Tímarit hjúkrunarfræðinga - 01.04.2013, Page 10

Tímarit hjúkrunarfræðinga – 2. tbl. 89. árg. 20136
„Það var frekar tilviljun en eitthvað annað sem varð þess valdandi að ég fór
að læra hjúkrunarfræði eftir stúdentspróf,“ segir Ingibjörg Baldursdóttir en hún
gerðist síðar brjóstagjafarráðgjafi og segir hér frá því starfi.
BRJÓSTAGJAFARRÁÐGJÖF Á EIGIN VEGUM
Ég ætlaði fyrst í þýsku og myndlistarnám
en valdi svo allt aðra leið. Eftir útskrift
úr deildinni árið 1990 vann ég í
heilsugæslunni í eitt sumar áður en ég
eignaðist fyrsta barnið mitt. Ég hafði
unnið á barnadeildinni á Landakoti
sumarið eftir þriðja árið og fann að það
átti vel við mig að vinna með börnum og
fjölskyldum þeirra. Ég tók svo nokkurra
ára hlé áður en ég sneri aftur til starfa
við hjúkrun og eignaðist á þeim tíma þrjú
börn og naut þess að vera heima með
þeim. Þegar ég sneri aftur til vinnu fór ég
að vinna á Miðstöð heilsuverndar barna
Ingibjörg Baldursdóttir, ingibjorgba@simnet.is
Ingibjörg með
dúkkuna sem hún
notar í kennslu.
sem þá var á Heilsuverndarstöðinni.
Þetta voru skemmtilegir tímar með
frábæru samstarfsfólki og samheldnum
hópi fagfólks. Á þessum tíma tók ég
brjóstagjafarráðgjafaprófið og gat nýtt
þá kunnáttu vel í starfinu í ung­ og
smábarnavernd.
Ég hef alltaf haft mikla þörf fyrir að lesa
mér til og læra meira um það sem ég
er að vinna við. Það varð til þess að ég
fór í diplómanámið í heilsugæslu og lauk
því vorið 2007 um það leyti sem yngsta
dóttir mín fæddist. Í þessu námi lærði
ég gríðarlega margt sem hefur nýst mér
í starfi. Það er svo merkilegt að eftir því
sem maður les og lærir meira þá smellur
svo margt saman og það veitir svo miklu
betra innsæi í margs konar aðstæður og
tilfelli í starfinu.
Ekki hefði mig grunað annað á þessum
tíma en að ég ætti eftir að verja allri
minni starfsævi í heilsugæslunni. Örlögin
réðu því hins vegar að það kom kreppa
og þá þurfti að spara í heilbrigðiskerfinu
og mín staða var lögð niður, rétt eftir
að ég sneri til baka úr fæðingarorlofi.