Tímarit hjúkrunarfræðinga - 01.10.1999, Síða 63

ulltrúaþíng ICN í }-.or^or
Það var mikið um dýrðir í London í lok júní þegar
Alþjóðasamtök hjúkrunarfræðinga (ICN) héldu upp á 100
ára afmæli samtakanna með ráðstefnu sem rúmlega 4500
hjúkrunarfræðingar sóttu. Það var hjúkrunarfræðingurinn
Ethel Gordon Fenwick sem kom fram með hugmyndina
um að mynda alþjóðanet hjúkrunarfræðinga. Hugmynd
hennar og fleiri hjúkrunarfræðinga, sem komu að stofnun
samtakanna, var að hjúkrunarfræðingar væru sterkt sam-
félagslegt afl sem sameinað gæti haft gífurleg áhrif í að
bæta heilsu og vellíðan fólks. í ávarpi, sem núverandi
formaður ICN, danski hjúkrunarfræðingurinn Kirsten
Stallknecht, hélt við opnun ráðstefnunnar, minnti hún
okkur á hversu mikla framsýni þessir frumkvöðlar okkar
höfðu. Á þeirra tímum voru hjúkrunarfræðingar lítt mennt-
aður starfskraftur og lágmarkslaun til handa hjúkrunar-
fræðingum og grundvallarhugmyndir um jafnan rétt til
heilbrigðis draumsýnir einar. Þessar konur höfðu ekki
kosningarétt í sínu heimalandi en sáu fyrir sér framtíð þar
sem grunnmenntun hjúkrunarfræðinga væri lögvernduð
og að vinnuaðstæður stuðluðu að hjúkrun í háum
gæðaflokki.
Aðildarfélög ICN eru nú 119 talsins og hafa tveir full-
trúar frá hverju félagi rétt til setu á fulltrúaþingi samtakanna
og einungis annar þeirra með atkvæðisrétt. Fulltrúar
tæplega 100 aðildarríkja sóttu þingið í ár. Fulltrúaþingið er
haldið annað hvert ár og fer það með æðstu stjórn sam-
takanna. Fulltrúar íslands á þinginu í ár voru Herdís
Sveinsdóttir, formaður, og Aðalbjörg Finnbogadóttir,
hjúkrunarfræðingur starfandi hjá Félagi íslenskra hjúkrunar-
fræðinga. Ásta Möller sat einnig fulltrúaþingið en eins og
hjúkrunarfræðingar vita þá var hún kjörin í stjórn ICN sl.
vor.
Fulltrúaþingið stóð þrjá daga. Dagskráin fram að hádegi
fyrsta daginn var lokuð öðrum en fulltrúunum sjálfum. Þá
var til umræðu framtíðarstefna félagsins. Aðrir dagskrárliðir
voru opnir og fylgdist fjöldi hjúkrunarfræðinga og gesta
með því sem fram fór. Tekin voru fyrir almenn aðalfunda-
mál, skýrsla forseta og framkvæmdastjóra, reikningar iagðir
fram og samþykktir og ákvörðun tekin um félagsgjöld fyrir
árin 2001 og 2002. Lagabreytingar og ályktanir voru einnig
á sínum stað. Mesta hitamáli þingsins var hverjir eiga rétt á
að gerast aðildarfélagar að ICN, en lög ICN kveða á um að
einungis eitt félag frá hverju landi geti verið aðildarfélag.
Félagið, sem er fulltrúi síns lands, skal vera fulltrúi flestra
hjúkrunarfræðinga í landinu, þó í samræmi við aðrar reglur
ICN. Þær kveða m.a. á um að félagið verði að vera fagfélag
hjúkrunarfræðinga en ekki einungis kjarafélag þeirra. En
tilgangur ICN er að vera fulltrúi hjúkrunarfræðinga um allan
heim og vera alþjóðarödd hjúkrunarfræðinga.
Á fulltrúaþinginu, sem haldið var í Vancouver 1997,
urðu mikil átök en þá var aðildarfélagi frá Brasilíu, sem
verið hafði fulltrúi land síns frá því árið 1927, skipt út fyrir
annað brasilískt hjúkrunarfélag. Greinilegt var að fulltrúar á
þinginu nú í sumar höfðu ekki náð að jafna sig eftir þau
tilfinningalegu átök sem urðu árið 1997. Fyrir þinginu í ár lá
að taka aftur ákvörðun um að skipta út einu félagi fyrir
annað. Að þessu sinni þurftu fulltrúar að ákveða að skipta
út ítölsku hjúkrunarfélagi, sem verið hefur fulltrúi Ítalíu frá
1922, fyrir annað mun stærra ítalskt félag. Niðurstaða
úttektar stjórnarinnar var að félagið, sem óskaði eftir að
verða fulltrúi Ítalíu, uppfyllti öll viðmið um félagsaðild auk
þess að vera mun stærra en núverandi aðildarfélag. Því
væri það fulltrúi fleiri hjúkrunarfræðinga á Ítalíu. Áður en
Ítalíumálið var lagt fyrir var tekin til umræðu tillaga stjórnar
um að rýmka heimildir um fjölda félaga frá hverju landi
sem gætu orðið aðildarfélög. Þannig að auk aðal-aðildar-
félags gætu fleiri félög frá sama landi átt aðild sem auka-
félög. Aukafélög hefðu málfrelsi en atkvæðisréttur tak-
markaðist við ákveðna málaflokka. Gífurlegar umræður
spunnust um þetta og voru þær á vissan máta framandi
fyrir okkur íslendingana. Fulltrúaþingið samþykkti að fjölga
ekki aðildarfélögum en jafnframt gat það ekki tekið
ákvörðun um hvort skipta ætti út aðildarfélaginu frá Ítalíu.
Niðurstaða málsins var að vísa öllum pakkanum aftur til
stjórnar til frekari undirbúnings og að málið yrði tekið upp
að nýju í Kaupmannahöfn árið 2001 en þá verður næsta
fulltrúaþing haldið.
í Kaupmannahöfn verður, líkt og var í London, haldin
fagráðstefna samhliða fulltrúaþinginu. Það er full ástæða til
að mæla með því við íslenska hjúkrunarfræðinga að þeir
mæti því á ICN fagráðstefnum er um að ræða vönduð
erindi og rannsóknakynningar. íslenskir hjúkrunarfræðingar
eru að vinna fræðivinnu sem er vel sambærileg því sem
gerist erlendis og hvet ég þá til að kynna verk sín á þess-
um ráðstefnum ICN þar sem þúsundir hjúkrunarfræðinga
mæta.
Fundargerð fulltrúaþingsins liggur fyrir í lok nóvember
og geta hjúkrunarfræðingar, sem hafa áhuga á að kynna
sér hana, haft samband við Félag íslenskra hjúkrunar-
fræðinga.
Herdís Sveinsdóttir.
Tímarit hjúkrunarfræðinga 4. tbl. 75. árg. 1999
275