. Ég er því ávallt tengd með fartölvuna
á handleggnum og nota hana mikið á fundum. Oft er gert grín að mér
hversu mikið ég nota tölvuna.
Þegar ég er ekki með fartölvuna í fanginu er ég með lófatölvufarsímann
minn sem er ómissandi. Í hann sæki ég upplýsingar um tengiliði, dagbókina
mína, tölvupóstinn og er jafnvel í samskiptum við son minn í gegnum
MSN. Erlendis sæki ég oft upplýsingar um flug og fréttir á fréttasíðum fyrir
lófatölvur. Ég nota einnig lófatölvufarsímann til að senda talskilaboð til
samstarfsmanna.
Á ferðalögum nota ég mjög mikið IP­símaforritið í fartölvunni. Þannig greiði
ég aðeins innanlandssímtöl erlendis.

Unglingurinn notar bara SMS og MSN
Fjölskyldan er mjög tæknivædd. Bróðir minn hefur síðustu ár búið víða
erlendis svo okkar samskipti eru í gegnum MSN eða tölvupóst. Ég var
á ráðstefnu um daginn þar sem fram kom að tölvupóstur væri bara fyrir
gamalt fólk. Mér fannst það bæði fyndið og rétt því að 14 ára sonur minn
notar bara SMS og MSN skilaboð en rafræn samskipti okkar hjóna fara að
mestu í gegnum tölvupóst. Mikið af samskiptum við kennara sonar míns
eru með tölvupósti og í gegnum Mentor heimasíðuna.
Ég nota fartölvuna mikið til afþreyingar. Ég held ávallt dagbók á ferðalögum
á heimasíðunni minni www.halldora.is. Ég hleð öllum stafrænum myndum
beint í fartölvuna mína og vista þær þar.
Eins og mjög margir Íslendingar þá fer ég nánast aldrei í banka. Auk þess
versla ég mikið á Netinu. Ég kaupi reglulega hljóðbækur þar og hlusta á í
tónhlöðunni eða í tölvunni. Ég vil horfa á sjónvarpsefni þegar mér hentar
og horfi mikið á fréttir og íslenska þætti af Netinu. Auk þess tek ég upp á
sjónvarpsbox eða hágæðagervihnattabox, sem bæði eru með hörðum disk.
Merkasti áfanginn
Merkasti áfanginn í þróun stafrænnar tilveru er Internetið og hröð út­
breiðsla þess. Með tilkomu Internetsins og aðgengi að heimabönkum og
skattskýrslum hefur lífið orðið auðveldara.

Öryggismál skipta mestu máli fyrir framþróun stafrænnar tilveru. Þar ber að
líta til rafrænna undirskrifta og almenns upplýsingaöryggis. Einnig held ég
að stöðugt verði kröfur um aukinn hraða og gagnaflutningsgetu.
Sýndarfundabúnaður sem minnkar erlend ferðalög
Eftir fimm ár verður allt starfsumhverfið sveigjanlegra. Greiðara aðgengi
verður að þráðlausum nettengingum og meðfærilegum búnaði. Fólk mun
ferðast um með stýrikerfi og gögn á Flash minni eða USB minniskubbum
og hægt verður að setja upp vinnustöðvar hvar sem er. Fleiri fyrirtæki munu
koma sér upp fullkomnum sýndarfundabúnaði sem minnkar erlend ferðalög
og gefur starfsmönnum meiri tíma með fjölskyldunni.
DVD myndasafn fjölskyldunnar verður jafn úrelt og VHS safnið er nú. Þá
verð ég búin að setja upp heimilisnetþjón í bílskúrnum við hliðina á adsl­
beininum mínum. Síðan verð ég með þunna biðlara í öllum herbergjum
með LCD snertisjá, lyklaborði og mús. Fjarvinna mun aukast sem og
sjónvarpsáhorf á mínum tíma, þegar mér hentar.
Ég geri ráð fyrir að vera komin með mitt eigið heimaöryggiskerfi með
eftirlitsmyndavélum tengt á sama netþjón og símstöð heimilisins liggur á
þessum sama netþjóni, enda verða allir símar á heimilinu IP símar.
Nettengdur ísskápur er óskastaðan
Mín óskastaða er að ég geti tengt ísskápinn og búrskápinn minn við tölvu
sem skannaði allan mat sem fer inn og út úr skápunum. Þannig kæmu þeir
með tillögu að pöntun sem ég gæti svo bætt við og pantað heim. Einnig
myndi ég gjarnan vilja geta stillt bakaraofninn með lófatölvufarsímanum
mínum eins og ég get stillt upptökur á harða disknum mínum í dag.
Eftir fimm ár verður allt
starfsumhverfið sveigjanlegra
Greiðara aðgengi verður að
þráðlausum nettengingum og
meðfærilegum búnaði
Halldóra
Matthíasdóttir
alþjóðamarkaðsfræðingur
með MSc gráðu í stjórnun og stefnumótun