Tölvumál - 01.02.2008, Page 67

T Ö L V U M Á L | 6 7
Sigmundur Halldórsson
í faghópi um vefstjórnun
Góð hönnun er góð fyrir lífið. Þetta á jafnt við um vefhönnun sem aðra
hönnun. En hvað er góð vefhönnun? Þeirri spurningu er oft erfiðara að svara.
Fjölmiðlar virðast flestir horfa til verðmætis þeirra vefþjónustufyrirtækja
sem við þekkjum hvað best. Google hefur verið að slá öll met í verðmati
hlutabréfa og hlutar í Facebook skipta um hendur fyrir upphæðir sem erfitt
er að skilja. En segir það okkur eitthvað um vefhönnun? Segir það okkur
eitthvað um gæði og vönduð vinnubrögð?
Það er óhætt að segja að árið 2007 hafi markað ákveðin tímamót hér á landi.
Loksins hyllir undir að vefurinn verði aðgengilegur í gegnum tæki á borð
við síma. Vinsældir Blackberry segja raunar allt sem segja þarf um hversu
gríðarlegt hagræði er af því að hafa aðgang að veflægum upplýsingum í
gegnum lófatæki. Á sama tíma sáu fjölmörg íslensk fyrirtæki og stofnanir
sér hag í því að nýta sér AJAX til þess að gera vefi sína þægilegri í notkun.
Vefmiðlun fór af stað með krafti og íslenskt efni flæddi inn á YouTube.
Raunar er svo komið að sjónvarpið á undir högg að sækja hér á landi, því
efnið er einfaldlega aðgengilegra í gegnum vefinn. En þessi mikla notkun
og heimsmet í breiðbandstengingum virðist ekki endilega vera að skila sér
í betri vefhönnun.
Fagmennska
Vandamálið virðist vera að það á sér stað sáralítil umræða um fagið.
Fagmennska á sviði vefhönnunar er vanmetin. Þekking á viðfangsefninu
takmörkuð og þau fyrirtæki sem verulegan metnað leggja í þessa vinnu
sína virðast vera fá. Undirmannaðar vefdeildir virðist frekar vera regla en
undantekning. Í því alþjóðlega viðskiptaumhverfi sem við búum við þá
virðist skorta þor eða vilja til þess að við sköpum okkur sérstöðu á þessu
sviði.
Auðvitað er þetta ekki algilt. Fyrirtæki á borð við Industria, CCP, Dohop.
com og Miði.is eru allt dæmi um íslenskt frumkvæði sem tekið hefur verið
eftir. Við sjáum líka að sum íslensk fyrirtæki leggja verulegan metnað í að
standa vel að vefjum sínum. En þetta virðist því miður vera undantekning
frekar en regla. Nýsköpun á þessu sviði hér á landi er lítil. Væntanlega má
rekja það til erfiðra aðstæðna fyrir útflutningsfyrirtæki. Það er einfaldlega
skelfilegt fyrir fyrirtæki að þurfa að starfa í hagkerfi sem býður upp á hæstu
vexti í Evrópu og krónu sem enginn veit hvernig muni standa á morgun.
Það er líka athyglisvert hversu lítinn stuðning þessi nýsköpun hefur fengið
frá hinu opinbera. Á meðan hundruðum milljóna er varið í að markaðssetja
íslenskar afurðir erlendis, þá sést lítið af fjármagni fara í þróun á þessu
sviði. En kannski að þetta sé að breytast. Áhersla er nú lögð á að fá hingað
hátæknifyrirtæki. Þó ekki nema til þess að reka hér netþjónabú. Slíkt ætti að
kalla á aukinn kraft innan menntakerfisins í þjálfun á starfsfólki fyrir þessi
fyrirtæki. Hvort við munum einhvern tíma eignast okkar kísildal skal ósagt
látið. En það má vona.
En hvað er góð vefhönnun?
Fagmennska á sviði
vefhönnunar er vanmetin
Nýsköpun á þessu sviði hér
á landi er lítil
Góð hönnun
er góð fyrir lífið