Tímarit hjúkrunarfræðinga - 01.04.2013, Side 52

Tímarit hjúkrunarfræðinga – 2. tbl. 89. árg. 201348
Kjarasvið
Samningar og réttindagæsla fyrir
félags menn er eitt af aðalverkefnum
félagsins. Stærsti kostnaðarliðurinn
er vegna lögfræðiaðstoðar en nokkur
mál hafa komið upp undanfarið þar
sem vinnu veitendur hafa ekki staðið
rétt að uppsögnum eða breytingum
á kjörum félagsmanna. Einstaka mál
hefur þurft að reka fyrir dómstólum.
Kostnaður vegna lögfræðiaðstoðar
nam um 6 milljónum króna en með
lögfræðiaðstoðinni hefur gengið vel
að semja um mál við vinnuveitendur.
Það leiðir oft og tíðum til fjárhagslegs
uppgjörs við félagsmann sem fær það
að fullu í eigin vasa. Þannig ber félagið
í raun allan kostnað af málarekstrinum
en félagsmaðurinn uppsker ef málið
vinnst eða samið er um það. Því má
að vissu leyti líta á aðild að félaginu
sem ákveðna starfsmannatryggingu fyrir
félagsmenn þar sem þeir fá úrlausn sinna
mála fari svo illa að brotið sé á þeim.
Þá styrkir kjarasviðið starf svæðisdeilda
um 2,3 milljónir ár hvert, meðal annars
til fræðslufunda, aðalfunda og annarra
verkefna.
Fundahald vegna stofnanasamnings
á Landspítala kostaði um 1,2 milljónir
króna. Þar féll til vinna samninganefndar,
kostnaður við fund á Grand hóteli og
fleira.
Alþjóðasamstarf
Skorið hefur verið talsvert niður í
alþjóðasamskiptum eftir bankahrunið
með tilheyrandi veikingu krónunnar.
Árgjöld í félagasamtök erlendis eru
þó ríflega 1,6 milljónir kr. Þá þarf að
ferðast til og frá fundum hjá Alþjóðaráði
hjúkrunarfræðinga, Evrópusamtökum
h júk runa r f é l aga , Samv innu
hjúkrunarfræðinga á Norðurlöndum og
fleiri samstarfsaðilum en það kostaði 5,3
milljónir króna 2012.
Úrsögn úr BHM 2009
Eins og kemur fram annars staðar í þessu
tölublaði ákvað aðalfundurinn 2009 að
Félag íslenskra hjúkrunarfræðinga skyldi
segja sig úr BHM. Skiptar skoðanir
hafa verið um hversu heppileg úrsögnin
var og ekki síst út frá fjárhagslegu
sjónarmiði. Fyrir liggur hins vegar að
alls hafa sparast um 45 milljónir króna
í árgjöld til BHM síðan úrsögnin tók
gildi. BHM endurgreiddi FÍH að auki
15 milljónir vegna eignarmyndunar
félagsins í BHM. Ágreiningur varð
hins vegar um aðild félagsins að og
hlutdeild í styrktar­ og sjúkrasjóði BHM.
Félag íslenskra hjúkrunarfræðinga rak
málið fyrir dómstólum en tapaði því
að lokum. Kostnaður við málareksturinn
nam samtals 19,6 milljónum króna.
Afganginn hefur félagið notað í að
bæta lögfræðiaðstoð umtalsvert vegna
málareksturs félagsins fyrir félagsmenn,
þar sem félagsmenn hafa fengið verulega
bætt aðgengi að lögfræðingi, auk þess
að styrkja rekstur félagsins á mörgum
sviðum.
Eignir félagsins
Í gegnum árin hafa hjúkrunarfræðingar
sýnt mikla ráðdeild og félög
hjúkrunarfræðinga yfirleitt eytt minna
en þau hafa aflað. Því hefur smám
saman myndast eigið fé sem nú í
samandregnum efnahagsreikningi FÍH er
um 465 milljónir kr. Það er því mikilvægt
að gæta að umsýslu þessara miklu
fjármuna svo að þeir nýtist félaginu sem
best. Stærsta einstaka fjárfestingin er í
verðbréfasjóðum þar sem mikil áhersla
er lögð á innlend ríkisskuldabréf sem eru
með áhættuminni fjárfestingarkostum á
markaði. Í efnahagsreikningi er miðað
við stöðuna um áramót en hjá sumum
sjóðum sveiflast eignir nokkuð yfir árið, til
að mynda hjá vísindasjóði. Hann átti yfir
140 milljónir í verðbréfum 31. desember
2011 en nokkrum mánuðum seinna
nánast ekki neitt því þá var búið að
greiða A­hluta styrkinn til félagsmanna.
Vinnudeilusjóður átti hins vegar um
105 milljónir króna í verðbréfum en sú
eign sveiflast yfirleitt lítið yfir árið. Þá
hefur síðustu ár nokkur hluti eignar
vinnudeilusjóðs verið í formi vaxtaberandi
láns til styrktar­ og sjúkrasjóðsins. Það
er líklega betri og öruggari fjárfesting
en verðbréf en þörf styrktarsjóðsins
fyrir lánsfjármögnun fer minnkandi og er
takmarkið að greiða sem mest af láninu
til baka til vinnudeilusjóðs á þessu ári.
Félagið geymir einnig fjármuni í húseign.
Þar má nefna hæðina að Suðurlands­
braut 22 og orlofsbústaðina en samtals
eru um 150 milljónir bundnar í slíkum
fastafjármunum. Svo þarf að vera til
eitthvað af handbæru fé til þess að
greiða laun, kaupa vörur og þess háttar.
Lokaorð
Hér hefur verið fjallað um fjárhag
Félags íslenskra hjúkrunarfræðinga
og í hvað fé félagsmanna er varið. Á
aðalfundi félagsins 31. maí nk. verður
lagður fram ársreikningur fyrir 2012 og
fjárhagsáætlun fyrir 2013. Þá verður
tækifæri til spurninga og umræðu um
fjármál félagsins, en fjárhagsáætlunin
byggist meðal annars á starfsáætlun
stjórnar og geta því ákvarðanir aðalfundar
um forgangsröðun verkefna kallað á
breytingar á fjárhagsáætlun.
Efnahagsreikningur félagsins hefur
stækkað ár frá ári og er samsettur af
ólíkum eignaflokkum, allt frá innistæðum
í banka yfir í fastafjármuni, svo sem
húsnæði félagsins á Suðurlandsbraut.
Félag íslenskra hjúkrunarfræðinga er
fjárhagslega sterkt og stöndugt félag
og því tilbúið í slaginn í áframhaldandi
baráttu fyrir bættum kjörum og faglegri
styrkingu félagsmanna.
Sólveig Stefánsdóttir
er viðskiptafræðingur
og fjár málastjóri Félags
íslenskra hjúkrunar­
fræðinga.