Skírnir - 01.09.2014, Page 87

311mömmur, ömmur, dætur
mannshvarfinu á milli þess sem hún reynir að annast son Axels,
sinna móður sinni og selja barnabækur sem byggjast á tilraunum
Bangsímons til að miðla heimspeki Strindbergs en þeim reynir hún
að troða inn á stórmarkaði ásamt nýjasta metsölukrimma Valgarðs
Jónssonar. Óreiðan í lífi Sunnu fer með öðrum orðum ekki á milli
mála, hún þýtur á milli staða án þess að ná í skottið á sjálfri sér ólíkt
móður sinni sem er rósemdarkona og minnir um margt á ömmur í
öðrum verkum Auðar. En samband móður og dóttur er rauður
þráður; rétt eins og smástelpan í Tryggðarpanti sem fylgdi móður
sinni í skúringar og píanókennslu hefur Sunna fylgt einstæðri
móður sinni:
Utan skólatíma fylgdi ég henni eins og skugginn. Leið hljóðlát áfram, fetaði
í spor hennar og horfði á hana vinda tuskur upp úr brennandi heitu sápu-
vatni. Það er snúið að segja hvort vó þyngra, samúðin með mömmu eða
blygðunin yfir aldri hennar. (26)
Sunna heimsækir mömmu sína, greiðir henni og rifjar upp þá fortíð
þegar móðir hennar var eldri og hallærislegri en hinar mæðurnar: „Á
skólavökum hitnaði mér í kinnum þegar hún mætti í heima-
saumuðum krepkjól og kuldaskóm með spariskóna í heklaðri tösku -
skjátu með blómamynstri. Engin önnur mamma var svona …“
(22–23). Eigi að síður er mamman akkerið í lífi Sunnu sem er sjálf
barnlaus og bíður eftir því að Axel komi heim, að þau fylli líf sitt og
komist á réttan stað:
Ég verð að trúa á draumana hans. Ellegar verða draumar mínir að engu.
[…] Núna átti barnið að vera komið. Núna átti rétta vinnan að vera fundin.
Núna átti ég að hafa uppgötvað rétta staðinn í lífinu. Núna leita ég ann-
arrar konu. (93)
Sunna leitar skýringa á hvarfi Arndísar í sameiginlegri fortíð þeirra
og sökkvir sér ofan í minningar frá þeim tíma þegar þær voru saman
í Barcelona. Smám saman verður lesanda ljóst að lausn málsins leyn-
ist í barneignum þar sem Sunna varð ólétt og lét eyða fóstrinu að ráði
Arndísar um leið og Arndís leitaði leiða til að geta eignast barn. Enn
og aftur er það sköpun nýs lífs sem er þungamiðjan í sögu Auðar en
líka sársaukinn sem fylgir barnleysinu. Axel og Sunna bíða eftir
skírnir
Skírnir Haust 2014 umbrot.qxp_Layout 1 6.10.2014 13:19 Page 311