Tölvumál - 01.02.2008, Qupperneq 68

6 8 | T Ö L V U M Á L
Umfjöllun um faghópa
Draumavinnustaðurinn
Þann 20. nóvember síðast liðinn hélt félagið skemmtilegan fund undir
yfirskriftinni „Draumavinnustaðurinn og bestu leiðir til að leysa verkefni“.
Umræðustjórn var í höndum Guðbjargar Lindu Rafnsdóttur og kom hún með
ýmis ný sjónarhorn og fróðleik inn í fjörugar umræður fundarmanna.
Umræðan snerist um vinnustaðinn og hvaða hlutir það væru sem starfsmenn
kunna sérstaklega að meta. Hvort það væri til dæmis munur á því hvað
konur og karlar kunna að meta í vinnustaðamenningu eða almennum
aðbúnað á vinnustað.
En hvað er það sem laðar starfsmenn að og fær þá til að vilja halda áfram
að starfa hjá viðkomandi fyrirtæki? Nokkrir þættir virðast skipta hér mestu
máli: Virðing í garð starfsmanns, það að finna að vinnan sé einhvers metin,
aðbúnaður á vinnustað, menning fyrirtækis, fjölbreytt og skemmtileg verk­
efni, hóflegur vinnutími, almennt góð stjórnun og starfsmannastjórnun,
jákvætt viðmót, stuðningur yfirmanna og samstarfsmanna, möguleikinn til
að geta haft áhrif og/eða þróað sig í starfi með krefjandi verkefnum eða
frekari menntun, góður starfsandi og eining innan fyrirtækisins ásamt því
að geta verið stoltur af bæði fyrirtækinu og því sem maður er að gera.
Óhóflegur vinnutími til lengri tíma, illa skipulagðir verkferlar, lítil sem engin
starfsmannastjórnun, óskýrar línur og reglur, óljós skilaboð og þar með lítil
virðing í garð starfsmanna er ekki til þess fallið að laða að og halda í góða
starfsmenn.
Eitt atriði virðist gegna sífellt stærra hlutverki í þessu samhengi, en það
er vinnustaðamenning fyrirtækisins. Ræddu UT­konur hversu mismunandi
hún er milli fyrirtækja og hvernig ýmist er um að ræða karllæga eða fjöl­
skylduvæna menningu. Svör við eftirfarandi spurningum þóttu gefa
ákveðnar vísbendingar þar um:
• Eru makar ætíð með þegar eitthvað er gert eða er verið að bjóða upp á
makalaus vinnustaðapartý?
• Eru dart, billjardborð og boxpúði það helsta sem starfsmönnum er
boðið upp á sem „afþreyingu“ ?
• Finnst sumum starfsmönnum þægilegt að „trappa sig niður“ í vinnu frá
klukkan fjögur til sjö? vera í rólegheitum að vinna og spjalla og jafnvel
panta pizzu og koma svo heim þegar búið er að svæfa börnin og allt
yfirstaðið þar?
Fram kom á fundinum að fjölskylduvæn starfsmannastefna er nokkuð sem
bæði karlar og konur kunna í vaxandi mæli að meta, en konur leggja þó
mun meiri áherslu á þennan þátt. Jafnvægi vinnu og einkalífs, sveigjanlegur
vinnutími, átta tíma vinnudagur og lítil sem engin yfirvinna er meðal þess
sem margir nefndu. Gott vinnuumhverfi, stuðningur frá vinnufélögum og
stjórnendum, að vel sé tekið á móti starfsmönnum og vel hlúð að þeim
almennt eru einnig atriði sem starfsmenn kunna vel að meta.
Vinnutíminn skiptir misjafnlega miklu máli fyrir fólk, eftir því á hvaða aldri
viðkomandi er, á hvaða aldri börnin eru og aðrir persónulegir hagir.
Öll viljum við að okkur líði vel í vinnunni. Ánægður starfsmaður sem er
stoltur af starfi sínu og fyrirtækinu er verðmætur starfsmaður sem skilar
betri vinnu, auknum afköstum og er þannig fyrirtækinu góð auglýsing.
UT­konur
Félag UT­kvenna hefur staðið fyrir ýmsum uppákomum síðan það var
stofnað, s.s. fræðslu­og skemmtikvöldum ásamt morgunverðarfundum þar
sem haldin hafa verið fróðleg erindi.
Eitt af megin markmiðum félagsins er að efla áhuga ungmenna á námi
og störfum sem tengjast tölvunarfræði og upplýsingatækni, með sérstakri
áherslu á stúlkur. Vorið 2007 gaf félagið út bækling sem sendur var til
allra 15 og 18 ára stúlkna á landinu, þar sem kostirnir við nám og störf
í upplýsingatækni eru kynntir. Bæklinginn má nálgast á PDF formi á
heimasíðu félagsins, á slóðinni www.utkonur.wordpress.com, en þar má
einnig finna ýmsar upplýsingar og greinar sem ritaðar hafa verið um konur
og upplýsingatækni.
Þóra Halldórsdóttir
formaður Félags kvenna
í upplýsingatækni
Meðal markmiða félagsins er að vera
vettvangur skoðanaskipta og skapa
umræður um mál sem konum finnst
skipta máli hverju sinni
Draumavinnustaðurinn
og bestu leiðir til að leysa verkefni
UT-Konur, félag kvenna í upplýsingatækni, hóf sitt 3ja starfsár í haust. Meðal markmiða félagsins
er að vera vettvangur skoðanaskipta og skapa umræður um mál sem konum finnst skipta máli
hverju sinni.