Tölvumál - 01.02.2008, Page 79

T Ö L V U M Á L | 7 9
Hægt er að komast á netið næstum hvar sem er með nýjustu farsímum,
lófatölvum, tónlistarspilurum og lófatækum leikjatölvum. Meðfærileikinn er
á kostnað skjástærðar og möguleika við innslátt sem aftur mótar raunhæfa
notkunarmöguleika.

20. nóvember
Hugbúnaðargerð á krossgötum var yfirskrift árlegrar hugbúnaðarráðstefnu
Ský þar sem fjallað var um áskoranir í starfsumhverfi hugbúnaðargeirans
og nýjungar í aðferðafræði. Fjallað var um mannekluna í upplýsinga­
tæknigeiranum og reynt að varpa ljósi á umfang vandans og hvernig á að
bregðast við honum. Einnig var fjallað um mismunandi aðferðir til að leysa
stór og smá verkefni í hugbúnaðargerð, um sívaxandi kröfur sem gerðar
eru til öryggis í hugbúnaðarþróun og þá þróun í vefþjónustu sem gerir æ
auðveldara að samhæfa og tengja ólík kerfi.
20.nóvember
Félag kvenna í upplýsingatækni hélt umræðufund á Grand þar sem rætt
var um draumavinnustaðinn og bestu leiðir við að leysa verkefni. Guðbjörg
Linda Rafnsdóttir á rannsóknarstofu í vinnuvernd og dósent við HÍ stýrði
umræðum.
29. nóvember
Upplýsingatækni og öryggi sjúklinga var yfirskrift ráðstefnu Fókus sem var
haldin á Hótel Loftleiðum. Fjallað var um mikilvægi upplýsingatækni fyrir
öryggi sjúklinga út frá klínísku og tæknilegu sjónarhorni.
29. nóvember
Ársfundur Fókus, félags um upplýsingatækni í heilbrigðisþjónustu var
haldinn í kjölfar heilbrigðisráðstefnunnar.
6. desember
Jólaráðstefna Ský var haldin á Hilton Reykjavík Nordica og fjallaði um
umbreytingu Internetsins þar sem gengið var út frá því sem forsendu að
framtíðin beri með sér margföldun á umferð um Internetið og kröfur muni
aukast um tryggð gæði og hnökralausa notkun. Það sem hefur einkennt
þróun Netsins undanfarið er mikil aukning nýrrar bandbreiddar­krefjandi
þjónustu og stóraukin hlutdeild almennings og er áætlað að svokallað
„innihald“ Netsins tvöfaldist núna á 18 mánaða fresti.
13. desember
Fjölmennur hádegisfundur var haldinn á Grand Hótel Reykjavík þar sem
kynntar voru niðurstöður úr úttekt sem Sjá ehf vann fyrir forsætisráðuneytið
og Samband íslenskra sveitarfélaga. Fundurinn bar yfirskriftina Hvað er
spunnið í opinbera vefi 2007? Markmiðið með úttektinni er að fá heildstætt
yfirlit yfir þá þjónustu sem er í boði á vefjum ríkis og sveitarfélaga en einnig
að auka vitund opinberra aðila um það hvar þeir standa í samanburði við
aðra og gefa betri hugmynd um möguleika og tækifæri sem felast í rafrænni
þjónustu. Sams konar úttekt var gerð árið 2005 og áhugavert að skoða
hvaða breytingar hafa orðið á síðustu tveimur árum.
Frekari upplýsingar um atburðina og glærukynningar fyrirlesara er að finna
á vef Ský www.sky.is undir Ráðstefnuvefur ­ Liðnir atburðir.